पोरबू 24

राजपाल पेलीकसीन मुन्देल पोलूस

1 चेंचीच एर्रान पिटतेल मुकीयाल पेलाच आननीया, ओदो सियानकूलीन आरू तिरतूल्लूस एन्डान पिदीर तो ओक उकीलीन चेंगे केसरीये ती वेञ्ञेड। ओर राजपाल पेलीकसीन मुन्देल चेनी किली पोलूसीन बोदी चिञ्ञेर। 2 आनातले पोलूसीन पेलीकसीन मुन्देल एन्देर्रानूग तिरतूल्लूस, “ए माराज! इन चेत्तूग आम निक्के चुक ती मेनमोम। आरू इन चेत्तूग ई देचे ती कुबे कियाल तो कामूल बेले उजरूमोव। 3 आटनी मेन्डानूग ए पेलीकस माराज! ई जाम्मा इसाबूल चेत्तूग, आरे एरको आम मेन्न तीग इनीन जुवार पोक पोक्की मानूमोम। 4 एरोड आन इनीन निक्के पोक-पोक्की पान्डीकपाना। जियोम नोयपीक किली आम्म ओदो पाटेलीन वेन। 5 एटे एनोड ई मांजा निक्के एड़जाल आय। ओड गुलाय मोंजीपूर ती मेन्डान एऊदीकूलीन कुरलाकतेड नाड आरू ओड नासरी एन्डान पोन्ददी देरोम तो मुकीयाल आय। 6 ओड मापोरबून गुडीन बेले चूत एरीक कानतीड। आदूग आम ओनीन चुम्मोम। (आम ऊनीन आम्म नियोमीन इसाब ती डेन्ड चियरूमीन। 7 एरोड पालटेनकूल मुकीयाल लुसीयास एके वेरी, बेरपेला ओनीन आम नाड़बूल तीग चान्डाक किली उञ्ञेड। 8 आरू ओनीन बोदी चियरानेरीन इन मुन्देल वेरकेर एनी तियारतेड।) आम ऊनीन बोदी चियमोम जे? आ जाम्मा पाटेलीन ईन कुदे ओनीन पोरकोड इनूंग पाता चेला” एट्टेड। 9 एऊदीकूल बेले ओन चेंगे बिड़ी किली ऊड पोकरानोव जाम्मा चेत्ते आय एट्टेर।

पोलूस तानीन बाचाक पेलीकसीन मुन्देल गुवारतानो

10 आनातले राजपाल पोलूसीन, पोक एनी चायगा टोटीकतानूग पोलूस ओनीन, “ईन कुबे कोम्बेर ले ई देचेत लोगीन नियाव चाजूमोत एनी आन पुट्टेन। आदूग आन, आन्न इसाब ती पोक्कू वेड़का एरमेन। 11 आन एरूसेलेम ती मापोरबून मोड़कू वेरी किली, एबे बारा दिनेग ले आगेर एराई एन्डानोन ईन ताड़ू नाम्बीकतात। 12 ओर आनीन मापोरबून गुडी ती चिलाड एऊदीकूल बिन्ती जोड़रान ओलेक ती चिलाड एके गेड़े ती आरे बेले आन एरोड बेले पोका पोकी एरेक चिलाड लोगीन कुरलाकपेक चूड़ारी। 13 आरू ओर एबे आनीन बोदी चियमेर जे? आयची पाटेल तो डेगेरीन बेले एपीक ओड़ार। 14 एरोड आन आम्म पेपेर दादीलेर मापोरबून सेवा चाजूमेन आरू ईसू मेरचीक मेन्डान पाव ती चेलूमेन एनी मानूमेन। ऊर आदीन पोन्ददी देरोम एनमेर। मूसाल नीती ती आरू मापोरबून कान तीग काबेर वेन्नी किली लोगीन पोक चियरान गुरूकूल लिकूरान कागेतूल तो इसाबूल ती बिड़रान जाम्मेनी आन बिसवात चाजूमेन। 15 देरमीकूल आरू ओदेरमीकूल जाम्मा चाय्यरान कान तीग जियोम पाड्डी चुलतार एनी ई मांजाकूल मापोरबून कान आचा चाजूमेर। आटनी आन बेले आचा चाजूमेन। 16 आवीन चेत्तूगी, आन बेले एतोड नांग, आन्न बीतराम तो मेन्नीन गोवाई बेले मापोरबून नेंजेर ती आरू मांजेन नेंजेर ती केचूर चिलायो मेनको एनी कुदे आदीन बेरपेला कान्डूकमेन।

17 कुबे बेरेकूल एर्रान पिटतेल आन आम्म लोगीन कान तो ओदो गेरीब लोगूग देरोम पोयसेल चियू आरू मापोरबूग जेतरा चाजू एरूसेलेम ती वेरी मेन्डीन। 18 आन ओगराक एरी किली मापोरबून गुडीत आवारी ती इदीन चाजेक ओर आनीन चूड़ेर। आन्न चेंगे जोप चिला मेन्डू आरू आन नाती केट-केट एरीकपेना। 19 ओ, आतोड आसीयेत ओदो एऊदीकूल मेन्डीर। ओरेल आन्न विरूद ती नातो एरको पाटा मेन्डू एरोड, ओर इन मुन्देल वेरी किली बोदी चियरानो मेट्टो। 20 चिलाड इना मेन्डान लोग आन पोँच मुन्देल निलची मेनेक, नातो एरको केचूर बेटेर एरोड आदीन इनीन पोक्केकेर। 21 आन ओर मुन्देल निलची मेनेक मेनगेर जियोम पाडरार एनी बिसवात चाजूरान एन्डान पाटेग आनीन नियाव चाजूमेर एनी जोड़ ती पोकरान ओकती पाटेन चायी आदूग ले आगेर नाती चिल्ला” एट्टेड।

22 आनातले ईसू मेरचीक मेन्डान पाव तो जाम्मा बानीन पुन्दान पेलीकस, “पालटेनकूल मुकीयाल लुसीयास वेरोड ई इसाब ती एटे चाजूरानो आय एनी आन नियाव चाजूरान” एनी पोँचीन आटकाकतेड। 23 ओड पोलूसीन राका पारा मेन्डान सोव गोटा पालटेनकूल मुकीयालीन, “ओनीन रेच्चा चाकली मेन। ओनीन चिकरील ती काटकी मेनूंग लागाया। ओन चेगा लोगीन ओनीन देक-रेक चाजू माना चाजूमेन” एट्टेड।

पेलीकस आरू दुरूसीलेन मुन्देल पोलूस

24 ओदो दिनेल पिटतेल पेलीकस तान्न एऊदी जातीत आयाल दुरूसीलेन चेंगे वेञ्ञेड। आरू पोलूसीन कूयपीक किली ईसू बिसवात चाजूरान इसाब ती, वेट्टेड। 25 आनातले पोलूस एके देरोम चाजूरानो आरू मेन्न के लागेन तो बिचारूलीन एटे आटकाकतानो आय एन्डान इसाबूल आरू मापोरबू लोगीन नियाव चाजूरान चिरीक तो इसाबूलीन केडीकतेड। आवीन वेन्नी किली पेलीकस नारचेड आरू “इने तीग इद्दी एर्रा। ईन एबे चेन। आन आनूंग पोलोंग टोन्डूरान वादेक इनीन मारी कूयूरान” एट्टेड। 26 ओनूग पोलूसीन जेल तीग पुच्चू इड्डू, दिंगोट बेले पोयसेल टोन्डूरा एनी आचा मेन्डू। आदूगी आय ओड पोलूसीन गेन-गेन कूय कूयी ओनोड ऊबूरीड। 27 एरोड ईरवोकाल पिटतेल पुरकीयूस पेसतूस पेलीकसीन पाड ती वेञ्ञेड। एरोड पेलीकस एऊदीकूलीन वेड़का चाजपीकतान उवाट ती पोलूसीन जेल ती नी मेनूंग इट्टेड।