Boya osaak ominzun bodiit noo na Boisraelita
13
Zonu ominzun, oliuri Moises leiroo zurun baña; bo iin zun opisnozi jaa: Bomonita na bomoabita bozi hilun pkoulor na baña bosi Uzi, 2 zonkont bozi puni antom bi pjik na bowk Israel na opoŋ na mnzup; ma boluk Balaon, antom azu khuzin duzu bowk Israel; ka Uzi Hugul khuzin kminzkun zukolo mnjona. 3 Kero baña te oiimna ominzi leiroo, ze Israel uzuuz bo punun boia, bo ki koulan na boko.Tobias dokoo ze ku Uzi
4 Kero, un ominzun ozo doloo, nmpenen Uzi Eliasibi, ankaunk pkuŋ psi knjiu ksi ku Uzi nja, akoulan na Tobias zonkont boyotni, 5 ka ber lo kuarti kyeek, ze zun bo kbanzi un onhaloi osi ŋun ŋnde, nsensu, itisel na ŋun ŋloŋo, na un onhaloi osi bopenen Uzi, na wyas ojir ondisiñene injaka trigu, pkeme, mnsitidos, nkaŋi phulo ze bolevita, boieh na boieŋ ilumun. 6 Kero un ominzun iri mbazi ika o ze Jerusalen, zonkont, ze ŋnlura32 ŋnsi plin Artaserksis, nliinnieek ninsi Babilonia, nji ya ze ya. Kero nkil ŋloŋo zipi ka nji ya ñaun lo gia antom kak Jerusalen. 7 Nji kak ze Jerusalen. Nji bi me khuzin ki Eliasibi doki, zonkont a hulmunk Tobias kuarti mezu unaam usi ku Uzi. (Figura de casa de Deus). 8 Un ominzun ozi liilin, nji ya punun ŋun Tobias uzuuz , mezu kuarti lis zuri. 9 Ka nji hil baña antom bo jinz-jinzun kuarti, antom bot bokakun zolo ŋun ŋnsi ku Uzi, na un onhaloi osi ŋun ŋnde na nsensu.
Pkakun bolevita utihun boko
10 Ka nji me uz bolevita bozi hulo un bo kdei, un ominzun kaun ka bolevita na boieh ka bo hutun utihun boko ze ku ksi Uzi, ña kak ze ksaal lo kjar. 11 Nji ŋaj bo bomitran, nji yep baka, ezi kaa: Ka ku Uzi bat zaroo? Ka nji du bolevita na boieh, nji kakun baka zutihun boko. 12 Hunkran baña Juda tepdun bina ojir ondisiñene osi trigu, pkeme na mnsitidos ze knjiu. 13 Nji zu nmpenen Uzi anduoi Selemias, nmpis anduoi Zadok na nlevita aloŋo anduoi Pedaias; ka nji pot bundar boko uz Anan awk Zakur, Zakur awk Matanias. Bo hil o boiinz bonhazunki bo hilun pseh pkuŋ psi phai bosinz boko un onhaloi. 14 Uzi ni, lelan, ika ka zimlo ni ze ŋun nji kdoŋi ŋhoŋi na mnjona ze ku un na ŋi nji doŋi ze botihun nu.
Pbaap onu osi phioŋ
15 Zokil ominzun nji iin baña boloŋo ze Juda bo kmpooñki mhuba zonu osi phioŋ. Ka boloŋ kuŋun ŋhuru boko trigu, pkeme, mhuba, mbuk ulimpun na ŋun uzuuz , boka yan ze Jerusalen zonu osi phioŋ. Ka nji zuup boko boki khaap ŋun ŋnde zonu ominzun. 16 Ka boiinz bosi Tiru bonhoki ze Jerusalen boka bina ŋrik na ŋun ŋnsumŋi bi phaap baña bosi Juda ze Jerusalen zonu osi phioŋ. 17 Nji ŋaj boyeek bosi Judá, nji jak baka: Nde tenun khuzin ksi nde doki, ndezi baap onu osi phioŋ injaka onu oiimna. 18 Ka mbaza hunkran boliinde hilun doli on kai Uzi nja bina khuzin uzuuz duzu kmbau ki? Ka nde uz, nde pe pbundar oreu wolo duzu Israel, mnsi nde behmink onu osi phioŋ.
19 Hunkran, kero onu osi phioŋ ozo jaui, ze montana, kero ulimbi ler plumun pieek psi Jerusalen, nji hilan pdis plumun nji jak baka nde ika haul plumun, an onu osi phioŋ zip. Nji zu bopoz bozal nin antom bo ieŋ plumun pieek, ika ka ña neej naŋun, zonu osi phioŋ. 20 Wias uloŋ o ŋias ŋmpuguz bohapa na bohap ŋun uzuuz , boduko zuri bozi fur ze Jerusalen. 21 Ka nji ŋaj boko, nji yep baka: Ezi kaa, nde fur ze kwaŋ omur? Ze nde pot dol olo, njo pzu kñene duzu nde. Zokil ominzun bozi pot bi zonu osi phioŋ. 22 Kero ozipi nji jak bolevita boloŋo antom bo do wojun usi pjinz-jinzun, antom bo hilun pbi pieŋ plumun pieek, antom onu osi phioŋ o onu oiimna. Uzi ni, lelan antom ujourin ze mi priza psi mnjona nu.
23 Zokil ominzun nji sa iin bojudeu bomadoki na bohaz bosi: boasdodita, bomonita na bomoabita. 24 Psoof bowk boko, boka lado orasa osi Asdodi o osi baña boloŋo, bozi ika plado orasa osi bojudeu. 25 Nji unso na boiinz bominzkun, nji zu khuzin duzu boko, nji kob boloŋ, nji dut baka oiel, nji zu baka antom bo bisro na ktiim Uzi, nji jaa: Ndezi pot ophul bowk nde bompili antom bomado na bowk boko boiinz, ka ndezi pot opjek bowk boko bompili antom phul bowk nde boiinz, na nde uz. 26 Ka mbaza bohaz bosi ŋnsaak ŋloŋo bo zukun Salomoŋ nliinIsrael ka juui? Ze psoof ŋnsaak ŋnsumŋi ozi ka nliininjaka lo, Uzi lo fundara, zu lo ka lioo duzu baña Israel uzuuz ka bohaz bompazki bo zua ka juui. 27 Ka nja uz nja pzal mnjaŋzin lo pam pte un Uzi nja jaki nja, Nja pdo khuzin khieek injaka kndaaki, nja pjuu Uzi nja, pmado na bohaz bompazki?"
28 Auk Joiada aloŋ, awk Eliasibi, aieek bopenen Uzi, amar awk Sambalati anhoi orasa oknduoi Oronita . Hunkran nji punun lo zuruni. 29 Uzi ni lelun baka, mnsi bo zopumunk utihun boko injaka bopenen Uzi, bo sa zopun uz phuuz pminzpun psi uzuun dopi na bopenen Uzi na bolevita.
Neemias kakuŋ ŋun zondiima