लूका 24

ईसू मारी जियोम पाड्डी चुलतानो

(मत्ती 28:1-10; मरकू 16:1-8; एऊना 20:1-10)

1 एरोड आ आयचील ओपतेत पोईल चिरीक वेवूके ताम तायार चाजी मेन्डान बास तो बानीलीन पात्ती किली ईसून मोड़ीन इडरान मोटतेल चेन्डूव। 2 आरू मोट कोलकीत वेल ती मूयूरान केल्लीन ओड़पीक मेन्डानोन चूड़ोव, 3 एरोड आव मोट कोलकी बीतराम तान्नेक, ईसू पोरबून मोड़ीन बेटोवा। 4 आव इदीन चूड़ी किली काबा एरी मेनेक, चूड़ूर! इरूल मांजाकूल बादोर मेडूरान आकाट तो गान्डेल नूड़रानेर आवीन लेग्गे निलतेर। 5 आव नारची किली किड़ी मोकोम चिंगरू जीती मेन्डानूग, ओर आवीन, “ईम जियोम मेन्डानेडीन चाय्यरान लोगीन कान नांग कान्डूकमोर? 6-7 ओड इना चिल्लाड; एरोड जियोम पाड्डी चुलतेड नाड। ओड गलील ती मेनेक इमीन, ‘सरग तो मांजा पापीयालेर केय्य ती बेटाक एर्राड आरू ओर ओनीन कुरूस पारे ती कूटील कोटरार आरू ओड मुचीच तीग जियोम पाडराड’ एनी पोक्की मेन्डीड जे? आदीन चुरता चाजूर” एनी पोक्केर। 8 तेबे आवूग ओन पाटेल चुरता वेञ्ञोव। 9 आरू मोट कोलकी तीग मेल्ली किली आव आ इगारा जान चेलालेरीन आरू आवूर जाम्मेनी, ई जाम्मा पाटेलीन वेनपीकतोव। 10 पोरबू नीतीकतानेरीन ई पाटेल पोकरानोव मगदलीत मरीयम आरू योआन्ना आरू याकूबीन ईय्या मरीयम आरू आवीन चेंगेत आवूर तो आयचील आय। 11 एरोड आवीन पाटेल ओरूग पोकात डाग्गेन आकाट बावोतो आरू ओर आवीन पाटेलीन बिसवात चाजेरा। 12 एरोड पतरस चुलची किली मोटतेल तूलेड आरू मुडी किली चूड़रानूग आना आमान आ मोल्लेत पोटी गान्डा मेन्डूव। आरू एटे-एटे एञ्ञो एनी काबा एरी किली तान्न ओलेक चेन्डेड।

इमाऊस पोलूब चेन्डान पाव ती इरूल चेलालेर चेंगे ईसू

(मरकू 16:12, 13)

13 आयची चिरीक चेलालेर कान तीग इरूल इमाऊस पिदीर तो ओक पोलूब ती चेन्डीर। आद एरूसेलेम तीग इगारा किलो मीटेर आत्ती कोमाड मेन्डू। 14 ओर एरी मेन्डूव आ जाम्मा पाटेलीन ऊब ऊबी चेन्डीर। 15 आरू ओर ताम-ताम पोक पोकी, ऊब ऊबी चेनेक ईसू तानी लेग्गे वेञ्ञेड आरू ओर चेंगे बिड़ेड। 16 एरोड मापोरबू ओर नेंजेरीन काट काडरानूग ओर ओनीन चिताक ओड़ेर। 17 ओड ओरीन, “ईम ताक ताकी ऊब ऊबी चेनमोर जे? ईव नातो पाटेल आय?” एनी जाच आडेड। आदूग ओर तेब चेन्डेर आरू ओर मोकोम मुर मुरा टोन्डूरू। 18 आरू ओर कान तीग किलीयोपास पिदीरतेड, “आजी काली एरूसेलेम ती नातो एटे एञ्ञो ना एनी पूनायेड पोर देचेतोत ईन ओकूरी मेन्डात काय एटे?” एट्टेड। 19 ओड ओरीन, “नातो पाटेल आय?” एनी जाच आडेड। आदूग ओर ओनीन, “नासरत तो ईसून इसाब ती गो आय। ओड मापोरबून कान तीग काबेर वेन्नी किली लोगीन पोक चियरान ओक गुरू मेन्डीड। ओड मापोरबून आरू जाम्मा लोगीन नेंजेर ती तान चाजूरान कामूल ती आरू पोकरान पोद्दूल ती लावतेड मेन्डीड। 20 आरू आम्म बेड़कूल पेलाचकूल आरू आदीकारीकूल ओनूग चाय्यीकतान डेन्ड चियेकेर एनी बेटाक चिञ्ञेर आरू ओनीन कुरूस पारे ती कूटील कोट्टेर। 21 एरोड आम गो, ओडी इसराएली लोगीन चोड़ाकताड एनी आचा चाजी मेन्डूम। ओ ई पाटेलीन चायी ई गेटना एरी किली मुचीच एञ्ञो। 22 आरू इने वेवेक आम्म कान तीग आयचील मोटतेल चेनी मेन्डूव। आव आमीन बेले काबा एरीकतोव। 23 आव ओन मोड़ीन बेटा कान्डूग मेलेरी किली ताम सरग दूतकूलीन बेले चूड़ोव आरू ओरी आय ईसू जियोम मेन्डाड एनी तामीन पोक्केर एन एनी वेञ्ञोव। 24 तेबे आम्म चेंगेतेर ओदेर मोटतेल चेन्डेर आरू आयचील पोकरान आकाटी चूड़ेर; एरोड ओर ओनीन चूड़ेरा” एट्टेर। 25 तेबे ईसू ओरीन, “ए बुदी चिलायोरे आरू मापोरबून कान तीग काबेर वेन्नी किली लोगीन पोक चियरान गुरूकूल जाम्मा पाटेलीन चान्डे बिसवात चाजा लोगीने। 26  डेन्ड एरी किली तानूंग इजीत तो मान टोन्डूरान पाड ती तानरानो आय एनी पूना मेन्डूर आदूग?” एट्टेड। 27 आरू मूसाल कान तीग मुरीयाक किली मापोरबून कान तीग काबेर वेन्नी किली लोगीन पोक चियरान गुरूकूल जाम्मा मापोरबून कागेत ती तान्न बीतेर ती लिकी मेन्डान पाटेलीन ओरीन चोमजाक चिञ्ञेड। 28 आती तीग ओर ताम चेन्डान पोलूब लेग्गाट एदेर आरू ओड तान मुन्देल चेनूंग कान्डूकमेड आकाट टोटीकतेड। 29 एरोड ओर ईसून, “ईन आम्म चेंगे तेबू; एटे एनोड एपोर पोकाल पाट्टो ना, आरू आन्डू कान्डूकमो” एनी पोक्की किली ओरबोर एरी तेबाकतेर। तेबे ईसू ओर चेंगे तेबू चेन्डेड। 30 आनातले ओर चेंगे तिनूंग उन्डरानूग, ईसू रोटीलीन पात्ती किली जुवार पोक्केड आरू आदीन गोन्दाक किली ओरूग पायची चिञ्ञेड। 31 पायपेक ओरीन मापोरबू चूड़पीकतानूग, ओर ईसून चिताकतेर आरू ओड ओर नेंजेर तीग माय चेन्डेड। 32 ओर ओकूर ओकूरीन, “ओड पाव ती आम्मोड ऊबेक आरू मापोरबून कागेत तीग चोमजाकपेक आम्म मेन्न ती विलीज पातीकतान आकाट उचांग एरी मेनोमा आदूग?” एनी पोक्केर। 33 ओर आतोडी चुलची किली एरूसेलेम ती मेल्लेर आरू इगारा जान चेलालेरीन आरू आना ओर चेंगे उलजी मेन्डानेरीन बेटेर। 34 आर्र तो लोग “पोरबू चेत्तेगी जियोम पाट्टेड आरू सिमोनूग देका पाट्टेड नाड” एनी पोकरीर। 35 तेबे ओर बेले पाव तो पाटेलीन आरू ओर ईसू तिनूंग रोटील गोन्दाकपेक एटे चिताकतेर एनी ओरीन पोक्केर।

ईसू चेलालेरूग देका पाडरानो

(मत्ती 28:16-20; मरकू 16:14-18; एऊना 20:19-23; पोरबू 1:6-8)

36 ओर ई पाटेलीन पोक पोक्की मेनेक ईसू कुदे ओर नाड़बूल वेरी किली निलतेड आरू ओरीन, “इमूंग चुक टोन्डोको” एनी पोक्केड। 37 एरोड ओर तिरी उय्यी किली नारची चेन्डेर आरू ताम आरो डुमेन आले चूड़ूमोम एनी चुरता चाजेर। 38 आरू ईसू ओरीन, “ईम नांग नारचूमोर? आरू नांग ईम दुय मेन्न एरमोर? 39 आन्न केय्यूल आरू केलूलीन चूड़ूर आन ओडी आय। आनीन टोड्डी किली चूड़ूर। डुमेग आन्न कान चूड़ूमोर जे? आटे चेप्पूल आरू बूलेल मेनावा” 40 एनी किली ईसू ओरीन तान्न केय्यूल केलूलीन टोटीकतेड। 41 आरू वेड़केन चेत्तूग ओरूग चेत्त एरा कान्डूग आरू ओर काबा एर्रानूग, ओड ओरीन, “इना इम लेग्गाट तिनूंग नातो एरको मेन्डा काय एटे?” एनी जाच आडेड। 42 आदूग ओर ओनूग चाटरान मीना गोन्देन चिञ्ञेर। 43 ओड आदीन पात्तेड आरू ओर मुन्देल तिन्देड।

44 मारी ईसू ओरीन, “आन इमीन इम चेंगे मेनेक पोकरान पोद्दूल ईव्वी आय: मूसाल नियोम ती आरू मापोरबून कान तीग काबेर वेन्नी किली लोगीन पोक चियरान गुरूकूलीन कागेत ती आरू बजन पाटेल ती आन्न बीतेर ती लिकी मेन्डान जाम्मा पाटेल पूरा एर्रानो आय एनी पोक्की मेन्डीन” एनी पोक्केड। 45 आनातले ओड मापोरबून कागेतीन चोमजू ओरूग मेन्न चिञ्ञेड। 46 आरू ओरीन, “मसीयाल आबोड़ एर्रानो आय आरू मुचीच तीग चाय्यरान कान तीग जियोम पाड्डी चुलतानो आय। 47 आरू एरूसेलेम तीग मुरीयाक किली जाम्मा देचेल-देचेल तो लोगीन ओन पिदीर ती मेन्नीन उजराकतान पाटेन आरू पापदेरोमूलीन माप चाजूरान पाटेन वेनपीकतानो आय एनी बेले लिका मेन्डा। 48 ईम ई पाटेल तो गोवेतोर आय। 49 आरू चूड़ूर! आन्न बुवा पाटा चियी मेन्डान नाती केचूर चिला जियोमीन आन इम कान चोटतेर्रान। एरोड सरग तीग ताकोत बेटारे ईम इयची गेड़े ती तेबी मेनूर” एट्टेड।

ईसू सरग ती चेन्डानो

50 तेबे ईसू ओरीन बेतनीया पोलूब आर्रे वाल उञ्ञेड आरू तान्न केय्यूलीन एतीक किली ओरूग आसतीर चिञ्ञेड। 51 आटनी ओरूग आसतीर चिय चियी मेनेक ओरोड एलगेड आरू ओड सरग ती एतीक एञ्ञेड। 52 तेबे ओर ओनीन मोड़की किली निक्के वेड़केनोड एरूसेलेम ती मेलेरनेर। 53 आरू ओर रोजे गुडी ती उलजी किली मापोरबून जुवारची-जुवारची मेन्डीर।