မ်ဟ 11

လွင် ညှိုမ် ဘိုင် ဇဝ်ဖြာ

အာဒါဝိတ် ဟဲ့ ဒဲမ် မှုဝ် နီ။ တဲး ဒါ အီ ယဲတ့် ဂေ အီ တဝ်း မှုဝ် တိး။

1 အုဝ် ဒီ ဘိုင် ဇဝ်ဖြာ။ အာဝ် လုဝ် အီ တး တဝ်း ဒီ အုဝ်၊ “တဲး မဲ တဝ် ဟာဝ် ကွယ် ဒီ နွန် ပီ မာဆိမ် ဘိုန့် တဝ်။”

2 အာဝ် လုဝ် ကာလာင်၊ “ဂေ ဒူအီ ဟာယ် ဟဲ့ ဟွတ့် ဝိတ့် အ ဂေ၊ ဟဲ့ ဟွတ့် ပိတ် ဘ့လာ ဂေ ဒေါ အပ် ဝွင့်၊ တဝ်း ဒီ ဘန့် ဒူအီ အီ မိုဝ်း နဝ်း ဆိူဝ်။

3 ဆေ အီ ဘွတ် အီ မွှိုမ် ဟဲ့ လိုဝ် ဟဲ့ ကာပျာတ့်၊ ဂေ ဒူအီ နဝ်း ဆိူဝ် အာဝ် ဟူ ပွိုန် ပါယ် မှဝ်။”

4 ဇဝ်ဖြာ ကွယ် ခဲင် ဟုဝ် ဘွတ် အန်။ မာလာင် အန် ဘော ကွယ် ခဲင် ဂါင်ဟြာဝ်။ အန် ဇဝ် ဘော ယွတ် ခဲ့ ကွယ် ဒူအီ ဒဲင် ကာဒါယ် ဘော ယိုဝ် တူတ့် ပီ ဘူင် ဂေ။

5 ဇဝ်ဖြာ ဘော ထေဝ် နဝ်း ဒူအီ မွှိုမ် ဘော ဒူအီ မိူက်။ နဝ်း ဖွိုမ် အန် ဇဝ် ဘော ဇွင့် ဂေ အီ ဘူင် နာ ဟာယ်။

6 ဇဝ်ဖြာ ဘော ဘူင် တဲး ဂေ ဒူအီ မိူက် ဝီ ကာဒုး ဒုက် တာင်။ အန် ဒီ တဲး ငဝ် ဘော ဂန်ဒိူက် စုဝ်း ဒဲင် ဂေ၊ တဲး န့ ပီ ဂ့လာယ် စုဝ်း။ အန် ဇဝ် ဘော ဘူင် တဲး ခုန် ဒါတ် တး ဘုတ် ကာဆဝ်၊ တဲး ဂေ ခမ်၊ ကွဲ့ တဲး ဂေ လွတ်။

7 ဇဝ်ဖြာ ယီ ဘူင် နာ မုး နာ မှာန် ဆေဆေ။ အန် ဘော အိုင် နာ ဘွတ် နာ မွှိုမ်။ ဂေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ဘော ယိုဝ် ဇဝ်ဖြာ။