Id Pokita 1

DOS ID POKITA

ni Disas Krays ki Juan

Id Pokita

Kodpokilaa

¹ Nokosulat ka‑ay’n libru iddos id pokita to Monama ki Disas Krays, amoy id posaddoo rin mandad diyon tod pompomakoy iddos od inguma pon od kotomanan to diid kouhoy. Woy id pokita ni Disas Krays ini ukit to ponolihan no id suhu rin dinit koddi no uripon din no si Juan. ² Id sulat ku ka‑ay iddos langun no nokita ku moka‑atag taddot ponudtulon to Monama no id posivonnalan ni Disas Krays. ³ Moppiya kod kotomanan taddot minuvu no od basa ka‑ay’t id poponudtuu to Monama riyon tod lolivuung nod pompomakoy. Moppiya mandad kod kotomanan taddot od pominog, woy taddot od tuman to langun no nokosulat ka‑ay, oyya su diid kouhoy, od inguma en inin kotomanan.

^4‑5 Siyak si Juan kos id popiyod ka‑ay’n sulat atag to pittun id lolivuung nod pompomakoy no id pon‑ubpa riyot mgo bonuwa no sakup to Asia.

Muopa no iddos Monama, dos Ispiritu woy si Disas Krays, od pokita koniyu to eru woy kosunayan. Dos Monama, duwon don tapoy to waa pa iddos tigkonayan to ingod, ahad ko‑ungkay, woy taman to waad tomanon. Na moka‑atag taddot Ispiritu, diyon sikandin to isowwan to trunu to Monama. Si Disas Krays kos od kosolihan no tohodposivonnaa to kahit Monama. Sikandin kos unnon novadnow, woy od hari to langun no ponguu ka‑ay to ampow’t ingod.

Id ginowannan ki nikandin, woy id polegguang to kodsilut atag to keton mgo saa ukit to longossa rin. ⁶ Id polonug ki nikandin to kodhari rin amoy’d ponguu duma kandin, woy id bovallan ki no mgo tohodbuwis no od puung atag to Monama no Amoy rin woy Monama rin mandad. De‑en muopa nod posivontuhon si Disas Krays, woy od hari sikandin to waad tomanon. Oyya, od kotuman en ini.

⁷ Pomotawi row! Od livod si Disas Krays duma to souhapun, woy od pokokita kandin kos langun, ahad iddos id pakpak kandin diyon to krus. Woy mopet kos sinoggawon to langun no tribu ka‑ay to ampow’t ingod pomon to allak dan. Oyya, od kotuman en ini!

⁸ Dos Monama nod Longaggon no Motuus to Langun, mid ikahi to,

“Siyak kos Alpa woy Omega, no iddos kohulugan, dos tigkonayan woy dos kotompusan. Duwon ad to waa pa iddos tigkonayan to ingod, ahad ko‑ungkay, woy taman to waad tomanon.”

Dos Kodpokita ni Disas ki Juan

⁹ Siyak si Juan no suwod dow to kopomakoy, no duma row riyon to kodharit Monama woy riyot kodti‑is to mgo kodposuppit. Su id pohos a tid piyod diyot isla to Patmos pomon to kodponudtuu ku to kahit Monama, woy pomon to kodposivonnaa ku moka‑atag ki Disas. ¹⁰ Sokkad no allow to allow’t Linggu, no idda en kos timpu to kodsimba riyon tod Longaggon, no‑iroomman a to kotuusan to Ispiritu to Monama. Na riyot inoyyuhan ku, norinog ku no duwon morahing no bawos iling to trumpeta ¹¹ no mid ungketen to, “Sulat du kos langun nod kokita ru, woy popiyod du riyon to pittun id lolivuung nod pompomakoy no riyot mgo bonuwa to Efeso, Smirna, Pergamo, Tiatira, Sardis, Filadelfia woy riyot Laodicea.”

¹² To norinog ku idda, mid loingoy a amoy’d kokita ku iddos id ooseng koddi. Na iyon ku nokita, iddos pittun tootawwan to suu no buawan no id poohinat. ¹³ Diyot tongannan tadda, duwon id lohinat no immat minuvu no mowwet kos umpak taman to pa‑a rin, woy riyot kabpa rin, duwon ollon no buawan. ¹⁴ Dos bowvuut uu rin, moputiputi, woy dos mata rin, iling to loglog to apuy. ¹⁵ Iddos pa‑a rin, od sellow iling to brunsi no id tunow to apuy woy id posellow. Dos bawos din, golid gohonugguu iling to dakkoon tousuvan. ¹⁶ Na riyot kowanan no bollad din, duwon pittun molison no bitu‑on no id somaddan din. Woy riyot bivig din, duwon id leggua no polihuma no oruwa kos taom. Dos bonnong din, od pokoselang iling to allow timpu to moko‑untud.

¹⁷ To nokita ku sikandin, nopiloy a riyon lomig to pa‑a rin no immat id patoy ad. Piru id somaddan a nikandin to kowanan no bollad din, woy kahi rin to, “Yo kod kovaakki. Siyak kos Tigkonayan woy dos Kotompusan. ¹⁸ Siyak kos ma‑antoy. Id patoy a piru ontongngiyu, ma‑antoy a taman to waad tomanon. No‑iraom to koddin kotungud iddos kopotayan woy dos ingod tid poomatoy no id ngoranan no Hades. ¹⁹ De‑en sulat du kos langun no id pokita ku kikow, dos od kotomanan ko‑ungkay woy ahad init morin allow. ²⁰ Na, id ponudtuu ku kikow kos kohulugan taddot waa id posaddoo dangan moka‑atag taddot pittun bitu‑on no nokita ru ka‑ay’t kowanan no bollad ku, woy dos pittun suu no buawan no id poohinat. Dos pittun bitu‑on, idda en kos pittun sinuhuwan to Monama no od tamong taddot id lolivuung nod pompomakoy riyot pittun bonuwa. Woy dos pittun suu nid poohinat, idda en kos pittun id lolivuung nod pompomakoy riyot pittun bonuwa.”