Josué 1

Oliuri osi

Joswe

Uzi lado na Joswe

Kero Moises kezi, ntihun NYEEK, ka NYEEK lado na Joswe, awk Nuŋ, apoz Moises jak lo: 2 "Moises ntihuni, kezi, nazoon ze krankanki antom waño krik Jurdoŋ, wi na baña uki uzuuz, zosaak njoi phul bowk Israel. 3 Zun nde polzi pzima, njo phul nde za, ze mi njonko jak Moises. 4 Ptep zolaal, phya Libanu, ampkint pjau ze krik kyeek, knhoki krik Boeufrate, na osaak uzuuz osi boeteu pjau ze krik kyeek ze phyour onu zozun pho klil nde. 5 Ñazo pho zurunu ze ŋnu uzuuz ze phila nu zosaak. Ze mi njomunk na Moises, hunkran njoun pho na wi. Mbazo phutnu.

6 " Bupun uliinsun, antom uka kziu, woun pzu bañauki phij osaak nji jakunk njo phul boliin nu. 7 Men ze bup pliinsun uka kziu, ubaap ŋiimna ŋnsi Moises ntihun ni jaaŋunk wi. Ika tuunto, ya kñen krei, ka ika ya ze kñen kmai, antom utihun nu yana urun ze zun ukyazi. 8 Ika hutun plado zoliuri oiimna; zaafun na a, pnak na urim, antom udo uzuuz ze mi opisomi. Opzu book nu yana mnjona antom, uyana urun. 9 Mbaza nji hilun wi? Bupun uliinsun, antom uka kziu. Ika kaloo, ika liinki zonkont NYEEK, Uzi nu ona wi zun ukyazi."

Bamno antom phaño krik Jurdoŋ

10 Ka Joswe jak bohuli. 11 Nde zipun ze psoof uzoñnor nde jak boko: "Nde bamna ŋun ŋnde ze ŋnu ŋajinz nde pzip ze krik Jordoŋ, antom nde ka osaak NYEEK, Uzi nde huli nde."

12 Joswe lado na kiiñ Rubeŋ na Bogadita na psoof kiiñ ksi Manases , Joswe jaa: 13 "Nde lelun un Moises, ntihun NYEEK, jaki: NYEEK, Uzi nde ja bophul nde phyooŋ, antom phul nde osaak ondai. 14 Bohar nde, bopoz nde na ŋnsaam nde ŋo pduko zosaak Moises huli nde zojir ondai osi krik Jurdoŋ, onkanu nde bonjaafu, nde pzip na igutnin zurun ze pzaro nde, nde ziinkun boko. 15 An NYEEK zu pzaro nde phyooŋ, injaka nde boloŋ, uz, boko uz bo seh osaak osi NYEEK, Uzi nde huli boko. Zolo nde pseh osaak osi phij nde, antom nde ka, ze mi Moises ntihun NYEEK, huli nde zojirun krik Jurdoŋ ampjau ze pmair onu."

16 Ka bo seemb Joswe, jak lo: ŋun uzuuz ujaki ndo, ndo do, ndo pdoŋa, zun uhilzi ndo ndo ya, ndo phyaza. 17 Ze mi ndo temunk Moises ze ŋun uzuuz , hunkran ndo saun opteu. NYEEK, Uzi nu o pho na wi ze mi uhilunk ona Moises. 18 Boiinz uzuuz, ña ñankni ampte un ujaki, ampte olado nu, ze ŋun uzuuz ujaki lo akfiŋo, bupun uliinso antom uka kziu.