Bopugi Jiñloo
9
Ze ŋnu ŋntaaj ŋmpuguz na ŋnu ŋuakr ze pli pminzpun, bowk Israel koulor ze ibuur pam pde, timoo ŋnlaku guroo mbool zieene boko. 2 Baña bondawkun bosi kiiñ ksi Israel bo taaslor na baña bompazki. Bo nazi antom zuup pjua boko, na ŋun ŋhuzŋi ŋnsi boliin boko hili doli. 3 Boduko kozoo ze zun boko, ka baña leir zoliuri oiimna osi NYEEK ka boka siink Uzi boko, bokaa ŋori ŋgajinz ze pleir, ze ŋori ŋgajinz ŋnloŋo bo zuup pjua boko, antom ŋupr NYEEK, Uzi boko. 4 Jesua, Bani, Kadmiel, Sebanias, Bani, Serebias, Bani na Kenani bo naz duzu pkak psi bolempi bolevita, bo du NYEEK, Uzi boko na prim pieek. 5 Bolevita Jesua, Kadmiel, Bani, Asabneias, Serebias, Odias, Sebanias na Petaias bo jaa." Nde nazoonn, nde lado un onhoi mnjona ze NYEEK, Uzi nde bani pka otepi, ka bozi ka ptoomi." Ndo jeu baña zah ktiim un knkaki ulujul, khoki duzu mnjona kzahu. 6 Wi nkonu woun NYEEK. Ulemp duzu, anjau ze duzu ze mpezi phal na ŋhuzu uzuuz ŋhoŋi zolo, osaak na irik, na ŋun uzuuz ŋhoŋi ze ŋolo, ubaap ŋa na phila; ka ŋhuzu ŋupru. 7 Wi wo NYEEK, Uzi undati Abroŋ, upunun na ze Ur ze zesi bokaldeu, antom zu lo ktiim Abroŋ. 8 UZUUN iin ujuunslo ka bu hazun zurunu, ka udo phuuz na lo uja wo phula osaak ominzun na iiñ lo, ŋnsaak ŋnsi: Bokananeu, boeteu, boamoreu, boperizeu, bojebuseu, na osi bojirgaseu. UZUUN dol un ujaki zonkont wazni. 9 UZUUN iin omindo boliindo ze Ejitu, uzuun te baka kero bo du ze kwaŋ krik kjenkle. 10 UZUUN do mnjaŋzin na ŋun ŋhatatŋi ze Faro, botihun lo baña lo uzuuz bosi osaak lo, zonkont ubamb mi bo zumi boko pjuuk. Hunkran ktiim un magdun anjau hankri. 11 Uhaul krik zurun boko antom bo hilun pzip ze psoof kolo zo zee onkai, antom, ka ulis bo hilunk ze dook boko ze kndilun injaka plaak pnjetpi ze krik okika kikni. 12 Uzoŋ baka ze pnak na knzun knfaski, zurim uzoŋ baka na knzun ksi uroo, antom kfiiz boko book bo kai phianzin. 13 UZUUN ietoo ze duzu onkuŋ Sinai; ulado na baña nu, hul baka ilul injalii, na ŋiimna ŋnsi ouadadi na ŋiimna ŋmbaapoŋi. 14 UZUUN jukjukun boko antom bo duk bo baap onu osi phioŋ osi un onditni, uzuun zu baka bo dol un uzuun jaki boko, ilul na ŋiimna ze mntum Moises ntihun un . 15 Kero bo kaa ono hul baka kre ksi duzu, kero ka bo kaa olof, upunu mnzup ze plaak pieek antom hul boko. UZUUN jak baka boneej antom bo seh osaak udeŋi iñene, antom bisroo ja wo phul baka.16 Ka boliindo uglo deŋ ieene pezni, bozi te un ujaki boko. 17 Bo ieel pteu, bozi lel ŋun ŋieek ŋhatatŋi ŋnsi ulempŋi boko. Bo pezni ñankni, bo dat boyeek boloŋ antom bo hilun pkak ze pjuuk boko, ka wi wo Uzi bai ka jour pjua, bai kaa kñago, bai ka jan mnjona, bai kjon pdeuz, un kabi kfundar kyeek. Hunkranda uzi kulan baka. 18 Ŋanu bolempi ouai ontik osi iferu iknduoi metal, bo jaa: "Uzi un bi umpuni wi ze Ejitu, bo pot sa lado ŋun ŋnloŋo uz ŋhuzŋi zurunu. 19 Ka wi, zonkont kñago un kyeek uzi kulan baka zolaal, knzun knfaskunk kdukoo ñog ze baka ze pnak, pzoŋ boko ze book; zurim knzun kminzkun ksi uroo kozi hutun pfiiz baka. Antom psoond boko book bo hili ka phia. 20 Hul baka oiek un onjinzi antom pjukjukun boko; uzi hutun phul baka maná antom bo dee; hul baka mnzup antom bo fiŋ olof. 21 Hunkran huldun boko ŋun ŋnde ŋnlur ŋntaaj ŋuakr zolaal, un oloŋ ozi zankl baka; yun boko itimo iozi sokoo ka izim boko iozi huri. 22 Hul baka mnliinna baña, ahi boko ŋnsaak. Bo seh osaak osi Sion nliin ninsi Esboŋ, na osi Og nlin, ninsi Basan. 23 UZUUN bundar bowk baka maakrin injaka ŋuzu duzu usona baka yan osaak uzuun hilunk o jak boliin boko bo pneej antom pka olo. 24 Hunkran bowk boko neejdun seh osaak ominzun; watatun bokananeu bo hili o zosaak ominzun, uzu baka ziñen boko. Hul baña un philun antom bo do boliin na baña bosi ŋnsaak ze mi bo jeumi. 25 Bo seh imbau inlinsi na ozee oniri, bo ka kpe ziku hili sum priza, mnlik mnjipomi, izanz isi mhuba na izanz isi mbuk olivera, na mul mnsumi mbuk. Bo dee, bo ioki, bo magi, bo kuz ŋun ŋnliilŋi, zonkont ŋnjona un ŋmagŋi.
26 Ka bo kak ze pezun, ñankun na wi, bo kulan ŋiimna un bo fiŋ bo hurun nu, bo ŋaj baka bo kak ze wi, bo lemp ŋun ŋnzijraŋi makri. 27 Hunkran uzuun boko ziñen bo bir boko, bon zui boko pjuuk. Ka zokil pjuuk boko bo du. Ze duzu inzun ute baka; ze kñago un kmagki hul baka nmburburun, antom a burburun boko ziñen bon hilunk zu boko pjuuk. 28 Ka zoyar boko hil ka phioŋ bo kak do khuzin zurun nu; hunkran hutnu boko ziñen bo bir boko antom bo hilun plio duzu boko. Ze bo digzanu du, ze duzu uzuun hil akte baka, ze kñago un uburburun baka ŋias ŋnsumŋi. 29 "Uŋag baka antom bo kak ze ŋiimna nu, ka bo kak deŋ ieene, ieel pte ŋun huli boko bo baap; bojuu ze ŋiimna nu, ŋiimna ŋminzŋun ŋa ka hul phila ze bon teuki ŋolo. Bokulani, bo pezni, ieel pte. 30 Ze ŋnlur ŋnsumŋi ujaaŋ baka phiel; oiek un ŋaj baka ze mntum bohurunu; ka bozi zu iuaz. un ominzi kaun ka uzu boko ziñen baña ŋnsaak ŋnloŋo. 31 Ze kñago un kmagki Uzi toom na baka, ka uzi kulan baka, zonkont wo Uzi usi mnjona na kñago.
32 "Hunkranda, Uzi ndo, Uzi uieek, unlinkumbi, un kabi philun uzuuz , bai ka baap phuuz un psi kfundar, ika ka beh pjuuk pmbipink uzuuz duzu ndo, boliin ndo, boyeek boghutun ndo, bopenen ndo bosi Uzi bohurun Uzi, boliin ndo na baña un uzuuz , ptep zokil boliin bosi Asiria anjau hankri. 33 Ugusoo ze khuzin uzuuz kmbiki duzu ndo; uzuun lemp na mnjona, ka ndo lemp ze khuzin. 34 Bolin ndo, boyeek boghutun ndo, bopenen ndo bosi Uzi, na boliin ndo bozi te oiimna nu, ka bozi di pte pŋaj pi uŋajpi boko. 35 Zo kil ominzun bo hil ka boliin boko bo hil ze kuz priza pnsumpi psi huli boko bo hil o ze ozee oniri, ba hani osi huli boko, ka bozi tihunaru ka bozi digzanu antom bo hhutun ŋun ŋhuzin ŋnsi bo hili ze do. 36 Hankri ndo bo juuk, bojuuk zosaak huli boliin ndo antom bo hilun pde mbuk olo na ŋun ŋloŋo ŋnliilŋi ŋnsi osaak buki. 37 Zonkont pjua ndo ozee buk priza olo psi boliin uzui duzu ndo; boka lemp un bojeui na ŋleef ndo na ŋsaam ndo. Ndo o ze kjozi kyeek.
Baña do phuuz zonkont baap ŋiimna
38 Zonkont un ominzi uzuuz , ndo do phuuz pnazpi, ndo pispa; boyeek ndo, bolevita ndo na bopenen ndo bosi Uzi bozu karimbu boko.