पोरबू 16

पोलूस तिमूतीयूसीन चेंग पातरानो

1 आनातले पोलूस दिरबे गेड़े ती चेनी किली लुसतेरा गेड़े ती एदेड। आना तिमूतीयूस पिदीर तो ओक बिसवासी मांजा मेन्डीड। ओन ईय्या ईसून बिसवात चाजूरान ओक एऊदी आयाल मेट्टो। एरोड ओन बुवा एके युनानी जातीतेड मेट्टेड। 2 लुसतेरा आरू इकूनीयूम गेड़ेल ती मेन्डान जाम्मा बिसवासी लोग तिमूतीयूसीन बीतेर ती रेच्चा पोकरीर। 3 पोलूस तिमूतीयूसीन तान्न चेंगे उय्यू कानतीड। आदूग ओड एऊदीकूलीन जियोम चोमजोको एनी ओनीन जियोम पाड तो तीप तोलीन कुड्डू इट्टेड। एटे एनोड तिमूतीयूसीन बुवा युनानी आय एनी आना मेन्डान एऊदीकूल जाम्मा पुन्दीर। 4 ओर गेड़ेल-गेड़ेल ती चुल चुल्ली चेनेक एरूसेलेम तो सियानकूल आरू पोरबू नीतीकतानेर ओकती चोर ती, बिसवासी लोगूग चियरान नीतीलीन वेनपीक किली आदीन मानूर एनी पोक पोकी चेन्डीर। 5 आदूग पोरबून बिसवात चाजूरान मान्देल तो लोग ताम बिसवात चाजूरान कान बेरकेच एञ्ञेर आरू रोजे बिसवासी लोग चान्दारे चेन्डेर।

पोलूस मकीदूनीया देचेत मांजेन देरसेन ती चूड़रानो

6 पोलूसकूल पुरूगीया आरू गलतीया देचेल पावोड चेन्डेर। एटे एनोड नाती केचूर चिला जियोम ओरीन आसीया देचे ती ईसून पाटेन मेरचीक इडेडा। 7 ओर मूसीया देचा लेग्गे एदी किली, बितूनीये ती चेनूंग बिचार चाजेर; एरोड ईसून नाती केचूर चिला जियोम एके ओरीन चेनूंग इडेडा। 8 आदूग ओर मूसीया देचे ती चुल्ली किली तोरोआस गेड़े ती वेञ्ञेर। आना आन, लूका ओर चेंगे बीड़ेन। 9 आरू आना पोलूस आ चिरीक चित्ता तान्न देरसेन ती मकीदूनीया देचेत ओक मांजा वेरी किली “आकलाट आड़ञी किली मकीदूनीये ती वेर आरू आमूंग चेंग चिय” एनी गुवारतानोन चूड़ेड। 10 पोलूस ईटे केलायूरानूग आम तुरते नी मापोरबू आनात लोगूग एडो पाटेन पोक चियू कूयूमेड एनी चोमजोम आरू मकीदूनीये ती चेन्डान बिचार चाजोम।

पिलीप्पी ती लुदीयेन जियोम बादलूरानो

11 आदूग तोरोआस तीग आम नीर-जाज चोक्की किली टिट्टे सुमातरा डिपके ती एदोम आरू पिटतेल तो चिरीक नियापूलीस गेड़े ती वेञ्ञोम। 12 आर्र तीग आम पिलीप्पी गेड़े ती एदोम। आद मकीदूनीया देचेत मुकीयाट आरू रोमी देचेतेर डेरा मेन्डान गेड़ा आय। आना ओदो दिनेल आर्रे मेट्टोम। 13 एरू नाम्बीकता, गेड़े तीग बाटतेल पेरेड कुडी एऊदीकूल बिन्ती जोड़ू उलजूरान पाड मेन्डा एनी बिचार चाजूरूम। आदूग पाबूरान चिरीक आम आना चेन्डोम। आरू आना उन्डी किली उलजी मेन्डूव आ आयचीलोड ऊबू मुरीयाकतोम। 14 आना वेनदानोवीन कान तीग तुआतीरा पिदीर तो गेड़ेत लुदीया पिदीर तो ओकाल आयाल मेन्डू। आद काकान्ड रेंग तो निक्के मोल्लेत गान्डेल बेबार चाजूरान आयाल आय। आद मापोरबून मानूरू। आद पोलूसीन पाटेलीन मेन्न तीग वेन्नी किली आवीन पातीयाक पोरबू आदूग मेन्न चिञ्ञेड। 15 आनातले आद आरू तान्न ओलेक तो लोग बपतीसमा एतानूग, आद आमीन “ईम आनीन चेत्ते पोरबून बिसवात चाजूरान आयाल एनी चोमजूमोर एरोड, चार्र आम्म कान मेनूर” एनी किली बेरपेला उञ्ञो।

पोलूस आरू सिलास जेल ती

16 ओकेच आम बिन्ती जोड़रान पाड तेल चेनेक ओक कामीयाट मालीन बेटोम। आदीन चुम्मी मेन्डान बूत डुमा पिटतेल एर्रानोन आ मालीन पोक्कीकतू। आद आटनी पोक पोकी तान्न सावकारकूलूग कुबे पोयसेल कामाक चियरू। 17 आद पोलूस आरू आम पोटतेल वेरी किली, “ई मांजाकूल पोडीत बेड़तो मापोरबून कामीयालेर आय, ऊर आमीन बाचाक एर्रान इसाब तो पावीन बीतेर ती पोक चियरार” एनी कोलार एरी किली पोकोतो। 18 आद कुबे दिनेल आर्रे आटनी पोक पोक्की मेट्टो। एरोड चेरा चेरी पोलूस बिर बिरा एञ्ञेड आरू उलटी चूड़ी किली आ बूत डुमेन, “ईसू पिदीर तीग आन इनीन ई मालीन कान तीग वाल पेक एनी तियारूकमेन” एट्टेड। आरू आद आयची बेरा आदीन कान तीग वाल पेची चेन्डो।

19 आनातले तामूंग टोन्डूरान पोयसेल एपोर टोन्डावा बे एनी आ कामीयाटीन सावकारकूल चोमजेर आरू ओर पोलूस आरू सिलासीन चुम्मेर आरू टान्ड टान्डी आट पाचरे ती आदीकारीकूल उलजूरानेल उञ्ञेर। 20 आरू ओर ओरीन गेड़ेत मुकीयालेर लेग्गाट उञ्ञेर आरू “ऊर एऊदीकूल आय आरू आम्म गेड़ेत लोगीन निक्के कुरलाकमेर। 21 आरू आम्म रोमीकूल नीती ती बाना आरू मानू एरा कियाल तो आरू चेला इसाबूलीन केडीकमेर” एट्टेर।

22 तेबे जोप तो लोग ओर चेंगे बिड़ी किली ओर पोडे चुलतेर। गेड़ेत मुकीयालेर एके ओर गान्डेलीन चीकू आरू कोड़ेलोड चाडूक तियारतेर। 23 ओर ओरीन कोड़ेलोड निक्के चाटतान पिटतेल जेल बीतराम केडूक इट्टेर आरू जेल ओलेक तो सियानीन ओरीन रेच्चा राका चाजू तियारतेर। 24 आटनी तियारतानूग ओड ओरीन बीतराम तो बाकरे ती उय्यी किली ओर केलूलीन बेड़तो कोटले ती काटकेड।

पोलूस आरू सिलासीन जेल तीग पुचरानो

25 आ चिरीक नेनदूनाल ती आकाट पोलूस आरू सिलास बिन्ती जोड़ी किली मापोरबूग पाटेल पाडूरीर। आवूर तो केयदीकूल ओरोन वेनदीर। 26 आतोडी उदापड़े नेन्दील मेलोतो; आद जेल ओलेक तो पायेन ऊचीकतो। आरू तुरते नी जेल तो कापाटूल चानची एञ्ञोव आरू केयदीकूलीन चिकरील ओर कान तीग कुयंगोव। 27 जेल ओलेक तो सियान चेतेड आरू वेलूल चानची एरी मेन्डानोन चूड़ी किली केयदीकूल जाम्मा तूलेर नार एनी बिचार चाजेड। आदूग ओड तान्न कान्डेन पुच्ची किली तानीन तानी आनकीक कानतीड। 28 एरोड पोलूस एके डागा चियी किली, “इनीन ईनी नोकसान एरीकमेन, आम जाम्मा इन्नी मेन्डाम” एट्टेड। 29 तेबे जेल ओलेक तो सियान दियेन एन्दरू तियारची किली जेटके बीतराम चेन्डेड आरू तिरी-तिरी पोलूस आरू सिलासीन केलूल पाट्टेड। 30 आरू ओड ओरीन वाल पुच्ची किली, “ए सियानकूले! आनूंग पापदेरोमीन काबजे तीग बाचू नातो चाजूरानो आय?” एट्टेड। 31 आदूग ओर, “पोरबू ईसून कान बिसवात चाज, तेबे ईन आरू इन कुटूम तो लोग पापदेरोमीन काबजे तीग बाचूरार” एट्टेर। 32 आरू ओर ओनीन आरू ओन ओलेक तो जाम्मा लोगीन बेले पोरबून पोद्दीन मेरचीकतेर। 33 आ चिरीक चित्ता आयची बेरा जेल ओलेक तो सियान ओरीन उय्यी किली ओर गावेलीन नोडीकतेड आरू ओड आरू ओन ओलेक तो लोग जाम्मा तुरते नी बपतीसमा एतेर। 34 तेबे ओड पोलूस आरू सिलासीन तान्न ओलेक उय्यी किली तितीकतेड, उनतीकतेड। आरू ओड आरू ओन कुटूम तो लोग जाम्मा मापोरबून बिसवात चाजूरानूग निक्के वेड़का एञ्ञेर।

35 पोका वेवूरानूग गेड़ेत मुकीयालेर, ओरीन चाय काडूर एनी पालटेनकूल केय्य तीग काबेर चोटतेर। 36 आदूग जेल ओलेक तो सियान आ पाटेन पोलूसीन “मुकीयालेर इनीन आरू सिलासीन चाय काडूर एट्टेर नार। आदूगी एपोर पेची किली चुक ती चेनूर” एट्टेड।

37 एरोड पोलूस पालटेनकूलीन, “ओर आम रोमी देचेतोम मेनोड बेले, जाच आडाका लोगीन मुन्देल चाटतेर आरू जेल ती केटपीकतेर आरू एपोट कुचनाय चायू कान्डूकमेर काय एटे? आटे एराया। ओरी वेरी किली आमीन वाल पुचेकेर” एट्टेड।

38 पालटेनकूल ई पाटेलीन मुकीयालेरीन पोक्केर। आदूग ओर पोलूस आरू सिलास रोमी देचेतेर आय एनी वेन्नी किली नारचेर। 39 आदूग ओर वेरी किली ओरीन बोरीयाकतेर आरू जेल तीग वाल पुच्ची किली गेड़े तीग चेनूर एनी गुवारतेर। 40 पोलूस आरू सिलास जेल तीग पेची किली लुदीयेन ओलेक ती चेन्डेर आरू आना ओर ईसून बिसवासी लोगीन बेट गाट एरी किली उचांग चिञ्ञेर आरू पाव आत्तेर।