Ʉlwipuuto lwa kʉsʉʉma ʉbʉtʉʉli
Kʉ mpaali gwa lwɨmbo. Ʉkʉkongana nʉ lwɨmbo ʉlʉ bikʉtɨ, Ʉlɨngoonanga. Ʉlwɨmbo ʉlwa Ndaabɨti, Mikitami, ʉlʉ aalyɨmbile bo ammbopile Saʉli nʉ kwibɨɨlɨla mu mbako.a
57
Gwe Kyala, ʉlɨɨmbaakɨsya, ʉmbaakɨsye ʉne,
ngʉbopela kʉmyako kʉkwifisa.
Nkɨpepo kya mapɨko gaako mo ngʉponelaga,
ʉkwakʉfika apa ʉlʉpyuto lʉkɨndile.
2 Ngʉʉndɨlɨla Kyala ʉNkʉlʉmba,
Kyala ʉjʉ ikʉʉnosya.
3 Ikʉndwalɨla ʉbʉtʉʉli ʉkʉfuma kʉmwanya, ikʉmboka,
ikʉbasʉʉsya aba bikʉlwa na niine. Sela
Kyala ikʉndʉmɨla iipyana lyake nʉ bwanalooli bwake.
 
4 Ʉne nsyʉngʉʉtɨliigwe na balʉgʉ,
aba balɨ bo ɨngalamu ɨsi sikʉlya abandʉ.
Amiino gaabo galɨ bo ʉlwa ngwego nɨ mitipʉlo,
ɨndɨmi syabo silɨ bo ɨnyʉʉbo ɨnyʉʉgi fiijo.
 
5 Gwe Kyala, gwɨmɨkigwege kʉmwanya,
ʉbʉsisya bwako bʉbalanilege pakiisʉ poosa.
 
6 Abalʉgʉ bategile ʉlwelo ʉkʉtɨ bangole,
nsulumeenie fiijo.
Bakʉmbile ʉbwina mu njɨla jangʉ,
looli basolokiilemo baabo. Sela
 
7 Gwe Kyala, ɨndumbula jangʉ jiitotiike mmyako,
ɨndumbula jangʉ jiitotiike mmyako,
angʉkwɨmbɨlaga nʉ kʉkʉpaala ʉgwe.
8 Gwe ndumbula jangʉ, lembʉka!
Gwe kɨsango na gwe ipango, lembʉka!
Angʉlaabɨla ʉkʉkwɨmbɨla kʉbʉkye.
9 Gwe Ntwa, ngʉkʉgwɨlaga ʉlʉpi mfikolo ɨfya bandʉ,
ngʉkwɨmbɨlaga ɨnduufyo mfilʉndɨlo ɨfya bandʉ.
10 Iipyana lyako ikʉlʉmba ʉkʉkɨnda ʉmpaalanga,
ʉbʉsʉʉbɨligwa bwako bʉfikile na kʉmwanya.
 
11 Gwe Kyala, gwɨmɨkigwege kʉmwanya,
ʉbʉsisya bwako bʉbalanilege pakiisʉ poosa.