पोरबू 9

साऊलीन जियोम बादलूरानो

1 आतोड साऊल पोरबून बिसवासी लोगीन आनकीकतान एनी नारपीक-नारपीक मेन्डीड। ओड मुकीयाल पेलाचीन का चेन्डेड; 2 आरू ईसू मेरचीक मेन्डान पाव ती चेल्लान दमीसक तो माईंड चिन्ड चिलाड आयाच पारनेन, एरीन एरको बेट गाट एरोड, ओरीन चुम्मी एरूसेलेम ती एन्दरू, दमीसक तो एऊदीकूल बिन्ती जोड़रान ओलेकूल तो सियानकूलूग चिट्टील आडेड। 3 एरोड ओड आरू ओन चेंगेतेर दमीसक लेग्गाट एदूरानूग उदापड़े सरग तीग ओक विलीज वेरी किली ओन बोँरेक मेडोतो। 4 आरू ओड नेन्दील ती उरकेड। आरू “साऊल, ए साऊल, ईन आनीन नांग सताकमोत?” एन्डान पोल्लेन वेट्टेड। 5 आदूग साऊल, “ए पोरबू ईन एड आय” एनी जाच आडेड। आदूग ओड, “आन ईन सताकमोत जे? आयची ईसू आय। 6 एरोड एपोर ईन चुलूक आरू गेड़ा बीतराम चेन। आना ईन नातो चाजूरानो आय एनी आन ओकूरीन इनीन पोक्कीक इडरान” एट्टेड। 7 तेबे साऊलीन चेंगे मेन्डानेर बेले काबा एरी किटूक पाट्टेर। आरू ओर पोल्लेन गो वेट्टेर एरोड एरीनी चूड़ेरा। 8 आनातले साऊल नेन्दील तीग चुलतेड, एरोड ओन नेंजेरूग नाती देका पाडोया। आरू ओर ओनीन आंगवा पात्तेर आरू दमीसक ती उञ्ञेर। 9 आरू ओड मुचीच आर्रे कानाल मेन्डीड आरू नाती नी तिना मेन्डीड आरू उना मेन्डीड। 10 दमीसक ती आननीया पिदीर तो ओक बिसवासी मेन्डीड। पोरबू ओनीन देरसेन ती देका पाडी किली, “ए आननीया!” एट्टेड। आदूग आननीया “ओ पोरबू” एट्टेड। 11 तेबे पोरबू ओनीन, “चुलूक आरू टिट्टाट पिदीर तो सेड़ेक मेन्डान राचेकेल चेन। आना एऊदेन ओलेक ती तरसूस तो साऊल आरे मेन्डाड एनी जाच आडू। एटे एनोड ओड एबे बिन्ती जोड़ूमेड। 12 आरू ओड आननीया पिदीर तो मांजा वेरी किली तान्न तेल्ल ती टोड्डी किली तानीन चूड़पीकतानोन देरसेन ती चूड़ेड नाड” एनी पोक्केड। 13 आदूग आननीया, “ए पोरबू! आन आ मांजेन बीतेर ती पोकरानोन कुबे वेट्टेन नान। ओड एरूसेलेम ती मापोरबू तानूंग एलगाक मेन्डान लोगीन निक्के आबोड़ चिञ्ञेड नाड गे। 14 आरू इना बेले इन पिदीरीन पातरान लोगीन काटकी किली उयरान पान्नीन बेड़कूल पेलाचकूल कान तीग बेटी किली वेञ्ञेड नाड” एट्टेड। 15 एरोड पोरबू ओनीन, “ईन चेन। एटे एनोड, ओड आन्न पिदीरीन एऊदीकूल चिलायेरीन, ओर कोसकूलीन आरू इसराएली लोगीन वेनपीक आन आचूरानेड आय। 16 आरू ओड आन्न पिदीरीन चेत्तूग एट्टो-एट्टो आबोड़ूल बेटूरानो आय एनी आन ओनीन टोटीक चियरान” एट्टेड। 17 आटनी एन्डानूग आननीया आ ओलेक ती चेन्डेड, आरू ओलेक बीतराम तान्नी किली ओन तेल्ल ती टोड्डी किली, “ए साऊल दादा! पोरबू ईसू ईन वेर्रूत आ पाव ती देका पाड्डी मेन्डीड। ओडी आनीन इनूंग मारी चूड़ू एरको आरू इन पोडे नाती केचूर चिला जियोमीन ताकोत इड़ोको एनी चोटतेड नाड” एट्टेड। 18 आरू आटनी एनेक तुरते नी मिना चेचरूकूल आकाट तोव साऊलीन बोम्मेल तीग उरकोव आरू ओड मारी चूड़ू मुरीयाकतेड। ओड चुलची किली बपतीसमा एतेड। 19 आनातले ओड तिन्देड आरू ओनूग मारी लाव वेञ्ञो।

दमीसक ती साऊल केडीकतानो

आरू साऊल कुबे दिनेत्तार्रे दमीसक तो बिसवासी लोगीन चेंगे मेट्टेड। 20 आरू साऊल तुरते नी एऊदीकूल बिन्ती जोड़रान ओलेकूल ती, ईसू आय मापोरबून चिन्ड एनी केडीक मुरीयाकतेड। 21 ओड मेरचीकतानोन वेनदानेर जाम्मा ई काबा एरी किली, “ऊडी आय एरूसेलेम ती ईसून पिदीरीन पातीयाकतानेरीन आनकीकतीड चिला? आरू इना बेले ई पिदीरीन पातीयाकतानेरीन काटकी किली बेड़कूल पेलाचकूल कान उय्यू वेरी मेन्डीड। ओडी एरा आदूग?” एट्टेर। 22 एरोड साऊल तान केडीकतान पाटे ती निक्के बेरकेच एरारे चेन्डेड, आरू ईसू ई आय एनी चेत्त टोटीकतेड। आरू दमीसक ती मेन्डान एऊदीकूल ओड पोकरान पाटेन विरूद ती नातो एरको पोक्कू ओड़ा कियाल बुदी बूलकाक एरी मेन्डीर।

साऊल एऊदीकूल कान तीग बाची तूल्लानो

23 आनातले कुबे दिनेल एर्रानूग, एऊदीकूल उलजी किली ओनीन आनकीक उवाट चाजेर। 24 एरोड ओर उवाटूल साऊलूग पाता चेलोव। ओर ओनीन आनकीक चित्ता आरू पाकटा गात चुम्मी किली गेड़ेत कापाटूल ती राका मेन्डीर। 25 एरोड चित्ता ओन बिसवासी लोग ओनीन ओक पूने ती तुन्दीकतेर आरू गेड़ेत बीतीत बोत्ते तीग वाल इड़कीकतेर।

एरूसेलेम ती साऊल

26 आनातले साऊल एरूसेलेम ती एदी किली आवूर बिसवासी लोगीन चेंगे मिसू कानतीड। एरोड ऊड बेले चेलाल आय एनी ओरूग बिसवात एरा कान्डूग, जाम्मा ई ओनोड नारचूरीर। 27 एरोड बरनबास तान्न चेंगे ओनीन, पोरबू नीतीकतानेर लेग्गाट उय्यी किली साऊल पाव ताकेक पोरबून एटे चूड़ेड आरू पोरबू ओनोड एटे ऊबेड, आनातले दमीसक ती ऊड डाडू चाजी किली ईसून पिदीर ती एटे केडीकतेड एनी ओरीन चोमजाकतेड। 28 आरू साऊल ओर चेंगे एरूसेलेम ती वेरी चेनी मेट्टेड। आरू डाडू चाजी किली पोरबून पिदीर ती केडीकतीड। 29 आरू युनानी पाटा ऊबूरान एऊदीकूलोड बेले ईसून बीतेर ती ऊबूरीड आरू पोका पोक्की एर्रीड। एरोड ओर एके ओनीन आनकीक कानतीर। 30 एरोड आदीन पुन्नी किली बिसवासी लोग साऊलीन केसरीये ती उञ्ञेर आरू तरसूस ती चोटतेर।

31 आतोड गुलाय एऊदीया, गलील, आरू सामरीयेत पोरबून बिसवात चाजूरान मान्देल तो लोग मिलेन ती मेट्टेर आरू बेरकेच एञ्ञेर। आरू ओर पोरबूग नारची किली नाती केचूर चिला जियोमीन तीग उचांग बेटी किली चान्दारे चेन्डेर।

पतरस एनीयासीन उजराकतानो

32 आनातले पतरस गुलाय चुरली किली मापोरबू तानूंग एलगाक मेन्डान लोगीन बेट गाट एरू लिद्दा गेड़े ती चेन्डेड। 33 आना ओनोड एनीयास पिदीर तो लकवा बेमार चुम्मी मेन्डानेड ओकूर बेट गाट एञ्ञेड। ओड आँट बेरेक ले चाट्टे तीग चुलपा मेन्डीड। 34 पतरस ओनीन, “ए एनीयास! ईसू मसीयाल इनीन उजराकमेड। चुलूक आरू इन चाट्टेन चुनतीक” एट्टेड। तेबे एनीयास तुरते नी चुलची किली निलतेड। 35 तेबे लिद्दा आरू सारोन गेड़ेल ती मेन्डानेर जाम्मा ई, ओनीन चूड़ेर आरू पोरबून पातीयाकतानेर एञ्ञेर।

पतरस तबीतेन जियोम पाटतीकतानो

36 यापा गेड़े ती तबीता एन्डान पिदीर तो (युनानी पाटे ती दोरकास चिलाड ऊड़ूप आय) बिसवासी आयाल ओकाल मेन्डू। आद तान एतोड एरको रेच्चा ई चाजी आरू चिला लोगूग नातीन एरको चियरू। 37 आतोड आ आयाल एके नोयकूड ती पाट्टो आरू चाय्य चेन्डो। आदीन मोड़ीन नीर मीयीक किली ओलेक तो पोडीत बाकरे ती इड्डी मेन्डीर। 38 लिद्दा यापे तीग लेग्गेनी मेन्डू। आदूग बिसवासी लोग, पतरस आना मेन्डाड एनी पुन्नी किली, “आम्म लेग्गाट जेटके वेर” एनी इरूलीन काबेर चोटतेर। 39 आटनी एन्डानूग पतरस ओर चेंगे चेन्डेड आरू ओड एदूरानूग, ओनीन पोडीत बाकरे ती उञ्ञेर। जाम्मा केटाचील ओन बोँरेक निलची किली, आड़ आड़ी, दोरकास जियोम मेनेक चाजी किली चियरान कुड़तेल गान्डेलीन टोटीकतूव। 40 तेबे पतरस जाम्मा लोगीन वाल पुच्चेड, आरू माटीकूटेल चियी किली बिन्ती जोड़ेड। आरू मोड़ीन टिटाक चूड़ी किली, “ए तबीता चुलूक” एट्टेड। तेबे आद तान्न बोम्मेग कान्न नान्डोतो आरू पतरसीन चूड़ी किली चुलतो आरू उन्डोतो। 41 तेबे पतरस लेग्गे चेन्डेड आरू आदीन तान्न केय्योड चुनतीकतेड। आनातले ओड मापोरबू तानूंग एलगाक मेन्डान लोगीन कान तीग तो केटाचीलीन कूयी किली आद जियोम मेन्डानोन टोटीकतेड। 42 ई पाटा गुलाय यापे ती पारगोतो आरू कुबे लोग पोरबून बिसवात चाजेर। 43 आरू पतरस यापे ती नी तोलूल तो बेबार चाजूरान सिमोनीन ओलेक ती कुबे कोम्बेर आर्रे मेट्टेड।