26
Daud Ipenei Tau Ihunu Saul Honu
1 Taue isa sio arihoni nia Zif ohokaso pani Saul pani nia Gibea osima oahata, “Upu. Daud waira iauhuniki roe pupue wani nanae Pupue Hakhila. Pupue wani haineke otoe huie Yehuda.”
2 Saul iatinu sanrei oyo ieu ikata ne sio soratatua wasoni sio nihu tonu. Sio wasoni sio iaka onesi sio Israel pusiso. Oeuso onina Daud opusu otoe huie Zif. 3 Saul sio ohokaso mai arena nusue oyo oapuoo no numau waroni onanare arihoni makapana unta. Oapuoore poe Pupue Hakhila. Saul iruei mai arena nusue. Daud iruei ria otoe huie. Reiso sio osima osi Daud oahata, “Ama. Ami anoo Saul sio wasonau arena nusue reinau.” 4 Reiso Daud iaisosi ne sio wasoni osaka-saka osima-sima osiki na oeu onoo ata kani titue-titue Saul waini ihokai. 5 Oeu onoo, ohoka mai, oyo oahata, “E-e. Titue. Saul wainau oi.”
Iatinu sanrei oyo ieui rei sirinia. Ieu nau Saul sio. Ieui, hoka nau Saul ne numa unte. Ihokai nau oyo inoo Saul wainau inekei. Saul inekei haineke Abner. Abner sahoro waini ia mainae tau Saul ne soratatua. Amai tau Ner. Saul ne numa unte rei wani paka tihue nai osa. Ne soratatua no numa unta waroni rahoriki.
6 Inoo sanrei iasei tau Ahimelekh, ia arihoni sio Het runa etei Abisai. Iahata, “Ia seia mka inusu ikataku pani Saul sio?”
Abisai iahata, “Au ete.” Abisai wanini tau Yoab. Inai tau Zeruya.
7 Tau mono rei Daud runa Abisai uaso onususo pani Saul sio. Nususo hoka pani, uaso onoo Saul waipo inekei poe ne soratatua pusiso tihue. Onoo ne atiene inonai poe tuamane erehaineke unui. Abner runa ne soratatua onekeso ohoriki pani tihue. 8 Onooso pusi sanrei oyo Abisai iasau osi Daud sanrei, “Anahatana irui me nisa osia tau mono reipani nea rei. Reiso atapiku na unona atiene rei tau Saul rotu-tu ereniku poe tuamane. Unonai nai osa mani, unonai nai ua tewa oi! Nai osa rei mani oyo imatai.”
9 Ne iahata, “Pene ahunui. Anahatana mka iapasana ia seia waini iuna kahatene tau aia waini ia ruai ihitiki. 10 Usopa tau Anahatana waini iamahaiki, au uanei mka Anahatana ruai ihunui. Munata ne ukuro hasae rei nea mka imatai. Te mka imatai tau manahitane te. 11 Ne uainisi na Anahatana ineteku na upene uhunu ia onate aia waini ruai ihitiki. Reiso hasae anana atiene reino runa ne tihu naniae reino waroni haineke unui na mai na ieuta.”
12 Reiso Daud inana Saul ne atiene runa ne tihu naniae waroni rahaineke unui rei. Onanare oyo oeuso. Ia isa arihoni sio soratatua rei iae, inooso tewa. Ia isa arihoni sio rei mani ianei tewa oi. Ia isa imaranai tewa. Tau sae, Anahatana iuna pusiso oneke munuso.
13 Oyo Daud on roe imusu oyo suru roe inoa roe pupue isa on pani hae honu. Inoa rotu-tu ihokai roe pupue usene ihainau arihoni Saul sio. 14 Oyo on roe iakapona poe Abner runa ne sio soratatua. Iahata, “Abner. Ano wamo atinu nioku?”
Abner on poe iasei ata, “Ano seia wamo aka-kapona reino?”
15 Iahata, “Abner. Ano mo, ano hanaie tewa? Ia seia mai Israel reini iamkona sani ano? Ano asaka upumu ia onate aia tewa taa hae? Ia isa matoro ieui roe tanumo nanie ihunu upumu ia onate aia rei. 16 Ano asaka upumu iake tewa. Usopa tau Anahatana waini iamahaiki omi pusimo kahurae omatamo oo. Tau sae, osaka moa upu iake tewa. Ia mo, ia onate aia waini Anahatana ihitiki. Masi onoo. Ia onate ne atiene wanpa? Ne tihu naniae wani sinasi paka unui reimo wanpa?”
17 Ne Saul iationa Daud nioi reiso iasei. Iahata, “Anaku Daud. Ano reino si?”
Iahata, “E-e au reini tea. Upu. 18 Ano asui-suiku kuru taa haa rei? We masana sae tanua? 19 Upu. Masi atinu we anamanae reini ee. Munata Anahatana sahoro iaisosia nanie ahita runaku, areimo mka urui sae isa osiki oyo anoi eresaa tanuso tewa nea. Ne munata tumata sahoro iaisosia, areimo uainisi na Anahatana irui kahatene osiki. Tau sae, sio oaisosia nanie ahunuku rotu-tu aneiku arihoni tuamane wani Anahatana iruiki osita. Aneiku rotu-tu urumaku sui sio niana wasoni oainisi oainaa runa anahatanau waroni titue tewa. 20 Pene atapiku umataku noi tuama tamene hainau arihoni Anahatana naniai. Ahokaya mai anina na nanie ahunuku tau sae? Au mo, nooku sani utu mani rei? Aninaku sani anina muma taa hae?”
21 Iahata, “Au una sana tanua honu. Anaku anunia mai. Au mka una kahatene tanua tewa nea. Monosi ano apuhaiku nea reiso au mka una kahatene tanua tewa nea. Uariruneku. Au una sana tanua naiosa.”
22 Iahata, “Me atiene reini. Aisosi ia isa mai na inanai. 23 Mka Anahatana irui iake osi ia seia waini anoi manisate. Ia seia waini iparisaa. Masike monosi Anahatana iruia nanie uhunua iae, au upeneku una kahatene tau ia onate aia waini Anahatana ihitiki. 24 Reiso au uhunu ano tewa oi ne uapuhaia reiso uainisi na Anahatana iae iapuhaiku arihoni sirakau pusire.”
25 Iahata, “Anaku Daud. Uainisi na Anahatana irui iake osia. Uainisi na Anahatana iakahaia na me taneiu pusire raeu iake.”
Oanamana pusi oyo Saul inuniki pani ne numa. Oo Daud ieui honu.
Saul Ieu Pani Ia Saruane
3 Samuel imatai nea. Sio Israel pusiso oapunokoi. Okaniki ria ne niane wani nanae Rama. Naone Saul inei sio wasoni ouna nau runa sio saruana no tonata pusiso.
4 Reiso sio Filistin no soratatua pusiso wasopa haineke nia Sunem. Saul iae iamanou ne sio soratatua. Iamanouso onekeso roe Tinetae Gilboa. 5 Taa Saul inoo sio Filistin no sio soratatua rei, reiso ikaitau hunu ruai. 6 Reiso nanie iasei arihoni Anahatana. Ne Anahatana ipenei isima osiki nea. Masike tau niine iae, isima tewa. Masike tau ia waini iaunutu anoi na isima runa mka pani muie sapani iae, isima tewa. Masike tau Urim runa Tumim iae, isima tewa. Urim runa Tumim mo, waroni sani hatu ikina ua. Sio mamkenu makapanau osi Anahatana opakere na oanei ne maue. Nooi sani nau. 7 Reiso Saul iasau osi ne sio makahaia. Iahata, “Onana sio saruana no tonate isa. No tonate waini sio saruana osipuso tanui. Tonate reimo, ia pina. Oninai na ueuku noi tanui na uasei runa sae isa arihoniki.”
Ne makahaia rei oahata, “Pani En-Dor mo, sio saruana no tonate isa waipani.”
8 Reiso Saul inete uai anoe runa iausahu api tamena na pene sio umau oationai. Ieui ikata sio hanaia ua. Oeuso rotu-tu ohokaso pani ia tonate rei. Ohokaso pani tau pumono. Ohokaso pani oyo Saul iaisosi ia tonate sanrei. Iahata, “Aoi saruane waini mka uhete nanai osia. Aoiki na ainisi na ia iaunutu anoi na isima mka pani muie sapani.”
9 Ia pina rei iahata, “Upu. Ano anei tea? Naone ia onate aia Saul inei sio saruana no tonata pusiso arihoni Israel rei tea? Inei sio pusiso wasoni ouna nau tea. Ne ano nanie akarotaku na nanie sio ohunuku taa hae?”
10 Ne Saul isopa iahata, “Uainisi tau Anahatana waini iamahaiki. Au utotoe osia mka sio oapasanaya tewa tau auna sanrei.”
11 Reiso iasei, “Nanie uoi ia sarua seia osia?”
Iahata, “Samuel.”
12 Oyo ioi Samuel. Isipui oyo ia pina rei inooi. Inooi oyo iasanoata. Iasanoata samatoro iahata osi Saul, “Ano nanie akarotaku taa hae? Aikee ano mo aia Saul. Ne asima runa ruamu tewa.”
13 Iahata, “Pene kaitau. Masi asima runa sae wani anooi rei.”
Iahata, “Au unoo saruane isa ihokai on poe tuamane.”
14 Iasei iahata, “Uai anoe sapani?”
Iahata, “Ia ona kore-korene isa. On poe ihokai iausahu ne papi naue isa.”
Reiso Saul ianei ata ia reimo Samuel. Oyo ihahue tanui.
15 Taa ihokai roe oyo iahata, “Saul. Ano oiku nanie usipuku mai nanie taa hae?”
Iahata, “Upu. Au wani au susa mainae. Tau sae, sio Filistin no sio soratatua wasoni oahita runama. Samatoro Anahatana iuni iarihoniku nea. Ianamana osiku tewa nea. Masike tau sio wasoni oaunutu anoo iae, ianamana tewa. Masike tau niine iae, isima osiku tewa oi. Reiso au uoia rei tea. Nanie uasei tanua. Na ano asima runa sapani na ukua sio Filistin rei.”
16 Iahata, “Ano nanie oi au, nanie taa hae? Aikee Anahatana iuni iarihonia na iuna me nisa. 17 Iuna sani au uaunutu anoku tanure nea. Ipenei tau ano auna aia tau sio Israel nea. Reiso iuna Daud nanie iuna aia nea. 18 Ano anesi ne maunauna. Anesire apenea tau ahunu sio Amalek pusiso. Apenea tau apahia no apia pusire. Reiso muie reini Anahatana iunaya sanrei. 19 Ano runa me soratatua pusimo, mka Anahatana iruimo osi sio Filistin. Hanroe ano runa me hehuka hanaia tonu mka omatamo opusuku. Runa me sio soratatua pusiso mka Anahatana iruiso osi sio Filistin.”
20 Mata huni tewa oyo Saul iamnohoi poe tuamane. Iamnohoi iasasonai. Tau sae, ia ikaitau tau iatinu Samuel iasau sanrei. Imankae tau iai tewa on potusi rotu-tu mono. 21 Ia pina rei ieui mai haineke Saul inoo ata ikaitau. Reiso iahata, “Upu. Sinasi au uatinu tanua nea. Uoi Samuel na isipui nea. Masike mka umataku iae, au uatinu tanua. 22 Reiso uainisi na ano atinu tanuku oi. Aia mkane arihoni muaina waroni au mka uaunuture osia. Aia na amkona na aeu kua.”
23 Ne Saul ipenei. Iahata, “Au upeneku uai.”
Ne sio makahaia oasau nesiki oyo ipusu. Ihitio arihoni tuamane iruei roe koi. Iruei roe 24 oyo ia pina rei irehi koropou anae wani pokotuene samatoro inana tarigu. Inanai samatoro iposo pisai runa tihu iuna poroti wani erepake mnehue tewa. 25 Iuna pusire oyo irata muaina rai osi Saul runa ne makahaia oaiso. Oaiso pusi oyo oeuso tau mono rei sirinia.