Ʉkʉbʉtuufya ʉbʉnunu bwa NTWA
113
Muntuufyege ɄNTWA!
 
Ʉmwe mwe babombeli baa NTWA,
mujɨtuufyege ɨngamu jaake.
2 Ɨngamu jaa NTWA jɨtuufigwege,
ʉkwandɨla ʉlʉ na bwila na bwila.
3 Ʉkʉfuma kʉbʉsookelo mpaka kʉbʉjongelo,
jɨtuufigwege ɨngamu jaa NTWA.
 
4 ɄNTWA nkʉlʉmba gwa fiisʉ fyosa,
ʉbʉsisya bwake bʉbalaniile mpaka kʉmwanya.
5 Jwani afwene nʉ NTWA, Kyala gwɨtʉ?
Ʉmwene atʉʉgeele kʉmwanya,
6 looli ikʉkeeta paasi,
ikʉkeeta ʉmpaalanga nɨ kiisʉ.
 
7 Ikʉbasumusya abalondo ʉkʉfuma ndʉfumbɨ,
ikʉbiinʉla abafweje mboonywa bwabo.
8 Ikʉbabɨɨka pamopeene na bakʉlʉmba,
palɨkɨmo na bakʉlʉmba baa bandʉ baake.
9 Ikʉmpa akaaja ʉnkiikʉlʉ ʉnngʉmba,
ikʉmpela ʉkʉja nna gwa baana, ikʉnhobosya.
 
Muntuufyege ɄNTWA!