Uzi hugl ktiim Abroŋ
17
Kero Abroŋ ka ŋnlur 99 NYEEK bi ze yaa jaklo: "Njoun Uzi unkawi philun uzuuz . Yaanzan zurun ni antom ujaal. 2 Njo pnazun phuuz ni na wi, njo pbundar kiiñ nu an kint ksum." 3 Abroŋ limo siŋ ween zozee. Uzi jaka: 4 Zojir ni, uni oko phuuz ni na wi. Wo pho aliin ŋnrasa ŋnsumŋi ze ŋnsaak. 5 Ktiim nu kozi pot o pdwo Abroŋ ko pdwo Abroŋ, zonkont njo pzuu antom wo aliin ŋnrasa ŋnsumŋi ze ŋnsaak. 6 Njo pzuu antom ubuk maakrin, ŋnrasa ŋnsumŋi zosaak ŋho pun ze wi na boliin uz. 7 Njo pzu phuuz ni ze psoof ni na wi, na bowku bonhoki buko ze kfezu, na iiñ boko, phuuz phopi pduko oloŋ, antom njo pho Uzi nu, Uzi usi kiiñ khoki buko ze kfezu. 8 Osaak uzuuz osi Kanan osi woi nya ze krankanki njo phulu a, antom o osinu oloŋ. O pho osi iiñ nu yoi buko ze kfezu, njoun pho Uzi boko.Boat pleke
9 Uzi pot jak Abroŋ: "Wi baapun phuuz ni, wi na bowku na bowk boko ze kfezu na iiñ boko. 10 Uni o phuuz ni na wi na bowku boi o buko ze kfezu, phuuz ukapi pbaap. Boiinz uzuuz ze psoof nde ka phato pleke. 11 Nde phato pleke; uni o pho mnjaŋzin mnsi phuuz ze psoof ni na nde. 12 Ña ambukoi ka ŋnu 8 a ka phato pleke ze posof nde, boiinz uzuuz ze baña nu, nhya ambukoi ze mez nu, anganzoi injaka nhya na onsaam praata ziñen bo ya, anipho nsi baña nu. 13 Zabuko ze mez nu, ka a sa ganzo na onsaam praata nu, a ka phato pleke. Phuuz ni ze ŋnleef nde o pho phuuz pnzañi. 14 Ñiinz aniphato pleke a ka pdiitno ze baña lo, zonkont akit phuuz ni.
Uzi hugl ktiim Sarai
15 Uzi pot jak Abroŋ: "Sarai a aharu, uzi pot opdwa Sarai, ktiim lo opdwo Sara. 16 Zonkont njo pzwa mnjona. Njo phulu nmpoz aloŋ na lo. Njo pzwa mnjona; apho aniin ŋnrasa ŋnsumŋi; boliin ŋnrasa uzuuz zosaak bo pun ze yaa. 17 Abroŋ limoo siŋ ween zozee antom jii, aja ze ŋnzaafu lo: "Njo ñiinz anhoi o ka ŋnlur 100. Ka nji hilun pbuk nmpoz? Ka Sara hilun pleempo na ŋnlur 90? 18 Abroŋ jak Uzi: "Nji jeu antom uzu pkil duzu Ismael. 19 Uzi jaka: "''Owadadi, Sara aharu apbuk nmpoz, wo pdwa ktiim Jaaki. Njo pnazun phuuz ni na lo, pozo ptoom, na kiiñ khoki pbi ze kfez lo. 20 Ka Ismael uz, nji te un ujaki. Njo pzwa mnjona, njo pzwa abuk bopoz bonsumki, antom kiiña lo bundar maakrin. Apbuk bohuli 12. njo pzu kiiñ lo kmag. 21 Ka njo pnazun phuuz ni na Jaaki, asi Sara oi pbuk pkil ze klehe nja onkin. 22 Kero utoom plado na Abroŋ, Uzi hutun lo, payo antom mei.
Plek hatoo
23 Zonu ominzun, Abroŋ jek awk lo Ismael na bombukokunk uzuuz ze mez lo, bonganzokunk uzuuz na onsaam praata lo boiinz uzuuz ze mez lo bo phato pleke, ze mi Uzi hil mi lo. 24 Abroŋ hil ka 99 kero a hato pleke. 25 Awk lo Ismael, a hato pleke na ŋnlur 13. 26 Abroŋ na awk lo Ismael bo hato pleke zonu oloŋ. 27 Boiinz uzuuz bosi mez Abroŋ, bombukokunk ze mez lo na bonganzoki na onsaam praata, bo hato pleke na yaa.