Ʉlwipuuto ʉlwa nʉlʉbʉnjʉ ʉlwa kʉsʉʉma ʉbʉtʉʉli
Ʉlwɨmbo ʉlwa Ndaabɨti bo ikʉmmbopa ʉmwanaake Abisalomu.a
3
Gwe NTWA, ndɨ na balʉgʉ bingi,bingi fiijo aba bikʉlwa na niine.
2 Bingi bikʉʉnjoba ʉne bikʉtɨ,
“Kyala akabagɨla ʉkʉmpoka.” Selab
3 Looli gwe NTWA, ʉlɨ ngʉlʉ jangʉ ɨfibafu fyosa,
kʉmba ʉbʉtoli nʉ kʉngasya.
4 Gwe NTWA gwangʉ, ngʉlaata ʉkʉkʉlɨlɨla,
ʉgwe kʉʉnyaamula ʉkʉfuma pa kyamba kyako ɨkiikemo. Sela
5 Ngʉlambalala nʉ kʉgona ʉtʉlo,
po ngʉlembʉka kanunu namanga ʉgwe gwe NTWA kʉʉndɨndɨlɨla.
6 Ndikʉbatiila abandʉ baelʉfu na baelʉfu,
aba baasyʉngʉʉtiile ɨfibafu fyosa.
7 Gwe NTWA, gwise,
ʉmboke Kyala gwangʉ,
ʉbakome mbʉsaja abalʉgʉ bangʉ boosa,
ʉbakoomole amiino abaniongafu.
8 Ʉbʉpoki bukʉfuma kʉ NTWA,
ɨsajo syako sijege kʉ bandʉ baako. Sela