नाती केचूर चिला जियोम इड़ूरानो
2
1 पिन्तेकूसीनa दिने ती बिसवासी लोग जाम्मा ओकती पाड ती उलजी मेन्डीर।
2 आरू उदापड़े सरग तीग निक्के रुगराग-रुगराग वाल्ली आटरान आकाट तो पोल्ला वेनूंग एञ्ञो आरू ओर उन्डी मेन्डान ओलेक ती गेरजेन एर चेन्डो।
3 आनातले ओरूग किच्चीन आकाट तो नेवान्डूल देका पाट्टोव आरू आव पायची एरी किली ओकूर-ओकूरीन पोडे इड़ोव।
4 आनातले ओर जाम्मा नाती केचूर चिला जियोमीन ताकोत तीग कोप चेन्डेर।
आरू आ जियोम ओरीन ऊबीकतानूग ओर जार-जार पाटेल ऊबू मुरीयाकतेर।
5 आतोड एरूसेलेम ती मोंजीपूर तो देचेल-देचेल तीग वेर्रान मापोरबून पातीयाकतान एऊदीकूल तेबी मेन्डीर।
6 ओर,
आ पोल्लेन वेनी किली रून्डूरानूग,
आना निक्के जोप एञ्ञो।
आरू ओर “ऊर आम्म पाटेलीनी ऊबूमेर एन्डान आकाट वेनूंग एरमो” एनी बाकवा एञ्ञेर।
7 आरू ओर जाम्मा निरबे काबा एरी किली,
“इद रे।
ई जार-जार पाटेल ऊबूरानेर जाम्मा ई लोग गलीलतेर आय चिला?
8 मारी एटे तीग आम जाम्मा आपला-आपला जेनमूरान नेन्दील तो पाटेलीन ओर ऊबूरानोन वेनमोम।
इद एट्टो इसाब आय?”
एट्टेर।
9 “आम ओदेर पारतीतेर;
मेदीतेर;
एलामीतेर;
मिसूपूतामीयेतेर;
एऊदी देचेतेर;
कप्पदूकीयातेर;
पुन्तूसतेर आरू ओदेर आसीयेतेर।b
10-11 आरू पुरूगीयातेर,
पम्पूलीयातेर,
मिसरतेर,
आरू कुरेनी लेग्गे मेन्डान लिबीयातेर बेले मेन्डाम।
ई जाम्मा देचेल ती मेन्डानेर आरू रोमी गेड़ेतेर (एटे एनोड एऊदीकूल आरू एऊदी देरोम ती बिड़रानेर) बेले मेन्डाम।
करेतेतेर आरू अरबीतेर बेले मेन्डाम।
एरोड आपला-आपला पाटेल ती ओर मापोरबून आचरूत एरीकतान कामूलीन पोकरानोन वेनमोम” एट्टेर।
12 ओर ईटे एर्रानोन चूड़ी काबा एञ्ञेर आरू चोमजा इसाब ती “नातो एटे एर्रा बे तेबे?”
एनी ओकूरीन ओकूर जाच आडूरीर।
13 एरोड आवूर ओदो लोग एके “ऊर निक्के मेल उन्नी किली चोरनेर नार” एनी ओरीन आँसी डेकली पोकरीर।
पतरस मेरचीकतानो
14 आनातले पतरस,
आ इगारा जान पोरबू नीतीकतानेर चेंगे निलतेड आरू निक्के जोड़ ती आनात लोगीन पोक्कू मुरीयायतेड:
ए एऊदी लोगीने,
आरू ए एरूसेलेम ती डेरा पातरान जाम्मा लोगीने,
आन इद नातो इसाब तो आय एनी इमीन चोमजाकतान।
आन पोकरानोन केकोल ओनी किली वेनूर।
15 ओर चोरनेर नार एनी ईम बिचार चाजूरान आकाट ऊर चोरनारी।
एबे गो पोकात पारी ई मेन्डा।c
16 एरोड इद,
मापोरबून कान तीग काबेर वेन्नी किली लोगीन पोक चियरान गुरू योयेल मेनगा पोक्की मेन्डीड जे?
आयची पाटा आय:
17 “चेरा चेरी वादेक एटे एर्रा,
d एनी
मापोरबू ईटे पोकूमेड,
आन आपला जियोमीन,
जाम्मा मांजेन कान डेरा चाजपीकतान।
आरू इम चिन्डूल आरू माचील मापोरबून कान तीग काबेर वेन्नी किली लोगीन पोक चियरार।
इम इलेनकूल देरसेनe चूड़रार आरू मुत्ताकेर मापोरबून कान तो केलायकूडूलीन केलायूरार।
18 आरू आ दिनेल ती आन्न कामीयालेर कान,
आरू कामीयाचीलीन कान बेले,
आन आपला जियोमीन डेरा चाजपीकतान।
ओर मापोरबून कान तो काबेरीन पोकरार।
19 आरू आन पोडी बादोर ती पोरलेत कामूलीन टोटीकतान आरू किड़ी नेन्दील ती,
नेतीर ओटीकतानोन,
किच आरू गूञूकूड़ तो बादोरीन आकाट तो चिनेलीन टोटीकतान।
20 पोरबून बेड़तो आरू निक्के मेडूरान दिना एदाका मेनेक
पोकाल चीकोड कुटरा आरू नेलींग नेतीरीन आकाट एर्रा।
21 आरू एड एरको पोरबून पिदीरीन पातरानेड
बाचाकतान इसाबीन बेटूराड”f
एनी लिकेड नाड।
22 ए इसराएली लोगीने!
ई पाटेन वेनूर:
नासरत तो ईसू इम नाड़बूल पोरलेत कामूल आरू आचरूत एरीकतान कामूल आरू पोरलेत काम तो चिनेलीन मापोरबून ताकोत ती चाजूरानूग,
ओड मापोरबून कान तीग वेर्रान मांजा आय एनी मापोरबू इमूंग चेत्तीन टोटीकतेड।
एटे एनोड मापोरबू ओन टिटाक ले आवीन चाजपीकतेड।
ईमी बेले आवीन पुट्टोर।
23 आयची ईसून इसाबीन मापोरबू मुन्नीत ले पुन्नी किली नीतीक मेन्डीड।
आदूगी ओड ओनीन चुमीक इट्टेड आरू एड़जालेर इमूंग चेंग चियरानूग,
ईम ओनीन कुरूस पारे ती कूटील कोट्टू इड्डी किली आनकीकतोर।
24 एरोड मापोरबू एके ओनीन चाय्यकूड तो नोयरान तीग चान्डाक किली चाय्यरान कान तीग जियोम पाटतीकतेड।
एटे एनोड चाय्यकूड ओनीन तान्न बान्देन ती इड्डू ओड़ो।g
25 दाऊद ईसून बीतेर ती,
“‘आन पोरबून एतोड नांग आन्न मुन्देल चूड़ चूड़ी मेट्टेन;
एटे एनोड ओड आन्न वेला टिटाकh मेन्डानूग एडी आनीन मेलकीक ओड़ार।
26 आदूगी आन्न मेन्न वेड़का एञ्ञो ना;
आरू आन ऊबेक बेले आन्न नेवान्ड ऊदीम एरी एनकूमो।
आन्न मेन बेले आचा चाजी पीयरा।
27 एटे एनोड ईन आन्न जियोमीन किड़ीतपूर ती चायाता;
इन नाती केचूर चिलायेडीन मोड़ीन ईन चाम्मू इडाता।
28 ईन आनीन चेत्त जियोम टोन्डूरान पावीन टोटीकतोत नात।
ईन आन्न चेंग मेन्नी किली आनीन वेड़के ती मेनूंग इडरात’i
एनी पोक्केड नाड।”
29 ए बिसवासी बायीयोवे आरू दादेरे!
ई पाटेन लिकी मेन्डान,
आम्म पुरकेत मुकीयाल दाऊद मेनगेन इसाबीन आन इमूंग रेच्चा चोमजारे पोक चियू नाम्बीकतान।
ओड चाञ्ञेड आरू ओनीन पेन्देर,
ओन मोट एबले बेले आम नाड़बूल मेन्डा।
30 एरोड ओड मापोरबून कान तीग काबेर वेन्नी किली लोगीन पोक चियरान गुरू मेन्डानूग,
आपला तेरान तीग ओकूरीन आपला गाद्दी ती उन्डतीकतान एनी मापोरबू किरीया तिन्नी किली जुमान चिड़ाकतानोन ओड पुन्नी मेन्डीड।j
31 ओड मापोरबू एटे चाजूराड एनी मुन्नीत ले पुन्दानूग,
मसीयालk चाय्यी किली मारी जियोम पाडरान इसाबीन ईटे पोक्केड:
मापोरबू ओनीन किड़ीतपूर ती चायाडा आरू ओन मोड़ीन चाम्मू इडाडा एनी लिकेड नाड।
32 तेबे मापोरबू,
ई ईसून चाय्यकूड तीग मारी जियोम पाटतीकतेड एनी आम जाम्मा,
ई पाटेत गोवा एञ्ञोम नाम।
33 ओनीन मापोरबू तान्न वेला टिटाक एतीक किली आपलेन चेंगे,
ओनीन आंगरू इट्टेड आरू मापोरबू पाटा चियी मेन्डान नाती केचूर चिला जियोमीन बेले,
ईसू आपला बुवेन तीग बेटेड।
एबे ईम चूड़रानो आरू वेनदानो,
ईसू आम्म कान डेरा चाजपीकतान नाती केचूर चिला जियोमीन इसाब तो आय।
34 एटे एनोड,
ईसून आकाट दाऊद मेनगा सरग आर्रे चेनेडा;
एरोड बेले ओड,
“यावे मापोरबू आन्न पोरबून
35 ‘इन कुचेर तो लोगीन आन इन केलूल मान्डूरान पाकीलीन आकाट चाजारे ईन आन्न वेला केय्य टिटाक उन्डी मेन’l एट्टेड”
एनी पोक्केड नाड।
36 “आदूगी,
ए जाम्मा इसराएली लोगीने,
ईसून ईम कुरूस ती कोट्टीकतोर जे?
ओनीन मापोरबू,
पोरबू आरू मसीयाल एरीकतेड एनी ई चेत्तीन ईम पुन्दानो आय।
आन आयची ईसून बीतेर ती ऊबूमेन” एट्टेड।
37 लोग पतरस पोकरानोन वेनेक ओर निक्के पाचताकतेर आरू,
“ए तोल्लेरीने,
एबे आमूंग एटे चाजू लागूरा गो?”
एनी पतरसीन आरू पोरबू नीतीक मेन्डान आवूर चेलालेरीन बेले जाच आडूरीर।
38 आदूग पतरस ओरीन,
“ईम ओकूर-ओकूर इम मेन्नीन उजराकपूर आरू ईसू मसीयालीन पिदीर पात्ती किली बपतीसमा एपूर।
आटे चाजोड इम पापदेरोमूलीन मापोरबू माप चाजूराड आरू मापोरबू इनाम चियरान नाती केचूर चिला जियोमीन ईम बेटूरार।
39 एटे एनोड नाती केचूर चिला जियोमीन चियरान एनी मापोरबू इमीन,
इम तेरानतेरीन आरू कोमाड देचेतेरीन पाटा चियी मेन्डीड जे?
ई पाटा,
पोरबू आम्म मापोरबू आची मेन्डान जाम्मा लोगूगी आय।”
40 आटनी पतरस ओरीन आवूर कुबे पोद्दूल तीग,
“लेक ती मेनूर” एनी पोक्की किली,
“ई जुग तो एड़जालेर तेरानतेरूग एर्रान डेन्ड तीग बाची मेनूर” एनी गुवारतेड।
41 आदूग पतरस पोकरानोन पातीयाकतानेर कुबे लोग बपतीसमा एतेर।
आ चिरीक,
तीन आजार लोग आत्ती बिसवासी लोगीन चेंगे बिड़ेर।
42 आरू ओर जाम्मा पोरबू नीतीकतानेर मेरचीकतानोन चाजूरान ती,
बिसवासी लोगीन चेंगे मिली मिसी मेन्डान ती,
पोरबू बोजीन एतान ती आरू बिन्ती जोड़रान ती मेन्न लागाकतेर।
बिसवासी लोग ओकती चोर ती मेट्टेर
43 पोरबू नीतीकतानेर कुबे आचरूत एरीकतान कामूल चाजूरीर आरू पोरलेत काम तो चिनेल टोटीकतीर।
आना मेन्डान जाम्मा लोग,
ओर चाजूरानोन चूड़ी काबा एञ्ञेर।
44 आरू बिसवासी लोग जाम्मा चेंगे नी मेन्डीर आरू जाम्मा बानीन चेंगे नी पायची तिन्दीर।
45 आरू बिसवासी लोगूग एरूग एरको नातो एरको लागूरा एनोड,
आवूर बिसवासी लोग एके आपला देन मालीन आरू जामूकूलीन वीड़ी किली लागूरान लोगूग चियरीर।
46 आरू ओर रोजे बिन्ती जोड़ू मापोरबून गुडीत कोरी ती उलजूरीर,
आरू ओलेकूल ती पोरबू बोजीन पायची किली,
चेंगे उन्डी चेत्त मेन्न तीग वेड़का एरी तिन्नी किली,
47 मापोरबून जुवार चाज चाजी मेन्डीर आरू जाम्मा लोग बेले ओरोड देये ती मेट्टेर आरू बिसवात चाजी किली बाचाक एर्रानेरीन पोरबू ओर चेंगे रोजे बिड़ाकपारे चेन्डीड।