Ʉlwipuuto ʉlwa namajolo ʉlwa kʉsʉʉma ʉbʉtʉʉli
Kʉ mpaali gwa lwɨmbo. Ʉlwɨmbo ʉlwa Ndaabɨti, ʉlwa kwɨmbɨla ɨfyombo fya mbote.
4
Gwe Kyala gwangʉ, gwe ngolofu,ʉlɨɨnyaamula bo ngʉkʉsʉʉma!
Ʉmboke bo ndɨ mbʉtolwe,
ʉpɨlɨke ʉlwipuuto lwangʉ, ʉmbaakɨsye.
2 Mwe bandʉ ʉmwe,
mpaka ndɨli mukʉʉfujulaga?
Mukʉsiganaga ɨsya bʉkonyofu mpaka ndɨli?
Mpaka ndɨli mukʉkongaga ɨsya bʉtʉngʉlʉ? Sela
3 Looli mumanyege ʉkʉtɨ ɄNTWA,
ansʉngwile ʉjʉ ikʉntiila,
ikʉmbɨlɨka bo ngʉnsʉʉma.
4 Lɨnga mukaleele, mulɨngabombaga ʉbʉtʉlanongwa.
Bo mulambaleele mfitala fyɨnu,
mwijeeneesyege nʉ kʉja kɨmyemye.a Sela
5 Musoosyege amakemo amagolofu,
nʉ kʉnsʉʉbɨla ɄNTWA.
6 Bingi bikʉjoba bikʉtɨ,
“Jo jwani ʉgwa kʉtʉnangɨsya ɨnunu?”
Gwe NTWA, ʉtʉmulɨkɨlege kʉ booloolo bwako.
7 Ʉmbeele ʉlʉsekelo ʉlwingi mu ndumbula,
ʉkʉkɨnda aba balɨ nɨ findʉ nɨ finga ɨnyingi.
8 Ngʉlambalala nʉ kʉgona ʉtʉlo nʉ lʉtengaano,
paapo ʉgwe gwe NTWA gwimwene,
jo ʉgwe kʉʉndɨndɨlɨla.