Esdras leir olado
8
Kero pli pjaandun jaui, bowk Israel hil o zimbau boko; baña uzuuz koulori, injaka ña loŋ ze Jerusalen zurun plumun pieek psi mnzup. Bo jak Esdras ninjukjukun oiimna antom abi na oliuri oiimna osi Moises, oiimna osi NYEEK hilunk hul Israel. 2 Hunkranda, zonu oseke osi pli pjaandun nmpenen Uzi aminzun Esdras bi na oliuri oiimna zurun bohaz na bopoz uzuuz bo hilunki pme un oknleiri. 3 Aleir zoliuri ominzun ze Jerusalen plumun pieek psi mmuzp, ptep ze khanan anjau ze psoof onu, zurun boiinz, bohaz na bo hilunki pme. Baña uzuuz bo hil sink na piiŋno uleir usi oliuri oiimna. 4 Ninjukjukun oiimna aminzun Esdras, a hil naz duzu pkak psi mndera pho psi utihun uminzun. Ze kñen lo krei bo hil o: Matitias, Sema, Anaias, Urias, Hilkias na Maaseias, ze kñen lo kmai bo hil o: Pedaias, Misael, Malkias Asun, Asbadana, Zakarias na Mesulan. 5 Esdras haul oliuri zurun ikil baña uzuuz , zonkont anazi duzu boko. Kero ka haul oliuri, baña uzuuz bo nazoon nazi antom iiŋnoo. 6 Esdras zah NYEEK, Uzi uieek. Baña uzuuz bo deeŋ iñene, sembi: "Hunkranda! Hunkranda! Bolimo zo zee antom ŋupr NYEEK. 7 Ka Jesua, Bani, Serebias, Jamim, Acube, Sabetai, Hodias, Maaseias, Kelita, Azarias, Jozabade, Hanan, Pelaias na bolevita bo jukjukun baña zoiimna, ka baña hil o zun boko. 8 Boleir zoliuri oiimna Uzi, un onjinzi, ka tezan antom baña hilun pme un oknleiroi.9 Kero baña te olado ominzun osi oiimna, ka bo tep phur. Neemias anhoi nmtran nyeek na Esdras anhili o nmpenen Uzi na ninjukjukun oiimna, na bolevita bo hili ze juk jukun baña, bojak baña uzuuz : "Onu ondai o onu oiimna osi NYEEK, Uzi nde, nde ika iukni ka nde ika huri. 10 Nde solun nde ya de un onsaui, nde dan pran pnliilpi; nde hilan bani pka ŋun ŋnde bo bamuŋi. Zonkont onu ondai o ko onu oiimnani osi NYEEK nja. Nde ika duko na kjozi zonkont mnlina mnsi NYEEK mhoko ofoz nde." 11 Hunkran bolevita zudun baña ka bo iiŋno uzuuz , ka bo jak boko: "Nde joun, zonkont hankri o onu oiimna; nde zi hilun pduko na kjozi." 12 Hunkranda, baña sol uzuuz ya de, bo daani, hilan boloŋ ŋnsi boko, bo do mnlina mieek, zonkont bo mee olado ominzun osi bo zupoi.
Mnlina mnsi nku
13 Zonu opugzan, boyeek uzuuz bosi pliin boko, botihun Uzi na bolevita, bo koulori ya dun Esdras ninjukjukun oiimna, antom pzu ŋnzafu zolado osi oiimna. 14 Bo iin olado ompisoi zoliuri NYEEK hilunk hul Moises, ja bowk Israel bo ka pho ze nku zonah pli pjaandun. 15 Hunkranda, bo hilan pzuup olado antom o tezano zimbau boko uzuuz na Jerusalen, bo jaa: "Nde punun nde ya ze nkuŋ, nde bina inah isi bun unduobi olivera, inah isi piñeru, inah murtera, inah isi mnkem na mul mnloŋ mnkami iku insumii antom plemp nku ze mi opisomi." 16 Baña puni ya bina inah lemp nku, kana ña kak ze ku lo, zuzaanz lo, zunam ku Uzi, zurun plumun pieek psi mnzup, ze kwaŋ plumun pieek psi Efrain. 17 Baña uzuuz bo biin ki pjuuk bo lemp nku antom zo ze ŋolo. O un bowk Israel ani plemp ptep ze ŋnu Joswe, awk Nun, liilun makri. 18 Ze ŋnu Esdras dukoo ze leir zoliuri oiimna osi Uzi, ptep zonu oseke ankint jau zotoomi. Bo baap mnlina mizmun ŋnu jaand, onu obakrin bo koulori antom pmug onah boko ze mi oiimna jaki.