Ʉlwipuuto lwa kʉnsʉʉbɨla Kyala
Kʉ mpaali gwa lwɨmbo. Ʉkʉkongana nʉ lwɨmbo ʉlʉ bikʉtɨ, Ɨngʉnde ɨjɨ jɨlɨ kɨmyemye ɨjaa kʉbʉtali. Ʉlwɨmbo ʉlwa Ndaabɨti, Mikitami, aalyɨmbile bo bankolile aBafilisiti mu Gati.a
56
Gwe Kyala ʉʉmbaakɨsye,namanga abalʉgʉ bikʉʉfwɨma,
ʉmuusi goosa bikʉlwa na niine.
2 Ʉmuusi goosa abalʉgʉ bangʉ bikʉʉfwɨma,
bingi fiijo aba bikʉlwa na niine.
3 Bo ndɨ nʉ lʉtende,
ngʉkʉsʉʉbɨlaga ʉgwe.
4 Ngʉlɨpaala iisyʉ lya Kyala,
ngʉnsʉʉbɨla Kyala, ndikʉtiila.
Ʉmundʉ aikʉʉmbombela ɨfiki?
5 Iisikʉ lyosa bikʉfufania ɨsi ngʉjoba,
bikʉʉnyiinogonela syene ɨsya kʉʉfulasya.
6 Bikʉkomaana ʉkʉbaatɨka ʉkʉʉsigɨla,
bikʉʉfwɨma ʉkʉtɨ baangoge.
7 Ʉlɨngabaleka ababiibi abo ʉkʉpona.
Gwe Kyala, ʉbapyute nɨ ngalalɨsi syako.
8 Ʉgameenye amaasosi gangʉ,
ʉsimbile ɨnongwa syake mwa kalata gwako,
bʉle, ʉtikʉgakʉmbʉka?
9 Bo nsʉʉmile ʉbʉtʉʉli bwako,
abalʉgʉ bangʉ bikʉgomosigwa kʉnyuma.
Po mmeenye ʉkʉtɨ Kyala alɨ kʉkɨbafu kyangʉ.
10 Ngʉlɨpaala iisyʉ lya Kyala,
ɄNTWA ʉjʉ ngʉlɨpaala iisyʉ lyake.
11 Ngʉnsʉʉbɨla Kyala, ndikʉtiila,
ʉmundʉ abagiile ʉkʉʉmbombela ɨfiki?
12 Gwe Kyala ngʉsoosyaga ɨfi mfingile,
ngʉsoosyaga amakemo agaa kʉkʉgwɨla ʉlʉpi.
13 Namanga ʉmbokile mbʉfwe,
nalooli, ʉʉndɨndɨliile ʉkʉtɨ ndɨngagwa.
Ʉne ndɨ ndʉmuli lwa Kyala,
ʉlʉ lukʉtwala ʉbʉʉmi.