पोरबू 17

पोलूस आरू सिलास तिसलूनीकीयो गेड़े ती

1 मारी ओर आम्पीपूलीस आरू आपूल्लोनीया गेड़ेल पावोड चेनी किली तिसलूनीकीयो गेड़े ती वेञ्ञेर। आना ओक एऊदीकूल बिन्ती जोड़रान ओलेक मेन्डू। 2 पोलूस तान रोजे चाजूरान आकाट, आ एऊदीकूल बिन्ती जोड़रान ओलेक ती चेन्डेड। आना मून्डू पाबूरान चिरीकूल लोगीनोड मापोरबून कागेत तो इसाबूलीन ऊबा ऊबी एञ्ञेड। 3 आरू ओड ओरीन, “ आबोड़ एर्रानो आरू चाय्यरान कान तीग जियोम पाडरानो ई मेट्टो” एनी चोमजाक किली चेत्त टोटीकतेड। आरू “आन इमीन वेनपीकमेन आयची ईसू आय मसीयाल” एनी पोकरीड। 4 आरू एऊदीकूल ओदेर ओड पोकरानोन चेत्ते आय एनी मानी किली पोलूस आरू सिलासीन चेंगे बिड़ेर। आटनी मापोरबूग नारचूरान कुबे युनानीकूल आरू कुबे मुकीयाट आयचील नातेक ओर चेंगे बिड़ोव।

5 एरोड ओदो एऊदीकूल एके कुचेरूग ओदो बुलेन एरालेरीन चेंग पात्ती किली आबूच एञ्ञेर आरू गुलाय गेड़ेत लोगीन उच उचाक किली आबूच एरीकतेर। ओर यासोनीन ओलेक ती वेरी किली एटे ती बेले पोलूस आरू सिलासीन टान्डी किली जोप तो लोगीन कान एन्दरू कानतीर। 6 एरोड ओर एके पोलूस आरू सिलासीन बेटा कान्डूग यासोनीन आरू ओदो बिसवासी लोगीन टान्डी किली गेड़ेत आदीकारीकूल मुन्देल उञ्ञेर। आरू कोलार एरी किली “ई मांजाकूल गुलाय मोंजीपूर तो लोगीन कुरलाक किली उलटा पुलटा एरीकमेर आरू एपोर आम्म गेड़े ती बेले वेञ्ञेर नार। 7 आरू यासोन ओरूग तान्न ओलेक ती पाड चिञ्ञेड नाड। ऊर जाम्मा ईसू एन्डान पिदीर तो मारी ओक कोस मेन्डाड एनमेर आरू केसर कोसीन नीतीलीन मानारा” एनी जुजाकतेर। 8 ओर आदीन वेनपीक किली जोप तो लोगीन आरू गेड़ेत आदीकारीकूलीन आगेर बिर बिरा एरीकतेर। 9 आदूग ओर यासोनीन आरू आवूर लोगीन जुरमाना पोयसेल पात्ती किली ओरीन चेनूंग इट्टेर।

बिरीया गेड़े ती

10 बिसवासी लोग चित्ता चित्तायी पोलूस आरू सिलासीन बिरीया गेड़ेकेल चोटची काट्टेर। ओर आना एदी किली आनात एऊदीकूल बिन्ती जोड़रान ओलेक ती चेन्डेर। 11 आनात लोग तिसलूनीकीयो गेड़े ती मेन्डानेर ले निरबे रेच्चालेर मेन्डीर। ओर पोलूस आरू सिलास पोकरानोन रेच्चा वेन्नी किली, रोजे मापोरबून कागेतीन पोड़ी किली पोलूस पोकरानो चेत्ते आय काय एटे एनी ताड़रीर। 12 आदूग एऊदीकूल कान तीग कुबे लोग, आरू युनानी जातीत कुबे मुकीयाट आयचील आरू कुबे युनानी माईंड चिन्ड बेले बिसवात चाजेर।

13 एरोड तिसलूनीकीयो गेड़ेत एऊदीकूल, पोलूस मापोरबून पोद्दूलीन बिरीया पोलूब ती केडीकमेड एनी वेन्नी किली, आना बेले वेञ्ञेर आरू जोप तो लोगीन उच उचाक किली कुरलाक मुरीयाकतेर। 14 तेबे बिसवासी लोग तुरते नी पोलूसीन सोमून्द कुडी चेनकेड एनी चोटतेर। एरोड सिलास आरू तिमूतीयूस बिरीया गेड़े ती नी मेट्टेर। 15 पोलूसीन उय चियरानेर पोलूसीन एतेन्स गेड़ा आर्रे एपीक चिञ्ञेर। आनातले ओर सिलास आरू तिमूतीयूस जेटके नी आन्न लेग्गे वेरकेर एन्डान पोलूसीन काबेर पात्ती किली बिरीया मेलेरनेर।

एतेन्स गेड़े ती पोलूस

16 पोलूस एतेन्स गेड़े ती सिलास आरू तिमूतीयूसीन पाव चूड़रीड, आरू गेड़ा मुरीतूल तीग कोप्पी मेन्डानोन चूड़ी किली ओन जियोम केरी चेन्डो। 17 आदूग ओड एऊदीकूल बिन्ती जोड़रान ओलेक ती एऊदीकूलोड आरू मापोरबूग नारचूरान युनानीकूलोड पोक्का पोक्की एर्रीड आरू आट पाचरेकेल तान रोजे बेटूरान लोगोड बेले पोक्का पोकी एर्रीड। 18 तेबे इपीकूरी आरू इसतोईकी नीतीत गुरूकूल ओनोड पोक्का पोकी एरू मुरीयाकतेर। ओर कान तीग ले ओदेर “ई सादाल मांजा नातीन पोक्कू कान्डूकमेड?” एट्टेर। एरोड आवूर ओदेर एके, “ऊड पोर देचेत बोगवानकूलीन इसाबीन पोकरानेड आय आकाट बावूमो” एट्टेर। एटे एनोड ओड ईसू आरू ओड चाय्यी किली मारी जियोम पाडरान एडो पाटेन वेनपीकतानूग ओर आटनी पोक्केर। 19 तेबे ओर पोलूसीन मिटलींग उन्डरान अरीयूपगूस एन्डान पाड ती उञ्ञेर। आरू “ईन पोक्कूमोत जे? आदीन नाताय एनी आम पुनूंग नाम्बीकताम काय एटे? 20 एटे एनोड ईन पोकरान पाटेलीन आम मुन्नी एतोडी वेनाका मेट्टोम। आदूगी आम इदीन इसाब नाताय एनी पुनूंग कान्डूकमोम” एट्टेर। 21 (आतोड एतेन्स गेड़े ती मेन्डान जाम्मा लोग आरू आन्नी मेन्डान बार देचेतेर पुन्न-पुन्न पाटेल वेनदान ले आगेर मारी आवूर नाती काम ती दिना काटाकपा मेन्डीर; आदूगी आय आटनी पोक्केर।)

अरीयूपगूस तो मिटलींग ती पोलूस केडीकतानो

22 तेबे पोलूस मिटलींग उन्डरान अरीयूपगूस एन्डान पाड ती लोगीन मुन्देल निलची किली, “ए एतेन्स गेड़ेत लोगीने! ईम जाम्मा पाटेग बोगवानीन निक्के मानूरानोर आय एनी आन चूड़ूमेन। 23 एटे एनोड आन इम गेड़े ती चुल्लेक, ईम सेवा चाजूरान मुरीतूलीन चूड़रीन आरू ओक जेतरा पाड ती ‘पूना बोगवानूग’ एनी लिका मेन्डान पोद्दूलीन बेले बेटेन। ईम पूनाका मोड़कूमोर जे? ओन इसाबीन एबे आन इमीन वेनपीकतान।”

24 “ई मोंजीपूरीन आरू इना मेन्डान जाम्मा बानीलीन गेड़रान मापोरबू, सरग आरू मोंजीपूर तो मालीक आय। आदूग ओड केय्योड काटरान गुडील ती मेनाडा। 25 आरू मांजा ओनूग सेवा चाजी किली चियरानो नाती ओनूग लागाया। ओडी आय जियोम आरू नेञूकूड आरू मांजेग लागूरान जाम्मेनी चियरानेड। 26 ओड ओक मांजेन कान तीग जाम्मा देचेल-देचेल तो मांजाकूलीन, ओर गुलाय मोंजीपूर ती पीयकेर एनी गेड़ेड नाड। आरू मुन्नीत ले ओड ओरूग पीयू बेरेन आरू मेनूंग पाडकूलीन बेले तेबाकतेड नाड। 27 ओड ईटे चाजी किली मांजा मापोरबून कानची किली टामडी-टामडी बेले बेटेकेर एनी बिचार चाजेड, एरोड बेले ओड आम्म एर ले ई कोमाड चिल्लाड। 28 एटे एनोड आम ओन तीगी जियोम मेन्डाम आरू चेला बुला एरी किली बेरकेच बेले मेनमोम। इमीन काटावूल पोकरान ओदो काटावतेर, ‘आमी गो आय ओन चिन्डूल पापकूल’ एनी पोक्केर नार।”

29 “आदूगी आम मापोरबून पापकूल मेन्नी किली, मांजा तान्न आकेल ती चाजूरान सोन चिलाड चान्दी चिलाड केल्ल तो मुरीतीन आकाट मापोरबू मेन्डाड एनी चोमजूरानो एरा। 30 आदूगी मुन्नी मांजाकूल तानीन पूना वादेक मापोरबू आदीन चुरते ती इडेडा, एरोड एपोर गुलाय मेन्डान जाम्मा मांजेन मेन्नीन उजराकपूर एनी तियारूकमेड। 31 एटे एनोड ओड तान आची मेन्डान ओक मांजेन तीग ई गुलाय मोंजीपूर तो लोगीन देरोमोड नियाव चाजू एनी ओक दिनेन नीतीकतेड नाड। आरू आ मांजेन चाय्यरान कान तीग जियोम पाटतीक किली जाम्मा लोगीन चेत्त टोटीकतेड नाड” एट्टेड।

32 मापोरबू मेनगेरीन जियोम पाटतीकतान इसाबीन पोलूस पोकरानोन वेन्नी किली ओदेर ओनीन आँसी डेकली पाटा ऊबू मुरीयाकतेर। आरू ओदेर एके, “आम इन पोकरान पाटेलीन मारी एतोड बेले वेनदाम” एट्टेर। 33 आदूग पोलूस मिटलींग तीग पेतेड। 34 एरोड ओदो माईल ओनोन बिसवात चाजी किली ओन चेलालेर एञ्ञेर। ओर कान तीग अरीयूपगूस एन्डान मान्देत दियूनूसीयूस एन्डानेड ओकूर आरू दमरीस पिदीर तो ओक आयाल आरू ओर चेंगे मारी बेले लोग मेन्डीर।