पोरबू 6

पोरबून बिसवासी लोगीन तितीकतान सात जान

1 आनातले पिटतेल बिसवासी लोग कुबे एञ्ञेर। आरू युनानी पाटा ऊबूरान एऊदीकूल, ताम्म केटाचीलूग रोजेत तिन्दान उन्डानो रेच्चा चियारा एनी इबरानी पाटा ऊबूरान एऊदीकूलोड बिर-बिरा एरू मुरीयाकतेर। 2 तेबे आटनी एर्रानूग बारा जान चेलालेर जाम्मा बिसवासी लोगीन उड़चीकतेर आरू ओरीन, “आमूंग मापोरबून पोद्दीन केडीकतान कामीन चायी किली लोगूग टोन्ड चियरान कामूल ती बिड़ी मेन्डानो रेच्चा एरा। 3 आदूगी, ए बायीयोवे आरू दादेरे! ईम इम कान तीग लोगीन नेंजेर ती देरमीकूल, नाती केचूर चिला जियोम तो ताकोत तीग कोप्पी मेन्डान आरू बुदी मेन्डान सात जानीन आचूर; तेबे आम्मोर ई कामीन ओरूग ओपीक चियू एर्रा। 4 आरू आमूंग बिन्ती जोड़रान कान आरू पोरबून पोद्दीन केडीकतान कान बिड़ी मेनूंग एर्रा” एट्टेर।

5 ई पाटा जाम्मा लोगूग मेन्न ती वेञ्ञो, आरू ओर रेच्चा बिसवात चाजूरान आरू नाती केचूर चिला जियोम तो ताकोत तीग कोप्पी मेन्डान इसतपूनूस पिदीर तो मांजेन, आरू पिलीपूस, पुरूकूरूस, निकानेर, तीमोन, परमीनास, आरू आवूर जाती तीग एऊदी देरोम ती बिड़रान आन्ताकीयेत नीकूलाऊसीन आचेर। 6 ओर ओरीन पोरबू नीतीकतानेर मुन्देल एन्दरेर आरू ऊर बिन्ती जोड़ी किली ओरीन आ काम ती लागाकतानोन टोटीक, ताम्म केय्यूलीन ओर तेल्ल ती इट्टेर। 7 आरू मापोरबून पोद्द पारगारे चेन्डो। आरू एरूसेलेम ती बिसवासी लोग निक्के चान्दारे चेन्डेर; आरू पेलाचकूलीन ओक बेड़तो जोप बिसवासी लोग एर चेन्डेर।

इसतपूनूसीन काटकी उयरानो

8 मापोरबून माया पेम तीग आरू ताकोत तीग इसतपूनूस लोगीन बेड़कूल-बेड़कूल आचरूत एरीकतान कामूल चाजेड आरू पोरलेत काम तो चिनेलीन टोटीकतीड। 9 तेबे लिबीरतीनेर एन्डान एऊदीकूल बिन्ती जोड़रान ओलेकतेर ओनोड पोका पोक्की एरू मुरीयाकतेर। ओर कुरेनी, सिकन्दरीया, किलीकीया गेड़ेल तीग आरू आसीया देचे तीग वेर्रान एऊदीकूल मेन्डीर। 10 एरोड नाती केचूर चिला जियोम इसतपूनूसूग बुदी चियरानूग ओन मुन्देल ओर ऊबू ओड़ेर।

11 आटनी एर्रानूग ओर ओदो लोगीन, “आम ऊनीन मूसाल आरू मापोरबून विरूद ती निन्दरूरानोन वेट्टोम नाम” एनकेर एनी कुचनाय उच उचाकतेर। 12 आटनी चाजी ओर लोगीन, सियानकूलीन आरू मूसाल नीतीन मेरचीकतानेरीन रिच एरीकतेर। आरू ओर इसतपूनूसीन चुम्मी किली एऊदीकूल पोँच मुन्देल एन्दरेर। 13 आरू “ऊड मापोरबू आची मेन्डान ई गुडीन, आरू मूसाल नीतीलीन विरूद ती मेरचीक मुरले चायाडा। 14 एटे एनोड ऊड नासरत तो ईसू, ई गुडीन बोसड़ाकताड, आरू मूसाल आमूंग चियी मेन्डान रीती रिवाजूलीन बादलूराड एन्डानोन वेट्टोम नाम” एनी पोक्की किली टेगरान गोवेतेरीन नीतीकतेर।

15 तेबे पोँच ती उन्डरानेर जाम्मा ई इसतपूनूसीन नेंजराक किली ओन मोकोम सरग दूतीन आकाट देका पाडरानोन चूड़ेर।