पोरबू 23

1 पोलूस पोँच टिटाक नेंजराकतेड आरू, “ए आन्न तोल्लेरे, इनेत आर्रे आन आन्न जाम्मा रेच्चाट बीतराम तो मेन्नीन गोवाईन तीग मापोरबून नेंजेर ती पिञ्ञेन नान” एट्टेड।2 आटनी पोकरानूग मुकीयाल पेलाच आननीया पोलूसीन लेग्गे निलची मेन्डानेरीन, पोलूसीन चोन्ड ती तापूर एनी तियारतेड।3 तेबे पोलूस ओनीन, “ए चूना ओटची मेन्डान बीतीन आकाटतोतीने! मापोरबू इनीन चेत्ते तापराड। ईन मूसाल नीती ती पोकरान आकाट आनीन नियाव चाजू इना उन्डोत नात, आरू मारी एटे नीती ती बानायोन आनीन ताप्पूर एनी किली तियारूकमोत गो?” एट्टेड।4 आदूग पोलूसीन लेग्गे निलची मेन्डानेर ओनीन, “ईन मापोरबून मुकीयाल पेलाचीन एटे नारचाका इजीत चुम्मूमोत तेबे?” एट्टेर।5 आदूग पोलूस, “ए आन्न तोल्लेनकूले, आन ऊड मुकीयाल पेलाच आय एनी पूना मेन्डीन। एटे एनोड, ‘आपला लोगीन मुकीयालेरीन कियाल पोकूमेन’ एनी मापोरबून कागेत ती लिका मेन्डा” एट्टेड।

6 तेबे पोलूस आना मेन्डानेर कान तीग ओदेर आरू ओदेर आय एनी पुन्नी किली, पोँच तो लोगीन कूयी किली, “ए आन्न तोल्लेरे! आन ओक परीसी आय आरू परीसीन चिन्ड आय। मेनगेर जियोम पाडरार एनी आन आचा चाजी मेन्डानूग इना आन्न नियाव एरमो” एट्टेड। 7 ओड ईटे पोकरानूग परीसीकूल आरू सदूकीकूल पोका पोकी एरू मुरीयाकतेर। आरू आ पोँच तो मान्दा इरडू बागूल एञ्ञेर। 8 एटे एनोड (सदूकीकूल मेनगेर जियोम पाडारा। आरू सरग दूत आरू बूत डुमेल चिल्लाव एन्डार। एरोड परीसीकूल एके आ मून्डू इसाबूल मेन्डाव एनी बिसवात चाजूरार।) 9 तेबे ओर निक्के कावडी उञ्ञेर आरू मूसाल नीतीन मेरचीकतान ओदो परीसीकूल निलची किली, “ई मांजेन कान आम नाती केचूर बेटोमा। आरू आरो बेले जियोम चिलाड सरग दूत ओनीन पोक्केड नाड एरोड मारी नाताय गो?” एनी रेच्चा पोक्कू मुरीयाकतेर। 10 आनातले कावडी उयरानो निक्के चान्दरानूग पालटेनकूल मुकीयाल ओर पोलूसीन चाय्यीकतार एनी नारची किली पालटेनकूलीन किड़ी चेनी किली पोलूसीन ओर नाड़बूल तीग बेरपेला बेले टान्डी किली एन्दरी पालटेनकूल ओलेक ती उय्यू तियारतेड। 11 आयची चिरीक चित्ता, पोरबू पोलूसीन लेग्गे निलची किली, “ए पोलूस डाडू चाज। एटे ईन एरूसेलेम ती आन्न बीतेर ती गोवाई चिञ्ञोत आटनी इनूंग रोमी गेड़े ती बेले गोवाई चियरानो आय” एट्टेड।

पोलूसीन आनकीक गात चुमरानो

12 पिटतेल तो चिरीक पोका वेवूरानूग, एऊदीकूल ओदेर उलजी किली ओक उवाट चाजेर। ओर पोलूसीन आनकीकपारे आम नाती नी तिनामा आरू उनामा आरू ओनीन आनकीकपाकोड मापोरबू आमीन डान्डेकेड एनी किरीया तिन्देर। 13 आटनी उवाट चाजूरानेर, जाम्मा लोग इरडू कोड़ ले बेले आगेर मेन्डीर। 14 ओर बेड़कूल पेलाचकूल आरू सियानकूल लेग्गे चेनी किली “पोलूसीन आनकीकपारे आम नाती नी बेले तिनामा एनी किरीया तिन्दोम नाम एट्टेर। 15 आदूगी एपोर ईम पोँच तो लोगीन चेंगे बिड़ी किली पालटेनकूल मुकीयालीन पोलूसीन आम रेच्चा जाच आडू आम्म मुन्देल एन्दरेकेड एनी पोकूर। आरू आम पोलूस इना एदाका मेनेक ओनीन आनकीक तायार मेन्डाम” एट्टेर। 16 एरोड पोलूसीन बाचाल आ उवाटीन पाता बेटेड। आदूग ओड पालटेनकूल ओलेकूल ती चेनी किली पोलूसीन आदीन पोक चिञ्ञेड। 17 पोलूस सोव गोटा पालटेनकूल सियानीन ओकूरीन कूयी किली ओनीन, “ई इलेडीन पालटेनकूल मुकीयाल कान उय। ऊड नाताले ओनीन पोक्कू काबेर एन्दरेड नाड” एट्टेड। 18 आदूग ओड आ चेपालीन पालटेनकूल मुकीयाल लेग्गे उञ्ञेड। आरू, “पोलूस एन्डान केयदाल आनीन, ‘ई इलेडीन इन्नेल उय। ऊड पालटेनकूल मुकीयालीन नाताले पोक्कू कान्डूकमेड’ एनी गुवारतेड” एट्टेड। 19 आदूग पालटेनकूल मुकीयाल ओन केय्यीन पात्ती किली एलगा उञ्ञेड आरू “ईन आनीन नातो पोक्कू कान्डूकमोत?” एनी जाच आडेड। 20 आदूग ओड, “एऊदीकूल सियानकूल चेंगे बिड़ी किली पोलूसीन रेच्चा जाच आडूराम एनी जोक्का बिड़ाक किली ओनीन पोँच ती उय्यू इनीन गुवारतान उवाट चाजेर नार। 21 एरोड ओरोन पातीयाकमेन। ओर कान तीग चालीस जानीन ले आगेर लोग गात चुम्मी किली पोलूसीन पाव ती काची आनकीकतान उवाट ती मेन्डार। आरू ओर ओनीन आनकीकपारे नाती नी तिनामा आरू उनामा एनी किरीया तिन्देर नार। आरू ओर एबे तायार एञ्ञेर नार आरू ईन नान एन्डात आले एनी इनीन काकूमेर” एट्टेड। 22 तेबे पालटेनकूल मुकीयाल आ इलेडीन “ईन आनीन इदीन पोक्केन नान एनी एरीनी पोकूमेन” एनी बारजाकतेड। आरू ओड आ इलेडीन चेनूंग इट्टेड।

पोलूसीन केसरीये ती पेलीकसीनेल उञ्ञेर

23 तेबे पालटेनकूल मुकीयाल तान्न आदीकारीकूल इरूलीन कूयी किली “दुय सोव पालटेनकूलीन तायार चाजूर। मून्डू कोड़ देस गोटा गुर्रोचील ती चोकरानेर आरू दुय सोव बालेल पातरानेरीन तायार चाजूर। आरू इने चित्ता बात बेरा केसरीया देचा चेनूंग पेक तायार चाजूर। 24 आरू पोलूसीन राजपाल पेलीकसीन लेग्गाट सामालची किली एपीक गुर्रोचील चियूर” एट्टेड।

25 आनातले ओड ओक ईटो चिट्टीन बेले लिकेड:

26 राजपाल पेलीकसूग कोलोदीयूस लुसीयासीन टिटाक ले लिकूरान चिट्टी।

“ए माराज! इनीन जुवारूकमेन।

27 एऊदीकूल ई मांजेन चुम्मेर आरू आनकीक कानतीर। एरोड आन ओड रोमी देचेतेड आय एनी पाता बेटेन। आदूग आन, आन्न पालटेनकूलोड चेनी किली ओनीन बाचाकतेन। 28 आन ओनीन नातो बोदी चियमेर एनी पाता चाजू कानतीन। आदूग आन ओनीन ओर पोँच ती उञ्ञेन। 29 तेबे आन ओर ताम्म नियोमूल इसाबूलूग ओनीन केचूर लागाकतानोन चूड़ेन। एरोड आनकीकतान आकाट चिलाड जेल ती केटतान आकाट तो डेन्ड चियरान आकाट ओड नाती नी चाजाडी एनी आनूंग पाता चेलोतो। 30 ओदो एऊदीकूल ओनीन आनकीक उवाट चाजूमेर एनी आनीन पोकरानूग, आन तुरते ओनीन इन्नेल चोटतेरनेन। आरू ओनीन बोदी चियरानेरीन बेले इन मुन्देल चेनी किली बोदी चियूर एनी तियारतेन” एनी लिकेड।

31 आदूग ओड पालटेनकूलीन एटे तियारची मेन्डीड आटनी ओर पोलूसीन आन्तीपतरीस गेड़ा आर्रे चित्ता उञ्ञेर। 32 पिटतेल तो चिरीक ओनीन गुर्रोचील चोक्की चेन्डान पालटेनकूल मान्देन उय्यू इड्डी किली ताम पालटेनकूल ओलेकूलेल मेलेरनेर। 33 गुर्रोचील चोक्की चेन्डान पालटेनकूल केसरीये ती एदी किली राजपालूग आ चिट्टीन चिञ्ञेर आरू पोलूसीन ओन केय्य ती बेटाकतेर। 34 राजपाल आ चिट्टीन पोड़ेड आरू पोलूसीन ईन आरो पोलूबतोत आय एनी जाच आडेड? आरू ऊड किलीकीयेतेड आय एनी पाता चाजी किली, 35 ओड ओनीन, “इनीन बोदी चियरानेर वेर्रान पिटतेल आन इन नियाव चाजूरान” एट्टेड। आनातले पोलूसीन एरोदेसीन माल ती रेच्चा पारा मेन्नी किली केडूक तियारतेड।