အင် 14

1 အီဘိုန့် အီ မိုဝ်း အာငျာန်၊ အန် ဘော နပ် ဒီ ယွတ် မဲန် န့ဟူမ် အန်။ အီ မုး အီဘိုန့် တူ လွှက့်၊ အန် ယီ ပျာတ့် တဲး န့ လိုဝ်။

2 ဒူအီ အီ ဘူင် နာ မုး နာ မှာန်၊ အန် ဘော ရုဝ်ဆေ ဇဝ်ဖြာ။ ဒူအီ အီ ဘူင် နာ ဂုဝ့် ဂဲ့၊ အန် ဇွင့် ဇဝ်ဖြာ။

3 ဂြုဝ်း ပီ ကာလာင် ဒူအီ ရိုဝ်၊ န့ ဒီ ဝီ တဲး အန် ကာဒုး မး။ ဂြုဝ်း ပီ ကာလာင် ဂေ အီ မိုဝ်း အာငျာန်၊ န့ ယီ ဝီ ဘဲန် အီ ဂွင့် အီ ရဲ ဒုဝ် ဂေ။

4 ဆေ မဲ တူ မိုဝ်း မက်၊ ကာလာတ့် ဟူမ် အန် ဒီ လိူမ် ဆီချာ။ ဆေ မဲ ယီ တာ ဟဲန့် မက် အာလူင့်၊ ဂြွာ ငှုဝ် မဲ ဒီ နုဝ့်။

5 ဒူအီ ဘဲန် ဆက်ဆေ အီ ပွိုန် ညှိုမ်၊ အန် ဘော ကာလာင် ဂြုဝ်း မှာန် ဆေဆေ။ ဆေ န့ ယီ မိုဝ်း အီ တူ ပွိုန် ညှိုမ်၊ အန် ဒီ ကာလာင် မီ ဂြုဝ်း ကာလုဝ်။

6 အာဆေ ပီခိုက် နဝ်း အန်၊ အန် ပီ ဘော ဟြေတ့် အာငျာန် မိူဝ်၊ အန် တူ ပွိုန်။ ဆေ အီ ယီ နပ် ပီ ပါယ် ဘဲန် မျုဝ် ဘဲန် မျုဝ်၊ အန် ဘော ငှိုယ် နပ် ပေါ န့ ပွါ။

7 တဲး မဲ ကွယ် ကာဂဝ်း ဒီ ဒူအီ ရိုဝ်။ ခုဝ်၊ အာဝ် မိုဝ်း မာဆေ ပီ ဒီ လုဝ် ဟေန် ဒီ အန်။

8 အာငျာန် ဒူအီ လွှက့် တဲး အန် နပ် ပီ ဘူင် အန်။ ဒူအီ ရိုဝ် ယီ ရိုဝ် ကူပ် ဒူပ် အန် အီ တူ မှာန်။

9 ဒူအီ ဟာယ် နပ် ဒီ ကာညး ဒီ မှာပ် ပီ ဘူင် အန်။ ဇဝ်ဖြာ ယီ အိုင် ဒူအီ အီ ဘူင် နာ မှာန်။

10 မဲ ပီ ဘော ခူယ်၊ မဲ ပီ ဘော က့လိုဝ်၊ န့ မုး မီ အာဒါ မဲ အူ ဝီ။ မဲ မိူဝ် တူ ပွိုန် ကာဆာင် ကာယဝ်း ဒွါ ဒီ အီ ဟဝ်။

11 ကာင် ဂေ ဒူအီ ဟာယ်၊ န့ ဒီ ဘော ကေး လိုဝ်။ ထိုပ် ဂေ ဒူအီ ဘွတ်၊ ဒူအီ မွှိုမ် ယီ ကွယ် ဆီချာ။

12 ဆေ မဲ ဒူပ် န့တေန့် ပီ ထာင် မဲ ဟဲ့ မှာန်၊ န့ ဒီ တဲး မဲ ယမ်။

13 ဒူအီ ပီ ဘော ခူယ် ပီ ဘော ကာညး မိူဝ်၊ ခဲင် နဝ်း အန်၊ အန် ယီ နပ် ဒီ ဝီ က့လိုဝ်၊ နပ် ဒီ ဝီ ငှဝ်။ ဆေ နဝ်း ခူယ် နဝ်း ဒါခိုယ် ဟီ တူတ့်၊ န့ မိုဝ်း မီ ဒုက် မီ ညှာပ် ဒီ နဝ်း။

14 ဒူအီ နဝ်း ကာလိင် ကာလဲ၊ အန် ဒီ ဘော ပွိုန် ရုး ပီ ဘူင် အန်၊ တဲး န့ ဘြေ့ ဒွန် မျုဝ်။ ဘော ဒူအီ ဘွတ် ဒူအီ မွှိုမ် ဒီ ယိုဝ် အာဂျိုဝ် ပီ ဘူင် အန်။

15 ဒူအီ ရိုဝ် ဘော ညှိုမ် တူတ့် ခဲ့ ပီ ကာလာင် အီ ဟဝ်။ ဒူအီ အီ လွှက့်၊ အန် ဘော ဟာဝ် နာ မှဝ်၊ အန် ယီ နပ် ဒီ ဆာဒိက်။

16 ဒူအီ အီ မိုဝ်း အာငျာန်၊ အန် နပ် ဒီ ဆာဒိက် ဘော နပ် ဒီ ဝး နာ စီစိဝ်။ ဒူအီ ရိုဝ် ယီ တူ နပ် ဒီ ဆာဒိက်။ အန် ဘော ယ ဒီ ဘူင်။

17 ဒူအီ ကာဟဝ်း၊ အန် ဘော ဘူင် အီ တူ မိုဝ်း ဒီခုဝ်။ အာဆေ ပီ လွှက့် ဒီ အီ၊ အန် ဘဲန် ပီ ဇွင့် အီ။

18 ပီ ဘူင် ဒူအီ တူ လွှက့်၊ ဟဲ့ ဝီ ဘဲန် ခါဂုန် ဒီ အန်။ ဒူအီ အီ မိုဝ်း အာငျာန် ယီ နပ် ဘဲန် မျုဝ် ဘဲန် မျုဝ်၊ တဲး န့ ပီ အန် ဟဲ့ စှိုပ် မင်ဂိုမ်။

19 ဒူအီ တူ မွှိုမ်၊ အန် ဒီ ဘော လုဝ် ဂူမ် ကြိုပ် ဒူအီ ဘွတ် ဒူအီ မွှိုမ်။ ဒူအီ ဟာယ် ဒီ ဘော လုဝ် မုတ် ဂိုပ် ဘာင် မာလုဝ်း ဒူအီ မွှိုမ် တီ။

20 ဒူအီ ဂိန် ဒူအီ အေတ့်၊ အာဝ် မိုဝ်း အာဆေ အီ အိုင်။ ဂိုက် အန် အီ ကွယ် ကာတတ် အန် မိူဝ်၊ တူ လုဝ် တူ အိုင် အန်။ ဒူအီ ခြမ် ယီ မိုဝ်း ဂိုက် ကိူန် ကာဆဝ်။

21 အာဆေ လုက်တာယ် ဒူအီ ဂိန်၊ ဒူအီ အေတ့် အီ ကွယ် ကာတတ် အန်၊ အန် ဘူင် တဲး န့ ဘဲန် မှာပ် ဒီ အန်။ အာဆေ ယီ ကာဝေ ဒူအီ ဂိန်၊ ဒူအီ အေတ့်၊ အန် ဟဲ့ ဒါခိုယ်။

22 ဆေ မဲ ခြာမ် ဒီ ဘူင် နာ ဘွတ်၊ အီ ဟဝ် ဒီ ရွက့် မဲ ဘော ဂမ် မဲ၊ တူ ပိဝ် မဲ ဒေါ မှဝ်။ မာလဲ၊ ဆေ မဲ ခြာမ် ဒီ ဘူင် နာ တူ မွှိုမ်၊ မဲ ဟဲ့ ဟွတ့် ကာလိုပ်။

23 ဂါန် ပီ အွန် မဲ ဒီ ဘူင် ဒွန် မျုဝ်၊ န့ ဒီ ဘဲန် အာဂျိုဝ် ဒီ မဲ။ ဆေ မဲ ယီ အွန် ကာမွုန် ဒီ အီ ဟဝ်၊ မဲ ဒီ ဖ့လာန်၊ မဲ ဒီ အေတ့်။

24 ကြုဝ်ကြာမ် ဒူအီ အီ မိုဝ်း အာငျာန်၊ န့ ဒီ တဲး အီ ရုဝ်ဆေ အန်၊ တဲး န့ ပီ အန် ဟဲ့ စှိုပ် မင်ဂိုမ်။ နာ တူ မွှိုမ် ပီ ဘူင် ဂေ ဒူအီ ရိုဝ်၊ န့ ဒီ ဝဲ တူ မွှိုမ် လွှိုမ် ဘြိမ်။

25 အာဆေ ဘဲန် ဆက်ဆေ အီ ဟဝ်၊ ဆေ အန် ကာလာင် ဆိူဝ် ဆိူဝ် မှာန် မှာန်၊ န့ ဘော ချွတ် အာဆာက် အီ။ ဆေ အန် ယီ ကာလုဝ်၊ ကာလာင် တူ မှာန်၊ အန် ကာယွင့် အီ ဟဝ်။

26 အာဆေ ရုဝ်ဆေ ဇဝ်ဖြာ၊ အန် ဒီ ဘော ကွယ် ဆီချာ။ န့ ပီ ဘော အန် ဘော ဂွန် အန် ဟဲ့ မိုဝ်း ဒူင် ဒီ လိုပ် ချြီင်။

27 ပီ ရုဝ်ဆေ ဇဝ်ဖြာ၊ န့ ဘော ပီ အိုမ် တုဝ်း အီ ဒွါ အာဆာက်။ န့ ဘော နပ် ဒီ စွယ် တဲး အီ လွတ် ယမ်။

28 ဆေ ခုန်ဒီခမ် အိုပ် ဒူအီ ကိူန်၊ န့ ဒီ တဲး အန် မိုဝ်း အာဖုင် တာင်။ ဆေ ဒါ ကာညာ ယီ တူ မိုဝ်း ဒူအီ ခဲင် မာန် မိူင် အန်၊ အန် တူ မိုဝ်း ဒီခုဝ်။

29 ဒူအီ အီ ကွယ် နှိမ်၊ တူ ငှိုယ် ရူ၊ အန် မုး ဒူအီ အီ မိုဝ်း အာငျာန်။ ဒူအီ အီ ကာဟဝ်း ယီ ဘျ ခဲ့ ရိုဝ် အန်။

30 နဝ်း နှိမ် နဝ်း ဇွန်ဇူမ်၊ န့ ဒီ တဲး ဒုဝ် ဘူင့် မဲ ပ့လူမ် ခ။ နဝ်း ဆီ ဆီဂဲ့ ဆီ ပျာတ့် အီ ဟဝ်၊ န့ ဒီ တဲး ကာအာင် မဲ ရာမ်။

31 ဆေ မဲ ခါနှာပ် ဒူအီ ဂိန်၊ ဒူအီ ဖ့လာန်၊ န့ ပီ မဲ တူ ရုဝ်ဆေ ဇဝ်ဖြာ အီ ဖာန် ဘ့လေး ဂေ။ ဆေ မဲ ကာဝေ ဒူအီ ဂိန်၊ ဒူအီ အေတ့်၊ ဟဲ့ ပီ မဲ ရုဝ်ဆေ အန် ဇဝ်။

32 ဒူအီ ဟာယ် ဒီ ဘော ကေး စှိုမ် ဒေါ ဇမ် အန် ဒုက်။ န့ ယီ မုး ဒူအီ အီ ဘူင် နာ ဆိူဝ် နာ မှာန်၊ အန် ပီ ဘော ဟဲ့ ရိန် ဒီ ယမ်၊ အန် ယီ မိုဝ်း ဒူင် ဒီ ပွိုန် ဘိုင်။

33 အာငျာန် ကွယ် ခဲင် နဝ်း ဒူအီ အီ နပ် ပီ ပါယ် ဘဲန် မျုဝ် ဘဲန် မျုဝ်။ အီ ကွယ် ခဲင် နဝ်း ဒူအီ ရိုဝ်၊ န့ ယီ ဒီ လိုဝ်း ဆီချာ။

34 ဆေ ဒါ တာင် ခဲင် မိူင် ဘူင် နာ မုး နာ မှာန်၊ န့ ဘော တဲး ဒူအီ ဟဝ် အိူပ် မျုက် ဒူအီ ဘော မာန် ဘော မိူင်။ ဆေ ဂေ ယီ ဘူင် မှာပ် ဘူင် နာ တူ မွှိုမ်၊ န့ ဒီ တဲး ဒူအီ ဘော မာန် ဘော မိူင် စှိုမ် ဆာရေ။

35 ခုန်ဒီခမ် ဒွန် ကာဒင် ဘော အိုင် ဒဲစေန့် အီ မိုဝ်း အာငျာန်။ ဆေ ဒဲစေန့် အန် ယီ ဘူင် အီ မွှိုမ် ဆာယ်၊ န့ တဲး ခုန်ဒီခမ် ရူ ဒီ အန်။