Títì 3

Weèdɔɔ̀pa yònà é púkamá pa cɔ̰́ɔ̰̀di.

¹ Á dèhèna weèdɔɔ̀pa kà pá n'you-nà wɛmá tempáàti yìkàǹyìkàpa nà yɔtí kpɛ̰́m̀ma. Pá pà n'you-nà toòka kà pa sɔ̀do é m'bii kà pá m'pa̰kú tɔnsuuná wɛǹni. ² Pà caka è yɔ̀ pà dá cɔ̰ha tɔɔ̀o yèdi, pá yentá kɔ̰ɔ̰̀ka, é n'naanà tɔɔ̀pa, é n'yɔ̀kànì nà nìpa wɛǹni, ³ è yá̰á̰ tḭ́ńti mɛ̀ɛtékà, ti mɛ̀ɛ té de yòǹ yíńtáci-dà, è pú you toòka nà Weèdi, è péé yetáma mɛhɛká. Ti de yòǹ bìnɔ kpɛ́ɛsá nà ti wɔ̰̀ǹku kpɛ̀i-sá wɛǹni núm̀ma-dà. Ti de fòù mɛkatohiká nà bìnɔ mɛhɛká-dà. Nìpa de ti yɔ̰́sí-ma, ti mɔ́mpá kà ti sɛ̰ɛ̰́ ti tɔɔ̀pa. ⁴ Àmá kà wɔ̀ni é tɛ̀ni, kà Weèdi ti Fḭ́hìnɔ é bɛka ni pa̰á̰suumá nà ni dɔ́kàma nìpa, ⁵ ye wɔ̀ni é ti fḭ́hìna. Nì pú ti fḭ́hìnà è yɔ̀pu kpɛ́mú ti pa̰à̰ mìì suu-sá ni yìhìka, àmá nì ti fḭ́hìnà è yɔ̀pu kpɛ́mú-dà nì ti kɔń séèma. Nì ti fḭ́hìnà kà tí hḭn niìpàm̀ma nà cóǹti ti pa̰à̰-ti kpɛ́mú-dà, nà ni Sèdi mɛ̀nì ti pɔ̰n-di fòùmu pàmu. ⁶ Ti Fḭ́hìnɔ Sèsí-Kídísì kpɛ́mú-dà mɛ̀ɛ tee, Weèdi hútà-ma-ní sàma ni Sèdi ti hḭ́ǹka. ⁷ Ye wɔ̀ni, nà ni pa̰á̰suumá kpɛ́mú, kà ní ti kpáhìna niìcoópa, é hédá kà ti kó wáńtá dɛ́tá fòùmu mɛ̀mù bá yɔ̀ɔpú ti ceí-pu nà daḿma.

⁸ Wɛmà m'a cakáà-mà-dà yòǹ wɛbeèdi. N kpɛ̀i k'á yɛ̰̀ḭ mà cakú-sa hḭ́ǹka-dà tenten, k'yé teha kà mɛ̀m̀pà dań-pa Weèdi é kɔ̰́ɔ̰́ pa cɔ̰́ɔ̰̀di pa̰á̰ma mɛ̀mà suumá pa̰á̰pu hḭ́ǹka. Mií-dà sudi è kó nɛɛ́ tempa-nà nìpa. ⁹ Há̰kà, á yentá nɔ̀nɔ̀héhécíci. Kà nìpa nɔhù yààpa yèka hḭ́ǹka, kà pà há̰kádí yoo pà nɔ̀hù Sùwífùpa kpɛ̰́ńtìnùka hḭ́ǹka, a dá taàa a nùdi ye mɛhɛká. Mii kú wɛnnì yòǹ hécí-dà, yè pú yòǹ yècḭ́ḭ̀. ¹⁰ Kà nìi tookú nìpa, k'á ò caka è yɔ̀ yè pú sudi cɔ̀ku màcɔ̰́, màdɛ́ɛ́, ye kú dàhàka k'ò pú cehènà, k'á ò díná bɛ́ɛ́kú. ¹¹ Kà nìi yòǹ mɛma, k'á n'yá̰á̰ è yɔ̀ ò yɛ̀dì cɔɔ̀suukú mɛhɛká-dà. K'ò mɛ̀ɛ sɔ̰ncí sḭ̀ḭ̀ma mɛhɛká, ò kɔ̰́nì o cɔ̰́ɔ̰̀di-dà yetádi.

Tencí dèǹdèǹci

¹² Kà n tɔn-hɔ̰ Àtèmásì yoo Tìsíkì a pesá, k'á pa̰á̰ fem̀ma é n hɔ̰́tá-ní Nìkòpòdísì yɔtí, mìì tee-sá ye pesá-dà n ta̰kadà-ma è kó m'péé háá kà sémú wɔ̀ni é yɔ̀ɔ. ¹³ Á pa̰á̰ wɛ̰́ɛ̰́ma é tempa-nà Sènásì mɛ̀ǹǹ yá̰á̰-ko kpɛ̰́ńtìnùka, nà Àpòdósì kà pá sɔ̰kadá pa cà̰ǹku. A dá teha k'yèècḭ́ḭ̀ é pà dóńtá pa cà̰ǹku mɛhɛká. ¹⁴ Yè békú ti kpɛ́ɛpá mɛ̀ɛ té biɔha-á-ma pà kó hḭmpú é n'wɛ̰́dì tɔnsuuná pa̰á̰ma hḭ́ǹka, k'yé teha yè kó béka-sa tempàma tenten, kà pá tempa-nà. Mɛma, pa fòùmu pú kó n'yòǹ kpeèsa.

¹⁵ Mɛ̀m̀pà kú wɛnnì n péé-nà-pa miì àà dɔń. Á dɔa-ho ti weèdɔɔ̀tɔ̀pa mɛ̀m̀pà ti dɔ́sí-pa sukú. Weèdi pa̰á̰suumá é nɛ m'péé-nà nɛ wɛǹni!