पोरबू 1

पोरबू नीतीकतानेर

चाजूरान कामूल

नाती केचूर चिला जियोम बीतेर ती पाटा चियरानो

1-2 ए तियूपीलूसीने! आन पोईल तो कागेत ती, ईसू नातो चाजेड आरू नातोन मेरचीकतेड एनी, ओड मुरीयाकतान वादेक ले पात्ती किली मापोरबू ओनीन सरग ती एतीकतान आर्रेत इसाबूलीन लिकेन नान। ओड नाती केचूर चिला जियोमोड तान आची मेन्डान पोरबू नीतीकतानेरीन चुवाल चियरान पिटतेल मापोरबू ओनीन सरग ती एतीकतेड। 3 आरू ओड तान कुरूस पारे ती आबोड़ एर्रान पिटतेल, चालीस दिनेल आत्ती, तान जियोम मेन्डान एनी चेत्तीन टोटीक, कुबे गुबोड़ूल ओरूग देका पाड पाडी मेट्टेड। आरू ओरोड मापोरबू आंगरूरान इसाब तो पाटेलीन ऊब ऊबी मेट्टेड। 4 ओर चेंगे ओपोट ईसू उन्डी किली तिन्नी मेनेक, ओड ओरीन ईटे तियारतीड: “ईम एरूसेलेमीन चायूमोर; एरोड आम्म बुवा पाटा चियी मेन्डान इनामूग काची मेनूर। आदीन इसाब ती ईम आन्न चोन्ड तीग मुन्नीत ले वेट्टोर नार। 5 एटे एनोड एऊना गो नीरोड बपतीसमा चियी मेन्डीड, एरोड एपोर इमूंग ओदो दिनेल पिटतेल मापोरबू नाती केचूर चिला जियोमोड बपतीसमा चियराड बे” एनी पोक्की मेन्डीड।

ईसू सरग ती एतीक एर्रानो

6 आनातले, पोरबू नीतीकतानेर ओन चेंगे बेट गाट एर्रीर आतोड ओर ईसून, “ए पोरबू! ईन एबे नी रोमी लोगीन आराक किली इसराएली लोग पोईल आकाट आपला देचेन मारी आंगरेकेर एनी, राजीन ओरूग ओपीक चियरात काय एटे?” एनी जाच आड़ेर। 7 आदूग ईसू ओरीन, “इद एट्टो बेरा चिलाड आरो दिने ती एर्रा, आदीन पुन्दानो इम काम एरा। आदीन आम्म बुवा तान्न पान्न तीग नीतीकतेड नाड। 8 एरोड, एतोड नाती केचूर चिला जियोम इम का वेर्राड आतोड, ईम ताकोत बेटूरार। आरू एरूसेलेम ती, गुलाय एऊदीया देचे ती आरू सामरी देचे ती आरू मोंजीपूर तो टोकूल आर्रे आन्न बीतेर ती लोगीन पोक चियरान गोवाईतोर एर्रार” एट्टेड।

9 इदीन पोकरान पिटतेल ओर चूड़ेक-चूड़ेक, ओड पोडी सरग ती एतीक एञ्ञेड आरू ओक बादोर ओनीन ओर नेंजेर तीग पाकीकतो। 10 ओड पोडी चेनेक, ओर बादोर टिटाक नेंजराकतीर। तेबे, उदापड़े विल कुड़तेल तुन्दी मेन्डानेर इरूल ओर लेग्गे वेरी किली निलतेर। 11 आरू, “ए गलीलतोरे! ईम नांग आय निलची किली बादोर टिटाक नेंजराकमोर? इम नाड़बूल तीग सरग ती चेन्डेड आयची ईसू, एटे बादोर ती एतीक एर्रानोन आरू सरग ती चेन्डानोन ईम चूड़ोर नार, आटनीची ओड मारी वेर्राड बे” एट्टेर।

एऊदेन पोद्द मत्तीयालूग टोन्डूरानो

12 आनातले ओर एरूसेलेम तीग ओक किलो मीटेर कोमाड मेन्डान जेतून कोप्पे तीग इड़ेरी किली, एरूसेलेम ती मेलेरनेर। 13 ओर आना एदी किली ताम डेरा मेन्डान पोडीत बाकरे ती चेन्डेर। आना मेन्डीर जे? ओर पिदीरूल ईव आय: पतरस, एऊना, याकूब, आन्दरीयास, पिलीपूस, तोमाल, बरतूलमेय, मत्ती, आलपाईन चिन्ड याकूब, सिमोन कनानी, आरू याकूबीन चिन्ड एऊदा। 14 आरू ऊर जाम्मा, ओदो आयचील आरू ईसून ईय्या मरीयम आरू ओन तोल्लेनकूल चेंगे ओकती चोर ती मेन्नी किली बिन्ती जोड़ जोड़ी मेन्डीर।

15 आनातले आयची दिनेल ती, ईसून बिसवात चाजूरान एक चोव बीस जान आत्ती बिसवासी बायीयोव आरू दादेरीन नाड़बूल पतरस चुलची किली, 16 “ए आन्न बिसवासी बायीयोवे आरू दादेरे! ईसून चुमीकतानेरूग पाव टोटीक किली ईसून चुमीक चियरान एऊदेन इसाब ती, नाती केचूर चिला जियोम, मापोरबून कागेत ती, दाऊदीन तीग मुन्नी की पोक्की मेन्डान पाटा पूरा एर्रानो ई मेट्टो। 17 एऊदा आम्म नाड़बूल तीग ओकूर मेन्नी किली आम चाजूरान सेवे ती आम्म चेंगाटतेड मेन्डीड।”

18 (ओड तानी ओदेरोम चाजी किली बेटूरान पोयसेलोड ओक वायेन मोलयाक किली आना तेल्ल किड़ी पाडारे उरकेड। ओन पोट्टा पिट्टो आरू पिड़ूल बेले वांगोव। 19 आरू ई पाटा एरूसेलेम ती मेन्डान जाम्मा लोगूग पाता चेलोतो। आदूगी आ पाडीन ओर पाटे ती अकलदमा एट्टेर। अकलदमा एनोड नेतीर तो कामेय तो पाड आय।)

20 “एटे एनोड बजन पाटेल तो कागेत ती, ‘ओन ओलेक मेला पाडोको आरू आना एडी डेरा पाता मेनकेर’ आरू ‘ओन पोद्दीन एड बेले आवूरतेड एपेकेड’ एनी लिका मेन्डा। 21-22 आदूगी पोरबू ईसू आम्म नाड़बूल मेनेक, एतोड नांग आम्म चेंग मेन्डानेर कान तीग एरीन बेले ओकूरीन आचूरानो आय। आरू ओड एऊना बपतीसमा चियरान वादेक तीग ईसून सरग ती एतीकपारे आम्म नाड़बूल मेन्डानेड मेन्डानो आय। आरू ओड ईसू चाय्यी किली मारी चाय्यरान कान तीग जियोम पाट्टेड एनी आम्म चेंगे गोवाई पोक चियरानो आय” एट्टेड।

23 आटनी एन्डानूग आना मेन्डानेर इरूलीन नीतीकतेर। ओकूरीन पिदीर यूसूप, ओनीन बरसब्बा बेले एन्डार। चिलाड युसतूस बेले एन्डार। मारी ओकूर मत्तीयाल आय। 24-25 आनातले ओर, “ए, पोरबू ईन जाम्मा लोगीन मेन्नीन पुट्टोत। एऊदा ई सेवेन आरू पोरबू नीतीकतानेरीन पोद्दीन चायी किली आपला पाड ती चेन्डेड। ई इरूल कान तीग ईन एरीन आचोत नात आले, ओनीन आमूंग टोटीक चिय। ओड ओन पोद्दीन एपेकेड” एनी बिन्ती जोड़ेर। 26 आनातले ओर पिदीरूलीन, चिटील ती लिकी किली, आवीन माटकीकतेर आरू आवीन तीनची किली ओकूतीन पेडरानूग, आद मत्तीयाल पिदीर ती पेतो। आटनी तीग ओनीन आ इगारा जान पोरबू नीतीकतानेर चेंगे बिड़ाकतेर।