Tɔná 15

Tíkáma Sèdìsàdɛ́m̀ yɔtí mɛhɛká

¹ Kà nìpa pàcɔ̰́pà é yɛɛ̀ni-nà-ní Sùdéè tempáàku, é tɛ̀ni Sìdíì kú À̰ǹtíyɔ́sí yɔtí mɛhɛká, è biɔhànì mɛ̀m̀pà tàà-pa pa dandaní Sèsíì hḭ́ǹka è toò: Kà nɛ pú héè kà pá nɛ ca̰ntá é n'yònà Mɔ̀yísì kpɛ̰́ńtìnùka hḭ́mpú, nɛ pú kó nɛɛ́ é dɛ́tá fḭ́táma. ² Pɔ́dì nà Bànàbásì kà pá pà nɔ̀hìnà dɛ́dɛ́í ye wɛmá hḭ́ǹka, kà má hḭn wɛsàma. Mɛmá-dà kà weèdɔɔ̀pa é tódá ta̰kadáma è yɔ̀ Pɔ́dì, nà Bànàbásì, nà pa kpɛ́ɛpá tɔɔ̀pa é taá Sèdìsàdɛ́m̀, é tɛ̀i é dɛ́há Sèsíì tɔntɔndipá nà weèdɔɔ̀-nàmɔ̀ni kpɛ̰́m̀ma, kà pá seká ye wɛmà.

³ Kà weèdɔɔ̀pa hòǹhòni é pà kɔ̰́ɔ̰́ ye cà̰ǹku de békú-sa wɛǹni. Kà pá deèta Fènìsíì nà Sàmàdíì tempáàti, è cakú mɛ̀m̀pà pú yòǹ-pa Sùwífùpa de kɔ̰́káàma pa cɔ̰́ɔ̰̀di Sèsíì. K'yèe wɛmá é naaka dɛ́dɛ́í weèdɔɔ̀pa wɛǹni. ⁴ Kà pá ta̰ntá Sèdìsàdɛ́m̀, kà weèdɔɔ̀pa hòǹhòni, nà Sèsíì tɔntɔndipá, nà weèdɔɔ̀-nàmɔ̀ni kpɛ̰́m̀ma é pà codá. Kà pá pà caka Weèdi de pà tempáà-nà kà pá pa̰á̰-sa wɛǹni. ⁵ Kà Fàdísìpa kpɛ́ɛpá pàcɔ̰́, mɛ̀m̀pà de kɔ̰́ɔ̰̀-pa pa cɔ̰́ɔ̰̀di Sèsíì, é yídá è yɔ̀: Yè békáà pá ca̰mu-ú-ma mɛ̀m̀pà kɔ̰́ɔ̰̀-pa pa cɔ̰́ɔ̰̀di Sèsíì è há̰ pú yòǹ Sùwífùpa, é pà caka è yɔ̀ pá tṵṵ̀na Mɔ̀yísì kpɛ̰́ńtìnùka hḭ́mpú.

⁶ Kà Sèsíì tɔntɔndipá nà weèdɔɔ̀-nàmɔ̀ni kpɛ̰́m̀ma é tíká, è kó cɔ́dí ye wɛmá. ⁷ Kà pá dúú nɔ̀nɔ̀hicí mɛhɛká k'yè kpenì, kà Píyɛ́ɛ̀ é yídá è yɔ̀: N kúcàpa-nà, nɛ yá̰á̰-ma è yɔ̀, nà Weèdi n ta̰kadà-ma nɛ cɔhɔ̀kà è yɔ̀ ń caka ni wɛnaamá mɛ̀m̀pà pú yòǹ-pa Sùwífùpa, yè yókáà. Pà de yònà é mà yèka é taàa pa dandaní-dà Sèsíì hḭ́ǹka. ⁸ Weèdi mɛ̀nì yá̰á̰-di nìdo yàma, kà ní bɛka è yɔ̀ nì pà teháà-á-ma, é pà pa̰a̰-ní ni Sèdi é n'yònà nì nì ti pɛ̰ḭkáàma. ⁹ Weèdi pú pa̰à̰ baàtamá tḭ́ńti nà mɛmpá ti cɔhɔ̀ka. Nì wekànà pa yàma, è yɔ̀pu kpɛ́mú-dà pà dań Sèsíì hḭ́ǹka. ¹⁰ Badà há̰ tee sá̰mà, kà nɛ bɛǹ Weèdi, è kpɛ̀i é towá mɛ̀m̀pà dań-pa Sèsíì hḭ́ǹka, totoodí ti yààpa nà ti mɔ́mpá pú nɛɛ̀ é toó-di? ¹¹ Ti múńtà dań è yɔ̀ ti dɛ́tà fḭ́táma nà Teó Sèsíì pa̰á̰suumá kpɛ́mú-dà, é n'yònà mɛmpá.

¹² K'yèe nìku mɛ̀ǹkù de petà-ku wɛǹni é hḭn wá̰m, é besí Bànàbásì nà Pɔ́dì kà pá kù caka pɔ́ńtáyḭḭ́pa nà pɔ́ńtápa̰á̰ma Weèdi de pà tempáà-nà, kà pá pa̰á̰-ma mɛ̀m̀pà pú yòǹ-pa Sùwífùpa cɔhɔ̀ka. ¹³ Pà wɛɛ̀ tḭ́ń wɔ̀ni é yɔ̀ɔ, kà Sàákì é tódá wɛmá è yɔ̀: N kúcàpa-nà, n besí-nà! ¹⁴ Sìmɔ́ɔ̀ cakáà-á-ma nà cetáma-ní, Weèdi hḭmpú é baàta bookú kà kù yòǹ o kpɛ́kú mɛ̀m̀pà pú yòǹ-pa Sùwífùpa cɔhàka. ¹⁵ Ye wɛmà mɛ̀ɛ pú ceń-nà Weèdi wɛtɛ̰́nápa de wɛɛ̀-sa, è yá̰á̰ pà wà̰tà Weèdi pɔ̀kàta mɛhɛká è yɔ̀,

¹⁶ Bateó yɔ̀:

Ye kú dàhàka, n kó tóní-ma-ní,

é yíkàna Dàfìtì hɔ̰́ɔ̰̀ta

mɛ̀ǹtà de dɔɔ-tá.

N kó yíkàna-á-ma ta dawoǹni

é tón é nì nɛ̀hìna,

¹⁷ k'yé teha, kà nìpa tɔɔ̀pa wɛǹni

é pɛha Bateó,

é pɛ́ɛ́-nà boocí tɔcí n yíí-ci wɛǹni

è yɔ̀ cí n'yòǹ n kpɛ́cí.

¹⁸ Mɛmá-dà Bateó wɛɛ̀-ma,

è mɛ̀ɛ éè bahìna nìpa,

k'yè káà dɛu.

¹⁹ Kà Sàákì é tɔhìna è yɔ̀: Mmí kú pesá, yè pú sudi è yɔ̀ tí kɔ̰́ɔ̰́ kpɛ̰́ńtìnùka mɛ̀ǹkà kó kpaná-ka mɛ̀m̀pà pú yòǹ-pa Sùwífùpa, pà kó kɔ̰́ɔ̰́-ma pa cɔ̰́ɔ̰̀di Teó. ²⁰ Àmá tí pà wà̰hà pɔ̀kàta, é pà caka è yɔ̀ pà dá cécí nɔtá pà dɔ̀haà-ta wàfa fɔ̰̀di, pá hédá yáyámú, pà dá cécí nɔtá pà kɔ̀ù-ta è pú tà hɛ̰dà, pà dá dii hḭ̀ma. ²¹ Nà dekáà-dà, kà nìpa biɔhànì Mɔ̀yísì kpɛ̰́ńtìnùka yɔtí bá mɛ̀ǹtì dɛ̀ɛ̀-ti mɛhɛká, è kà kàǹ damuhipàdi daadí wɛǹni Weèdi wɛmá biɔhà-nàmɔ̀ka mɛhɛká.

Pɔ̀kàta pà wà̰haà-ta mɛ̀m̀pà dań-pa Sèsíì é pú yòǹ Sùwífùpa

²² Mɛmá-dà kà Sèsíì tɔntɔndipá, nà weèdɔɔ̀-hòǹhòni kpɛ̰́m̀ma, nà weèdɔɔ̀pa wɛǹni é cɔ́dí é n'hɔ̰́tà yè suu-ú-ma è yɔ̀ pá ta̰kadá pa mɛhɛká, nìpa pàcɔ̰́ kà pá bɛ́hìna Pɔ́dì nà Bànàbásì À̰ǹtíyɔ́sì yɔtí. Mɛmá-dà kà pá baàta Súúdì, pà tṵ́mà yún-kó Bààsàbásì, nà Sìdásì. Ye nìpà padɛ́ɛ̀kà, pà de pà kɛ̀hi-í-ma weèdɔɔ̀pa cɔhɔ̀ka. ²³ Ǹtɛ pɔ̀kàta pà de pà tɔn-nà-ta tonàpu:

Tḭ́ńti Sèsíì tɔntɔndipá nà weèdɔɔ̀-hòǹhòni kpɛ̰́m̀ma, ti dɔń ti weèdɔɔ̀tɔ̀pa mɛ̀m̀pà pú yòǹ-pa Sùwífùpa, è péé À̰ǹtíyɔ́sì yɔtí, nà Sìdíì, nà Sìdìsíì tempáàti mɛhɛká. ²⁴ Ti yeèkaà è yɔ̀ pàcɔ̰́pà yídà ti pesà, é tɛ̀i-ho nɛ hɔ̰́ɔ̰́hí, é buupa nɛ yàma é mà cɔ̰ha nà pa wɛmá. Tḭ́ńti baà pú pà tɔn-hɔ̰. ²⁵ Ye kú kpɛ́mú-dà tee, kà tí pɛ́ɛ́ nùdi nìcɔ̰́ é ta̰kadá ti mɛhɛká nìpa, é pà nɛ tɔn-hɔ̰, kà pá bɛ́hìna ti dópòbɔ̀ɔ̀ka Bànàbásì nà Pɔ́dì, ²⁶ mɛ̀m̀pà yɛɛ́ɛ̀-pa pa wɔ̰ǹni ti Teó Sèsí-Kídísì tɔmú kpɛ́mú. ²⁷ Ti nɛ tɔn-hɔ̰ Súúdì nà Sìdásì, è yɔ̀ pa mɔ́mpá-dà é nɛ caka nà pa nùka ti nɛ wa̰à̰haà-sa ye pɔ̀kàtà mɛhɛkà. ²⁸ Weèdi Sèdi nà tḭ́ńti, ti cɔ́dí é n'hɔ̰́tà yè pú sudi è yɔ̀ ti nɛ tɔhìna totoodí tɔɔ̀di. Àmá, nɛ pú yònà é yakàdà-nà kpɛ̰́ńtìnùkà mɛnkà: ²⁹ Nɛ dá cécí nɔtá pà dɔ̀haà-ta wàfa fɔ̰̀di, nɛ dá dii hḭ̀ma, nɛ dá cécí nɔtá pà kɔ̀ù-ta è pú tà hɛ̰dà, nɛ́ hédá yáyámú. Kà nɛ yentà miya̰, yè suu-ú-ma dɛ́dɛ́í. Yé sɔ̰́ńtá-nà datɔɔ̀di!

³⁰ Kà pá hédá ye nìpa pà tɔnti-pá, kà pá sḭ́ńtá À̰ǹtíyɔ́sì yɔtí. Kà pá tɛ̀i é tíkáná weèdɔɔ̀pa hòǹhòni wɛǹni, é nì kɔ̰́ɔ̰́ ye pɔ̀kàta. ³¹ Kà pá tà kàn, kà ta wɛmá é yahikàna pa wɔ̰̀ǹti, kà yaǹnaakú é pà sṵ́ná pa wɛǹni. ³² Súúdì nà Sìdásì de yòǹ Weèdi wɛtɛ̰́nápa-dà. Kà pá tódá wɔ̀ni sàma é wɛɛ́-nà weèdɔɔ̀pa, è kó yahikàna pa wɔ̰̀ǹti, é tɔ̀hìna pa dandaní kpeèti. ³³ Kà pá yóka ye pesá cɛ̰́ma, kà pa weèdɔɔ̀tɔ̀pa é nɛɛ́ pà cɔa, é pà hédá kà pá tón é kòǹ mɛ̀m̀pà de pà tɔn-pá-ní pesá. [\v 34 Àmá kà Sìdásì mɛnn é ta̰kadá é cá̰ńtá ye pesá.]

³⁵ Kà Pɔ́dì nà Bànàbásì é taá m'péé À̰ǹtíyɔ́sì yɔtí. Nà tɔɔ̀pa dɔ́ɔ́di, kà pà biɔhànì è tṵ́mà cakú Teó wɛmá.

Pɔ́dì nà Bànàbásì totà

³⁶ K'yé pa̰á̰ daàka kàcɔ̰́kà, kà Pɔ́dì é caka Bànàbásì è yɔ̀: Tí tón yɔtí ti cakáà-ti wɛǹni mɛhɛká Teó wɛmá, é taá dentá ti weèdɔɔ̀tɔ̀pa é dɛ́há yè pà yòm̀pu. ³⁷ Bànàbásì de kpɛ̀i pá n'nɔɔ̀-nà-á-ma Ìsá̰à̰, pà tṵ́mà yún-kó Mádíkì. ³⁸ Kà Pɔ́dì é cɔ́dí é n'hɔ̰tà yè pú cédí pá tṵ́má óò nɔdá-nà, mìì tee-sá ò de pà hédà Pà̰ǹfìdíì mɛhɛká, ò koò pú pà bɛ́hínà pa tɔmú mɛhɛká. ³⁹ K'yé hḭn wɛkú sàku Pɔ́dì nà Bànàbásì pà cɔhɔ̀ka, háá kà pá totá. Kà Bànàbásì é tódá Mádíkì kà pá dìsi nɛ́ɛmá dawɛ́ɛ̀ku, é ka̰há Sípúdì teǹka. ⁴⁰ Kà Pɔ́dì mɛnn é ta̰kadá Sìdásì, kà weèdɔɔ̀tɔ̀pa é cɔhà Weèdi è yɔ̀ ni pa̰á̰suumá é pà bɛ́hìna, kà pá ka̰há. ⁴¹ K'ó deèta Sìdíì tempáàku nà Sìdìsíì kpɛ́kú, è tɔ̀hìnì kpeèti weèdɔɔ̀pa dandaní.