पोरबू 10

कुरनेलीयूस पतरसीन कूयूरानो

1 केसरीया गेड़े ती कुरनेलीयूस पिदीरतेड ओकूर मेन्डीड। ओड इतालीयानी पिदीर तो चोव गोटा पालटेनकूल मान्देन मुकीयाल मेन्डीड। 2 ओड आरू ओन कुटूम तो जाम्मा ई लोग देरोम ती चेलानेर आरू मापोरबून मानूरानेर मेन्डीर। ओड नाती चिला एऊदीकूलूग निक्के नातीन एरको चियरीड। ओड एऊदी एरा, एरोड बेले एतोड एरको मापोरबून बिन्ती जोड़रीड। 3 ओकेच आड़ बेरा आकाट ओड देरसेन चूड़ेड। मापोरबून ओक सरग दूत ओन लेग्गाट वेरी किली ओनूग देका पाट्टेड आरू “ए कुरनेलीयूस!” एट्टेड। 4 ओड ओनीन नेंजराक किली चूड़ेड आरू नारची किली सरग दूतीन, “ए पोरबू नाताय?” एट्टेड। आदूग ओड ओनीन, “इन बिन्तील आरू ईन नाती चिला लोगूग चियरानोव मापोरबून मुन्देल एदोव नाव आरू ओड इनीन चुरते ती पात्तेड नाड। 5 आरू एपोर यापे ती ओदो लोगीन चोटची किली सिमोन एन्डान पतरसीन कूयू इड। 6 ओड सोमून्द कुडी मेन्डान तोलूल तो बेबार चाजूरान सिमोनीन कान चेगेय मेन्डाड” एट्टेड। 7 आनातले तान्नोड ऊबूरीड आ सरग दूत चेन्डानूग, ओड तान्न इरूल कामीयालेरीन आरू तानीन देक रेक चाजूरान पालटेनकूल कान तीग मापोरबून मानूरान ओक पालटेनीन कूयेड। 8 आरू ओरीन जाम्मा पाटेलीन पोक्की किली यापे ती चोटतेड।

पतरस देरसेन चूड़रानो

9 पिटतेल तो चिरीक टिटे देलकूल ती आकाट, ओर पाव ताक ताकी गेड़ा लेग्गाट एदेर। आतोड पतरस पोडीत बाकरे ती बिन्ती जोड़ू चोत्तेड। 10 ओनूग आन्डोतो, आदूग नातीन बेले तिनूंग कानतीड। एरोड ओनूग रान्दा तायार एरेक ओड चुरता चिला कियाल एरी किली देरसेन चूड़ू मुरीयाकतेड। 11 आ देरसेन ती ओड सरग चानची एर्रानोन, आरू ओक बेड़तो चेदेरीन आकाट तो नालू टोकूल ती काटकी किली मोंजीपूर ती इड़ूरानोन चूड़ेड। 12 आना मोंजीपूर तो जाम्मा नालू केलूलतोव आरू रेंगूरान जियादूल आरू बादोर ती वेल्लान तीतेल मेन्डूव। 13 आनातले ओनूग, “ए पतरस चुलूक, आरू ताप्पी किली तिन” एन्डान पोल्ला वेनूंग एञ्ञो। 14 एरोड पतरस एके, “एरा पोरबू, एतोडी एरा, आन एतोडी बेले मूसाल नीती ती बानायोन आरू मांजेन चूत चाजूरान बानीन तिनानी” एट्टेड। 15 आरू “मापोरबू ओगराक मेन्डान नातोन एरको ईन चूत पाडरानोव आय एनमेन” एन्डान पोल्लेन मारी वेट्टेड। 16 आटनी मुप्पोट एञ्ञो। आनातले तुरते नी आ चेदेर पोडी सरग ती एतीक एञ्ञो। 17 ई देरसेनीन नातो इसाब ती चूड़ेन एनी पतरसूग बिचार चुम्मी मेनेक, कुरनेलीयूस चोटची मेन्डानेर, सिमोनीन ओलेक तो पाता जाच आडी-आडी ओन ओलेक वेल ती एदी किली निलतेर। 18 आरू ओर कूयी किली “एटे सिमोन पतरस एन्डानेड इन्नी चेगा मेन्डाड काय एटे?” एनी जाच आड़ेर।

19 पतरस देरसेनीन इसाब ती बिचार चाज चाजी मेनेक, मापोरबून जियोम ओनीन, “ए सिमोन! मूवीर इनीन कान्डूकमेर। 20 चुलूक किड़ी इड़ू आरू नारचाका ओरोड चेन। एटे एनोड आन आय ओरीन चोटतेन नान” एट्टेड। 21 तेबे पतरस किड़ीत बाकरे ती इड़ेड आरू वेरी मेन्डीर आ लोगीन, “ईम कानतान मांजा आनी आय। नांग आय ईम वेञ्ञोर नार?” एट्टेड। 22 ओर, “चोव गोटा पालटेनकूल सियान कुरनेलीयूस आय आमीन चोटतेड नाड। ओड देरमी आरू मापोरबून मानूरानेड आय। एऊदीकूल जाम्मा ओनीन रेच्चा इजीत मानूरार। नाती केचूर चिला सरग दूत ओनूग देका पाट्टेड आरू इनीन ओन ओलेक कूय, तेबे ईन पोकरानोन ओनूग वेनूंग एर्रा एट्टेड” एनी ओर पोक्केर। 23 तेबे पतरस ओरीन बीतराम कूयेड आरू तेबाकतेड। पिटतेल तो चिरीक पतरस पेची किली ओर चेंगे चेन्डेड। यापेत ओदो बिसवासी लोग बेले ओर चेंगे चेन्डेर।

कुरनेलीयूसीन ओलेक ती पतरस

24 पिटतेल तो चिरीक ओर केसरीये ती एदेर आरू कुरनेलीयूस तान्न कुटूम तो लोगीन आरू तान्न चेंगाटतेरीन उड़चीक किली ओन पाव चूड़रीड। 25 पतरस बीतराम वेरेक, कुरनेलीयूस ओनोड बेट गाट एञ्ञेड, आरू ओन केलूल पाड्डी किली ओनीन जुवारतेड। 26 एरोड पतरस ओनीन, “चुलूक। आन बेले इन आकाट तो ई मांजा आय” एनी किली ओनीन चुनतीकतेड। 27 आरू पतरस कुरनेलीयूसीनोड ऊब ऊबी ओलेक बीतराम तान्नेड, आरू आना कुबे लोग उलजी मेन्डानोन चूड़ी किली, 28 पतरस ओरीन, “एऊदीकूल चिला देचेल-देचेल तो लोगोड मिलानो चिलाड ओर ओलेक ती तानरानो एऊदीकूलूग बानाया एनी ईम रेच्चा पुट्टोर, एरोड मापोरबू आनीन ईन एरीनी पापीयालेर चिलाड चूत पाडरानेर आय एनी पोकूमेन एनी पोक्केड। 29 आदूगी आय ईम आनीन वेरकेड एन्डानूग आन नानी एनाका वेञ्ञेन। एपोर ईम आनीन नातो कामूग कूयोर नार? एनी आन जाच आडूमेन” एट्टेड। 30 आदूग कुरनेलीयूस ओनीन, “नेलचीच मुन्नी आन, आन्न ओलेक ती इत्तोडी, आड़ बेरा बिन्ती जोड़रीन आरू उदापड़े ओकूर मेडूरान गान्डेल नूड़रानेड आन्न मुन्देल वेरी किली निलतेड। 31 आरू ‘ए कुरनेलीयूसीने! इन बिन्तीन वेनदानो मेन्डा, आरू ईन नाती चिला लोगूग इनाम चियरानोन मापोरबून मुन्देल चुरता चाजूरानो मेन्डा। 32 आदूगी एरीन बेले यापे ती चोटची किली सिमोन एन्डान पतरसीन कूयी एन्दरू इड। ओड सोमून्द कुडी, तोलूल तो बेबार चाजूरान सिमोनीन कान चेगेय मेन्डाड’ एट्टेड 33 तेबे आन तुरते नी लोगीन इन्नेल चोटतेन आरू ईन वेर्रानूग रेच्चा एञ्ञो। एपोर पोरबू इनीन नान-नान एट्टेड नाड आदीन वेनूंग आय, आम जाम्मा इना मापोरबून मुन्देल उलजोम नाम” एट्टेड।

पतरस केडीकतानो

34 तेबे पतरस ईटे पोक्कू मुरीयाकतेड: “एपोर मापोरबूग जाम्मा ई लोग ओकती काटारतेर आय एनी आनूंग चेत्त एञ्ञो; 35 आरू आरो देचेल-देचेल तो लोग एरको ओनूग नारचोड आरू देरोम तो काम चाजोड, ओरीन पोरबू मेन्न चाजूराड। 36 ईसू जाम्मा लोगीन पोरबू आय। ओड मापोरबूनोड लोगीन, मिला मिसा चाजूराड। ई एडो पाटेन पारगाक किली इसराएल तो लोगूग मापोरबू चोटतान काबेरीन ईम पुट्टोर। 37 बपतीसमा चियरान एऊना केडीकतान पिटतेल गलील तीग पात्ती जाम्मा एऊदी देचे ती एर्रानोन ईम पुट्टोर। 38 मापोरबू नासरत तो ईसूग एटे नाती केचूर चिला जियोमीन चियी किली आचेड आरू ताकोतीन चिञ्ञेड आरू ओड गुलाय चुरली किली एटे रेच्चाट कामूल चाजेड आरू चेयतानीन ताकोत ती मेन्डान लोगीन जाम्मेनी उजराकतेड एनी ईम पुट्टोर। मापोरबू ओन चेंगे मेन्डानूग ओड आवीन चाजेड। 39 ओड एऊदीकूल देचे ती आरू एरूसेलेम ती चाजूरानोन आम चूड़ोम नाम। ओर ओनीन कुरूस पारे ती कूटील कोट्टी किली आनकीकतेर। 40 एरोड मापोरबू एके ओनीन मुचीच ती चाय्यरान कान तीग मारी जियोम पाटतीकतेड आरू ओनीन देका बेले पाटतीकतेड। 41 जाम्मा लोग ओनीन चूड़ेरा। एरोड मापोरबू मुन्नी आची मेन्डान गोवाईतेर ओनीन चूड़ेर। आ गोवाईतेर आमी आय। ओड जियोम पाडरान पिटतेल आम ओन चेंगे तिन्दोम उन्डोम। 42 ओडी आय आमीन, ई एडो पाटेन जाम्मा लोगीन वेनपीकपूर आरू आनीनी आय मापोरबू, जियोम मेन्डानेर आरू मेनगेरीन नियाव चाजूरानेड नीतीकतेड नाड एनी गोवाई चियूर एनी तियारतेड नाड। 43 ओन पिदीर ती ताकोत मेन्डानूग, एड एरको ओनीन बिसवात चाजूरानेरूग, ओर पापदेरोमूल माप एर्राव एनी मापोरबून कान तीग काबेर वेन्नी किली लोगीन पोक चियरान जाम्मा गुरूकूल बेले गोवाई चिञ्ञेर नार” एनी पतरस केडीकतेड।

एऊदीकूल चिला लोगीन कान नाती केचूर चिला जियोम इड़ूरानो

44 पतरस ई पाटेलीन पोक पोक्की मेनेक नाती केचूर चिला जियोम ओन पाटेलीन वेनदानेर कान इड़ेड। 45 आरू एऊदीकूल कान तीग बिसवात चाजूरानेर बेले पतरसीन चेंगे वेरी मेन्डीर, ओर एऊदीकूल चिला आवूर जातीतेर बेले नाती केचूर चिला जियोमीन इनामीन चेड़ीगेन बेटेर एनी काबा एञ्ञेर। 46 एटे एनोड ओर ओरीन आवूर-आवूर पाटेल ती ऊबूरानोन आरू मापोरबून जुवार पोकरानोन वेट्टेर। आनातले पतरस, 47 “ऊर आम्म आकाट नाती केचूर चिला जियोमीन बेटेर नार, आदूगी एडी बेले ऊरीन नीरोड बपतीसमा एक आटकाक ओड़ार” एट्टेड। 48 आरू पतरस ओरूग ईसू मसीयालीन पिदीर पात्ती किली बपतीसमा चियूर एनी तियारतेड। आनातले ओर पतरसीन, “मारी इरने मुच्चीच बेले तेबाता नांग” एनी गुवारतेर।