11
Sio nanie Onana Numa wani Erehokai roe Nante
1 Mataanoe sio niana-niana mai tuniai reini pusiso utuso no sou osa. 2 Oeuso rotu-tu ohokaso ria ranie matae eresaa. Ohokaso ria watane wani hekani. Watane rei nanae Babilonia. Hoka ria oyo orueso ria rei.
3 Taue isa oasau osi umau. Oahata, “Mai na inehu tuamane runa monota oyo amanire na makaya.” Reiso sio ouna hatu nanie oapuoo numa. Oyo onana aspal opunui tau hatu rai na nanie rakina umau. 4 Oamanou pusire, ita oasau osi umau honu. Oahata, “Mai na iapuoo kota isa. Kota wani nene numa isa erehokai roe nante. Iapuooi na sio pusiso oatinu nanari na pene isama-samata ineka pusi tuniai reini.”
5 Wasoni onanai asi, oyo sira tau Anahatana ikaisunu nanie inoo kota rei. Kota runa nene numa wani sio mansiau oapuooi rotu-tu erehokai roe nante rei. 6 Iahata, “Sio reini no niane osa, no sou osa. Areini mo, mato mataanoe. Potuina tewa honu mka ouna sae mani pusu no maue. 7 Reiso mai, na ikaisunu na iuna wena-wena no sou. Iwena-wena no sou na pene oanei umau.”