24
Daud Ipenei Tau Ihunu Saul
1 Saul sio onuniso on pani manahitane. Oahita runa sio Filistin. Hoka mai oyo sio umau osima oahata, “Upu. Daud sio wasora otoe huie haineke En-Gedi.”
2 Saul iatinu sanrei oyo inini ne sio soratatua sio nihu tonu. Inini sio wasoni oanei oahita iake arihoni sio pusiso mai Israel. Ininiso oyo oeu onina Daud runa ne sio soratatua. Oninaso ria tinetae wani nanae Hatu Tineta Une-une Seae. 3 Saul sio oeu rotu-tu ohoka haineke rompau nene kokau mai arena nusue. Mai arena nusue reimo hatu nohue isa wani. Reiso Saul inusui pani iapunohui. Pani hatu nohue rei iae Daud sio wasopa oauhuniso oi. Ne sio oauhuniso hainau mkane ria hatu nohue anoe. 4 Reiso Daud ne soratatue isa iahata, “Ama. Naone Anahatana iasau runa onone wani mka irui me nisa osia. Iahata, ‘Mka urui me nisa osia.’ Reiso aunai sapani tau ruamu me maue!”
Reiso ieu iaka-akaohu rotu-tu ihokai mai Saul nusui oyo ihutu ne papi naue rurue.
5 Ihutu ne papite rei oyo anoi erepeka reiso iapasana ruai. Iasau pani anoi iahata, “Kahurae au pene una sanrei. Pene uhutu ia onate aia ne papi naue rurue. Tau sae, ia mo aia waini Upuku ihitiki.” 6 Iasau osi ne sio soratatua sanrei. Iahata, “Uainisi na Anahatana isakaku na pene una kahatene tau aia waini Anahatana ihitiki. Au nanie una kahatene mkane tanui mani iae tewa oi. Tau ia mo, Anahatana ihitiki.”
7 Daud iaunau ne sio soratatua sanrei na pene oahita runa Saul sio.
Saul iapunohui pusi oyo ihokai iarihoni hatu nohue rei oyo nanie oeuso. 8 Taa sanrei oyo Daud ihokai iarihoni hatu nohue rei oyo ioi pusu Saul sanrei, “Upuku.” 9 Oyo Saul iuni inoo hae muie. Inoo hae muie oyo Daud ihahue mai Saul uai anoe. Ihahue oyo iahata, “Upu. Ano atinu tau sio umau wasoni oasau, ‘Daud nanie iuna kahatene tanua.’ Nanie atinu tanuso tau sae? 10 Munata nanie uhunua mo, uhunua sinasi rei nea. Ria hatu nohue reimo Anahatana iruia osiku nea rei tea. Samatoro we sio soratatua oasau osiku sanrei, ‘Ama. Ahunui tewa? Waini tanuta nea rei.’ Ne au upeneku. Uahata, ‘Au upeneku tau uhunu upuku waini Anahatana ihitiki.’ 11 Ama. Masi anoo sae wani au ukatai reini. Sinasi mo sinana nanie uhunua mo, uhunua nea. Ne uhunua tewa reiso, hasae uhutu me papi naue rurue mani. Reiso ruamu anei ata au nanie una kahatene tanua tewa. Au nanie unesia tewa. Ne ano ruamu sahoro asui-suiku na nanie ahunuku. Masike we masana mkanesini tanua tewa iae, anina nanie ahunuku sirinia. 12 Ne uainisi na Anahatana sahoro mka iasau ia seia arihoni uata reini isana, ia seia ne manisate. Uainisi na Anahatana iapasanaya tau sae wani ano aunai tanuku. Ne au upeneku una sae isa tanua. Masike mka-mkane oi, upeneku sirinia. 13 Ano ruamu anei sou nanae wani sio oasau-asau oahata, ‘Ia seia waini iuna kahatene, ia rei sahoro ia kahatene.’ Reiso au una kahatene tanua iake tewa. 14 Masi anoo ia onate aia Israel nanie ihunu ia seia? Ano wani asui-suiku tau sae? Au ikine honue sani asu matane, sani utu reiso asui-suiku nanie tau sae? 15 Uainisi na Anahatana iasau ia seia sahoro ia manisate, ia seia sahoro ne isanae arihoni ita ua reini. Uainisi na iarinii parakana reini. Uainisi na Anahatana ineteku na iapuheuku arihonia.
16 Taa Daud ianamana pusi oyo Saul iahata, “Anaku Daud. Ano reino si?” Oyo Saul irani. 17 Iahata, “Ano sahoro ano manisate, au usana. 18 Au we kahatena, ne ano akatire tau me iaka. Ano mato asau osiku sapani na sinasi Anahatana iruiku osia ne ano ahunuku tewa. 19 Inasa ia isa isupu ne nisa ne iapuhaiki? Ihunui tewa. Reiso uainisi na Anahatana irui iake osia iuni me iake tau au sinasi rei. 20 Au mato uanei titue-tue ata ano mka auna aia tau sio Israel pusiso. Ano me hehuka, mea momou, mea upu osaka ouna aiau oi. 21 Reiso uainisi na ano asopa tau Anahatana nanai ata ano mka ahunu wea momou, wea upu tewa. Uainisi na ano pene una sio anoo kanihua runa we ipane nanae.”
22 Reiso Daud isopa sani Saul iaisosiki rei. Taa sanrei oyo Saul inuniki nau ne numa. Daud sio oeuso ria hatu nohue waria oauhuniso tanui rei.