အင် 17

1 ဟူမ် ဘူမ် ဟွာ့ ကာဟဝ်း ဒူပ် ဒူအီ အီ ကွယ် ဒါခိုယ်၊ န့ မွှိုမ် လွှိုမ် ဟူမ် ဘူမ် ဆီငဲး ယီ ကွယ် ခဲင် ကာင် အီ လာယ် ကာအေး။

2 မှာယ် အီ မိုဝ်း အာငျာန်၊ အန် ဘော ပွိုန် ဒီ အိုပ် ဂွန် ဒါ ကာညာ အန် အီ ဘူင် မွှိုမ် ဆာယ်။ အန် ဘော ပွိုန် ခါဂုန် အာဒါ အူ ဝီ ပီ ဂွန် ဒါ ကာညာ အန်။

3 ရွိုန် ဂေ ခြိဝ် လုဝ် ဟပ် ခဲင် ကာလုဝ့်၊ ဒင် ခဲင် ငဝ် တဲး န့ ဇဲတ်။ ဆေ န့ ယီ မုး နဝ်း ဒူအီ၊ ဇဝ်ဖြာ အီ ဒီ ဇဲတ် ဒီ ယွတ် ယုဝ် န့ မှာန် တူ မှာန်။

4 ဒူအီ ဟာယ် ဒူအီ မိူက်၊ အန် ဘော ထူမ် ဂြုဝ်း ဂေ အီ ဟာယ် အီ တူ မွှိုမ်။ ဒူအီ အီ ဆီမာ ကာလုဝ်၊ အန် ဘော ထူမ် ဂြုဝ်း ဂေ အီ ဂုဝ့် ဂဲ့။

5 ဆေ မဲ ကာညး ဒူအီ ဂိန် ဒူအီ ဖ့လာန်၊ န့ ဘော ပီ မဲ နဲန ဇဝ်ဖြာ အီ ဖာန် ဘ့လေး အန်။ ဆေ မဲ ခူယ် ကူပ် ဟဲ့ ဒုက် ဒီ အီ၊ န့ ဒီ ဘဲန် မှာပ် ဒီ မဲ။

6 ဆေ ဒူအီ ကတ် မိုဝ်း လှုက်လှာန်၊ န့ ပီ အန် ဟဲ့ စှိုပ် မင်ဂိုမ်။ ဘော ဂွန် ဒီ နဝ်း တာင် ဒီ ဂုန့် မာ အန်။

7 ဒါ တာင် ပီ ရုဝ်ဆေ အီ ဟဝ်၊ အန် တူ ကာအာပ် ကာလာင် ဂြုဝ်း ကာလုဝ်။ ဂြုဝ်း ပီဖုင် န့ တူ ကာအာပ် ဒီ ဒူအီ ရိုဝ်။

8 ဆေ ဒူအီ ပြာ ဒီ ဒွါ လက်ဆွင် ဒီ အီ၊ န့ ပီ ဆဲန့် ဘွတ် ဒီ အန်။ အန် ဘော ဟာဝ် နာ မှဝ်၊ ဆဲန့် တီ ဒီ တဲး အန် အွင်။

9 ဆေ မဲ ရွက့် အီ၊ မဲ ဂဝ်း ဝဲန် ပဲ့ ဟဲ့ လုတ့် အီ ဒီ မဲ။ ဆေ မဲ ယီ ကာလာင် လေး ပဲ့ ဟဲ့ လုတ့် အီ ဟဝ်၊ န့ ပီ မဲ ဘူင် တဲး အူ ဂိုက် လာယ် ကာဂဝ်း။

10 ပီ ကာလာင် အီ အူ ဒဲ နပ် ဒီ မာနုဝ် ကိူန် ဒီ ဒူအီ အီ မိုဝ်း အာငျာန်။ ဆေ ယီ တာ မ့ဖျီ့၊ မး ဒူအီ ရိုဝ် အာဒါ အူ မာယဝ်း ဇေန့်၊ န့ တူ ပဲ ဒီ မာနုဝ် အန် ခဲ့ တီ။

11 ဒူအီ ဟာယ် ဘော ဟြေတ့် မီ ဒီ ဝဲန် ပွုန် အီ။ န့ ဒီ ဘော လုဝ် ဒါလာမ် အီ တူ နပ် ဒီ ကာဝေ အီ၊ တဲး အန် ပဲ ဒူအီ ဟာယ် တီ။

12 ဆေ ဒူအီ ဟဝ် ဟဲ့ ဒိုဝ်း တဝ် ဂွန် မာဂြေး၊ အာဝ် ငှိုယ် ကာတုန့် မာ အန်။ န့ ယီ မွှိုမ် လွှိုမ် ကာတုန့် မဲ ဒူအီ ရိုဝ် ဒေါ ရူ အန်။

13 ဆေ ဒူအီ တူ နပ် ဂုင် ဂေဇူ အီ ဘော ဝီ ဝျီ့ အီ တူ မုး အီ တူ မွှိုမ် ဒီ အီ၊ အန် ဒီ လုဝ် ဝီ ခမ် အီ တူ ဘွတ် အီ တူ မွှိုမ် ဆေဆေ။

14 ဒေါ ကာစုး မဲ ဒီ ကာအေး ကာထဲန့်၊ န့ ဘော ပီ မဲ ဘ့လုး ရူင်ဝှါယ် တဲး န့ လှုး၊ တဲး န့ ဇွိုမ်။ ခုဝ်၊ တဲး မဲ ဝး အီ တူ ဘြေ့ ဒီ နဝ်း အာတ့် ကာအေး ကာထဲန့် မဲ။

15 ဆေ အီ ဒမ် မှာပ် ဒီ ဒူအီ အီ မိုဝ်း နဝ်း ဆိူဝ်၊ ဘော ဝီ ဘ့လေး ဒူအီ တူ မွှိုမ်၊ ဇဝ်ဖြာ ကာအိး ကာဆဝ် အာ မျုဝ် တီ။

16 ဆေ ဒူအီ ရိုဝ် ဒွါ ရွိုန် တဲး အန် ဟေန် အာငျာန်၊ အာဝ် မိုဝ်း အာဂျိုဝ် ကူပ် တူ မိုဝ်း အန် နဝ်း ဆီ ဟေန် ဘော ကူပ် တူ နပ် အန် မာဆေ။

17 ဂိုက် နပ် ဒီ လာယ် ရွက့် ဆေဆေ။ အူ ဝေါဝဲ လုဝ် လာယ် စွယ် ဒေါ ဇမ် ဂေ ဒုက်။

18 ဒူအီ အီ တူ မိုဝ်း အာငျာန်၊ အန် နပ် ဒီ ကာဆဲန့် ဘော နပ် ဒီ ကီခမ် ဒီ ဝျီ့ နီ ဒါင် အီ ဟဝ်။

19 ဒူအီ အီ ဘူင် နာ တူ မွှိုမ်၊ အန် ဘော အိုင် ဒီ ဘူင် မှာပ်။ ဆေ ဒူအီ ပီဖုင် အန်၊ န့ ဘော ပီ အန် ဘာင် အာဖေ အာရေ တး ဒူင် ကွယ် အန်။

20 ဒူအီ နဝ်း ဂုဝ့် နဝ်း ဂဲ့၊ အန် တူ ပွိုန် နာ ဘွတ် နာ မွှိုမ်။ ဒူအီ အီ ဆီမာ ဖုက်၊ အန် ဒီ ဇမ် ဒုက်။

21 ဂွန် အီမာယ် အီ တူ မိုဝ်း အာငျာန် ဘော ဘဲန် ဒုက် ဘဲန် က့လိုဝ် ဒီ ဂုန့် အန်။ ဂုန့် အီ မိုဝ်း ဂွန် ရိုဝ်၊ နဝ်း အန် မိူဝ် တူ ဒါခိုယ် ဒေါ မှဝ်။

22 နဝ်း ခူယ် နဝ်း ကြွိုမ်၊ န့ ဒီ တဲး အီ ကွယ် ဒါခိုယ်။ နဝ်း လိုဝ် နဝ်း ကာပျာတ့် တဲး ကာအာင် အီ ကာဟဝ်း။

23 ဒူအီ အီ တူ ဒူပ် ဒါရာ၊ အန် ဘော ပြာ ဒီ ဒိုဝ်း လက်ဆွင် အီ ဟဝ်၊ ဘော ဝီ ပျာတ့် ဝဲန် ဒါရာ အီ မှာန်။

24 ဆေ ဒူအီ မိုဝ်း အာငျာန် ဘွတ်၊ အန် ဘော ခြာမ် ဒီ ဘူင် ဒူပ် အာငျာန် တီ ဆေဆေ။ အီ မုး ဂေ ဒူအီ ရိုဝ်၊ ဂေ ယီ တဝ်း ဒီ ဟြေတ့် အာငျာန် ကော ဇမ် ဒူင် ဆိူတ် ကာဒါယ်။

25 ဂွန် အီမာယ် အီ ရိုဝ် ဘော ဘဲန် ဒုက် ဘဲန် ညှာပ် ဒီ ဂုန့် အန်။ န့ ဘော ဘဲန် က့လိုဝ် ဘဲန် ငှဝ် ဒီ မာ အန်။

26 အာဝ် ကာအာပ် ဒမ် မှာပ် ဒီ ဒူအီ ကူပ် မိုဝ်း ဂေ နဝ်း ဆိူဝ်။ အာဝ် ကာအာပ် မး ဒါ တာင် ကူပ် ဘူင် အန် နာ မွှိုမ်။

27 ဆေ ဒူအီ နပ် ဘဲန် မျုဝ် ဘဲန် မျုဝ်၊ အန် ဘော နပ် ဒီ ယိူန် ဂြုဝ်း အန်။ အာဆေ နပ် ပီ ပါယ် ဘဲန် မျုဝ် ဘဲန် မျုဝ်၊ အန် တူ ငှိုယ် ရူ။

28 ဒူအီ ပီ ဘော မုး ဒူအီ ရိုဝ်၊ ဆေ အန် ကွယ် နှိမ် နှိမ် တူ မူတ့် ကိူန်၊ အီ ဟဝ် ဒီ ဘော တဝ်း၊ အန် မိုဝ်း အာငျာန်။ ဆေ အန် တူ တဝ်း မာဆေ၊ ဂေ ဒီ ထာင် အန် ဟဲ့ လွှက့်။