အင် 25

1 အာနီ န့ ဘော မုး ဂြုဝ်း အီ မိုဝ်း အာငျာန် ဘွတ် ပီ ကာလာင် ခုန်ဒီခမ် အာဆာလုဝ်မုဝ်။ ဒေါ မုး စုဝ် ခုန်ဒီခမ် အာဟေစကီ၊ ဒေါ အိုပ် အန် အိူင် ယူဒါ၊ ဂေ ဒါ ဇာရေ ဟဲ့ ဝီ ထုတ် ဝီ ဒဲမ် ကာမာယ်။

2 အေ ရုဝ်ဆေ ဇဝ်ဖြာ ကူပ် နပ် အန် ဒီ ဘူင် ပီ တူ နပ် ဒူအီ။ အေ ယီ ရုဝ်ဆေ ခုန်ဒီခမ် ကူပ် နပ် အန် ဒီ ကာလာင် တဲး န့ လိုဝ်း တူတ့် အာရေ ဒူအီ။

3 အေ ဒူအီ၊ အေ တူ နပ် ခဲ့ စာ ဂါင်ဟြာဝ်၊ တူ နပ် ခဲ့ ဟေတ့် ကာဒါယ်။ ပါယ် တီ အေ မိူဝ် တူ နပ် ပီ ကာဖာ ခုန်ဒီခမ်။

4 ဆေ အေ ထာရွင် လေး အျီင် ရွိုန်၊ အေ ဒီ ပွိုန် ရွိုန် ဘွတ် အီ ပွိုန် ဘူင် ဘဲန် ကွက့်။

5 ဆေ အေ ဒိုဝ်း ဝဲန် ဒူအီ တူ မွှိုမ် အီ ကွယ် ခူပ် ခုန်ဒီခမ်၊ ခုန်ဒီခမ် ဒီ ကွယ် ဆီချာ၊ ဘူင် နာ မုး နာ မှာန်။

6 မဲ ကွဲ့ ပီဖုင် မဲ ဒီ အာတ့် ခုန်ဒီခမ်။ ကွဲ့ ကွယ် ဒူင် ကွယ် ဂေ ဒါ တာင်။

7 ခုဝ်၊ ဆေ အီ တဝ်း၊ “တး ဟုဝ့် နာ ဒဲင် နီ။” န့ မွှိုမ် လွှိုမ် အီ ကာလာင် ဒီ မဲ၊ တဲး မဲ မွှိုမ် ဆာယ် ဒီ အာတ့် ဒါ တာင်။

8 မဲ ကွဲ့ ကာတဝ် ဒီ ကာလာင် ဒီ ဒါ တာင် လွင် ပဲ့ ဟဲ့ ယိုဝ် မဲ။ ဆေ ဟီ ဝီ မိုဝ်း အီ ဟဝ် ဝီ ကာလာင် ပေါ အူ မျုဝ်၊ မဲ ဒီ ဝီ ပါယ် မှဝ်။း

9 ဆေ မဲ မိုဝ်း ဒီ ကာဘး ဒီ ဒူအီ အီ ကွယ် ကာတတ် မဲ၊ တဲး ဘာယ် လာယ် ကာမွုန်၊ တဲး န့ ဟွတ့် ခါနာ ဘာယ်။ ကွဲ့ ဝိန် ဒီ ကာလာင် ဘျ ဂြုဝ်း ပီ ချြီင် အီ ဒီ ကာလာင် ဒီ မဲ၊

10 ယုဝ် အီ ဟဲ့ ထူမ် ဂြုဝ်း မဲ တီ ဒီ ဝီ ကာလာင် တဲး မဲ ဆာယ် အီ၊ တဲး န့ တဲး မဲ စှိုမ် ဆာရေ။

11 ဂြုဝ်း ပီ ကာလာင် ဒေါ ဆင်ဒုဝ်၊ န့ ဒီ ပီ ဘ့လေ ခြိဝ် စှိတ် အီ မိုဝ်း ကာင် ရွိုန်။

12 ဂြုဝ်း အာငျာန် အီ ဒွါ ဆာဒိက်၊ ဂါယ် ဒူအီ အီ ဆီ ထူမ်၊ န့ ဘော ပီ ဘီဟျုဝ့် ခြိဝ် ဂါယ် ဂန်ဒဲ ခြိဝ် ဇဲတ်။

13 ဒါလာမ် အီ မိုဝ်း နဝ်း ဆိူဝ်၊ အန် ဒီ ဘော ဘူင်၊ တဲး နဝ်း ဒူအီ အီ စ်ု အန် ဂတ် ဂျီတ်။ န့ ပီ အိုမ် ဒါတ် အီ စုဝ်း အာခြာဝ် ဆုဝ့် ငှုဝ်။

14 ဆေ ဒူအီ အီ ကာဆဲန့် တဝ်း၊ “အိုဝ်၊ အုဝ် ဒီ တဲး၊” အန် ယီ တူ တဲး၊ န့ ဘော ပီ ဟဲ့ မိုဝ်း န့အု၊ ယီ တူ မိုဝ်း ဂ့လာယ်။

15 နဝ်း ခမ် ဒီ ယိူန်၊ န့ ဒီ ဘော ပွိုန် ဒီ ကာဆုး ဒါ ကာညာ။ ဂြုဝ်း န့စု န့စမ် အီ မွှိုမ် ထူမ်၊ န့ ဘော ပဲ ပီ န့စမ် နဝ်း ဒူအီ အီ တူ ဂူမ် အာဆေ။

16 ဆေ မဲ ကာတုန့် ငါမ် မာဖျီန်၊ တဲး မဲ ဟူမ် မွက် ခဲ့ ဒီ ဖဲ ဆီချာ မဲ။ ဆေ မဲ ဟီ ဟူမ် ကိူန်၊ ဟူမ် လွှိုမ်၊ မဲ ဒီ ဝီ ဟိုဝ် လေး။

17 ကွဲ့ တဲး မဲ အွန် ဒီ ဟာဝ် လဲ ဆေ ရိုဝ် ဒီ ကာင် ဂေ အီ ကွယ် ကာတတ် မဲ၊ ယုဝ် ဂေ ပိုဝ် မဲ၊ ဝီ ကာအိး မဲ။

18 ဆေ ဒူအီ ဘဲန် ဆက်ဆေ၊ ကာလာင် အီ တူ မှာန် လွင် ဂိုက် အန်၊ န့ ဘော ပီ အန် ကာဂုဝ်း ဒီ ဂေ၊ တာ မင် မး ဘော မာပွါ့ လာင် ဘော ဘ့လာ အ အီ ဘတ့် ကာဆဝ်။

19 ဒေါ ဇမ် မဲ ဒုက်၊ ဆေ မဲ ဘိုင် ဒူအီ အီ တူ ပွိုန် နဝ်း တာင်၊ န့ ဘော ပီ မဲ မိုဝ်း ဟြာင် ဝ ဘော ပ့လဝ် ဂဲ့။

20 ဒူအီ အီ တဝ်း မှုဝ် တဲး ဒူအီ နဝ်း လိုဝ် ထူမ်၊ အန် ဘော ပီ ဒူအီ အီ ဘုတ့် ဆီတုဝ် ဒေါ အာခြာဝ် ဂတ်။ အန် ဘော ပီ ဒူအီ အီ ဒိုဝ်း ဆယ့် ဖဝ်း ဒီ ဒိမ်။

21 ဆေ ရန်ဆူ မဲ ဆီ ဟူမ်၊ တဲး မဲ ဟျီင် အန် ဟူမ်။ ဆေ အန် ဆီ ဒျီင် အိုမ်၊ တဲး မဲ ဒွါ အန် ဒျီင်။

22 ဆေ မဲ ဘူင် ပါယ် တီ၊ ယုဝ် အန် ဘော ဝီ ဆာယ် မဲ၊ ဝီ လှုဝ်း မှာပ် အန်၊ ဝီ ဆီ ဘဲန် ဂိုက် မဲ။ ဇဝ်ဖြာ ဒီ ဝီ ဒွါ ရုး အန် ဒီ မဲ။

23 ဆေ ခုန် ဘုတ် တး နာ ကွာ၊ န့ တဲး ဂ့လာယ် တး။ ပါယ် တီ ဂြုဝ်း အီ လာယ် ကာယွင့် တဲး အီ ပီဆွင့် ငါယ်။

24 ကွယ် ခဲင် ထိုပ်၊ န့ ဘော မွှိုမ် လွှိုမ် ကွယ် ရိုမ် ခဲင် ကာင် ဒူပ် အီဘိုန့် ဆီမာ ပိုန့် ဆီမာ အေး။

25 ဆေ မဲ ယိုဝ် ဆာဒါင် နာ ဘွတ် နာ မွှိုမ် အီ တး မိူင် တူင့်၊ န့ ဘော ပီ မဲ ဟဲ့ ပွိုန် ဒီ ဒျီင် အိုမ် ဂျီတ် ဒေါ ဆီ ဒျီင် ကာဆဝ် မဲ။

26 ဆေ ဒူအီ အီ မိုဝ်း နဝ်း ဆိူဝ် ဝီ ဒူပ် ပီ အိုင် ဒူအီ ဟာယ်၊ အန် ဘော ပီ အိုမ် တုဝ်း အီ ကာတုန်။ အန် ပီ ဘော အိုမ် ခိုမ် အီ ဟဲ့ အုး အမ်။

27 ဆေ မဲ ဟူမ် ကိူန် ဟူမ် လွှိုမ် ငါမ် မာဖျီန်၊ အာဝ် မွှိုမ် ဒီ မဲ။ ပါယ် တီ၊ န့ တူ ကာအာပ် မဲ ဘူင် တဲး အီ ဟဝ် အိူပ် မဲ။

28 ဆေ မဲ တူ ယိူန် တူ အူတ် နဝ်း၊ န့ ပီ ရဲင် မိူင် အီ ဟဲ့ လိုဝ်၊ အီ ဟဲ့ ကာပျာတ့်။