Mádíkì 15

Pà tanà Sèsíì Pìdátì pesá

¹ Ká̰ńyɛ̰̀ǹfa pìpìdì, kà dɔ̀hàka yam̀ma kpɛ̰́m̀ma é pa̰á̰ peètamá nà yɔtí kpɛ̰́m̀ma nà Weèdi kpɛ̰́ńtìnùka biɔhànapá nà sídàpa wɛǹni è kpɛ̀i é tódá ta̰kadáma. Kà pá hédá kà pá dákáná Sèsíì, óò tódá é taá óò kɔ̰́ɔ̰́ Pìdátì^a. ² Kà Pìdátì óò béka è yɔ̀: A yòǹ Sùwífùpa wódo-da-à? K'óò tɛ̰́ná è yɔ̀: A mɔ́nń mà wɛdà.

³ Kà dɔ̀hàka yam̀ma kpɛ̰́m̀ma é pṵ́á̰ Sèsíì niìya̰ dɔ́ɔ́di hḭ́ǹka. ⁴ Ye wɔ̀ni, kà Pìdátì é tṵ́m'ɔ́ɔ̀ béka è yɔ̀: A há̰ pú tɛ̰́nì màcɔ̰́m'ɛ̀ɛ̀? A baà you-ú-ma pà wɛì-sà wɛnnì a hḭ́ńkà-n'áa?

⁵ Àmá Sèsíì koò pú tɛ̰́nà màcɔ̰́mà, k'yé dii Pìdátì dɛ́dɛ́í.

Pà dènà nùdi dèǹdeǹni è yɔ̀ pà kó kɔ̀ù Sèsíì

⁶ Núǹtiyɛ̀ɛ̀ma kúúdi wɛǹni, *Pìdátì de hɔ̰́ wɛ́í kpenáku kùcɔ̰́-dà, nìku de hɔ̰́ n'kpɛ̀i-kú kú wɛ́íma. ⁷ Nìdo òcɔ̰́ǹ-dà há̰ de péé kódedí mɛhɛká kà p'òò tonà Bàdàbásì nà topúyoupá tɔɔ̀pa. Pà de pa̰à̰ tɔ̀ɔ̀di-dà nà yɔtí wóópa hádí é yó kɔ̀ù nìdo kà p'òò kpedí n'ɛ̀ɛ kú kpɛ́mú. ⁸ K'yèe nìku é yídá é póńtá Pìdátì hɔ̰́ɔ̰̀ta é tɛ̀i òò cɔ̀hu è yɔ̀ ó pà wɛ́í kpenáku kùcɔ̰́ k'yé n'yònà ò mà hɔ̰mpú beeká wɛǹni. ⁹ Kà Pìdátì é pà béka è yɔ̀: Nɛ kpɛ̀i ká n nɛ wɛ́í Sùwífùpa wódo-ò?

¹⁰ Ò de pà békáà mɛma mìì tee-sá, ò de yá̰á̰-ma sukú è yɔ̀, nà sɛ̰sɛ̰kú kpɛ́mú-dà kà dɔ̀hàka yam̀ma kpɛ̰́m̀ma de é taàa Sèsíì o nɔ̀ta mɛhɛká. ¹¹ Kà dɔ̀hàka yam̀ma kpɛ̰́m̀ma é fucí nìku è yɔ̀ kú cɔhà Pìdátì k'ó kù wɛ́í Bàdàbásì. ¹² Kà Pìdátì é tṵ́má kù béka è yɔ̀: N'aá hḭ́n n pa̰á̰ ba nìdò nɛ yún-kò Sùwífùpa wódo?

¹³ Kà k'óò tɛ̰́ná kpeéma è yɔ̀: Ò kpɛ̰́ḭ́ kpíidɔkú hḭ́ǹka!

¹⁴ Kà Pìdátì é pà béka è yɔ̀: Pa̰á̰ma m̀mɔ́ma-dà ò pa̰à̰-ma kà mà sḭ̀ǹ? Àmá, kà kú dɔ̀hà é dedí kpeéma è yɔ̀: Ò kpɛ̰́ḭ́ kpíidɔkú hḭ́ǹka!

¹⁵ Pìdátì há̰ de kpɛ̀i-má é nakàna ye nìku yàma tá, k'ó kù wɛ́í Bàdàbásì. Sèsíì mɛnn, k'ó héé kà p'óò podí dɔ́ùka, é yɔ̀ɔ k'ó kɔ̰́ɔ̰́ nùdi è yɔ̀ pá taá óò kpɛ̰́ḭ́ kpíidɔkú hḭ́ǹka.

Sósìpa dɛhikú Sèsíì

¹⁶ Kà sósìpa é tódá Sèsíì óò tanà Pìdátì hɔ̰́ɔ̰́tà mùǹku mɛhɛká, é yíí-ní sósìpa tɔɔ̀pa wɛǹni. ¹⁷ Kà pá n'kpɛ̀i óò dɛhí, óò báná tókesàdi hṵɛ̰dí mɔ̀ì, é yíí é dɛ̀i poòma pókàta é yíná o yudí. ¹⁸ Ye kú dàhàka, òò dɔń è tonà: Ǹnadaà Sùwífùpa wódo!

¹⁹ Kà pá tódá kpadàkàdi é m'podì o yudí, è tṵ́hú nuǹtɔ̰tí o hḭ́ǹka, è hìù dúùka é té dɔɔ́ háá-nà teǹka o yìhìka. ²⁰ Pà yɔ̀ɔ-má o dɛhípu, é bátá ye tókesàdi hṵɛ̰dí é tɛ̰́ná o nɛǹti óò báná. Ye kú dàhàka, kà p'óò dèna tapaàdi è kó taá ò kpɛ̰́ḭ́ kpíidɔkú hḭ́ǹka.

Pà kpɛ̰́ḭ́ Sèsíì kpíidɔkú hḭ́ǹka

²¹ Yè de hɔ̰́tà dɔɔ̀o òcɔ̰́ǹ-dà yɛ̀ni-nà-ní yɛ̀ka hɔ̰́ɔ̰́hí é yɛɛ̀ni ye kú cɔ̀ku. Àdɛ̀kìsá̰ńtì nà Ùdùfúsì pa báàa-dà, kà p'òò toò Sìmɔ́ɔ̀, k'ò yòǹ Sìdɛ́nì yɔtí kóoó. Kà sósìpa óò pa̰á̰ nà nɔɔ̀ti è yɔ̀ ó toó-nà Sèsíì o kpíidɔkú. ²² Kà pá tanà Sèsíì bɛ̀m̀bɛ̀ni pà toò-di Kɔ̀ɔ̀kòtáà, mìì kpɛ̀i é n'yɔ̀-sa Yukókóku bɛ̀m̀bɛ̀ni. ²³ Kà pá n'kpɛ̀i óò kɔ̰́ɔ̰́ dìfɛ̰́ɛ̰̀, òò kɔkadà-nà mìíì^b è yɔ̀ ó nìì, k'ó yeda ò pú niì. ²⁴ Kà p'óò kpɛ̰́ḭ́ kpíidɔkú hḭ́ǹka é yídá é ta̰á̰ o nɛǹti tɛ́tɛ́ è kó dɛ́há bá mɛ̀ǹǹ dɛ̀ɛ̀-ko kó n'tee-tí. Ye kú dàhàka, kà pá tì totá. ²⁵ Pà de kó n'kó kpɛ̰́ḭ́ Sèsíì kpíidɔkú hḭ́ǹka k'yè yòǹ máàku màwɔ́ì-dà ká̰ńyɛ̰̀ǹfa. ²⁶ Wà̰a̰cí pà de wa̰tà-ci é daàna o kpíidɔkú hḭ́ǹka kà cì bɛkú ò yetà-sa kà pà k'óò kɔ̀ù-nà de tonà: Sùwífùpa wódo. ²⁷ Kà pá pɛ́ɛ́ óò kpɛ̰́ḭ́-nà niìsḭ̀m̀ma pàdɛ́ɛ́ kpíidɛcí hḭ́ǹka. Òcɔ̰́ o hiòma, tɔɔ̀o o cà̰ǹkamá. [ ²⁸ Ma kú bookú-dà Weèdi wɛmá mɛ̀mà toò-ma: P'òò kàn niìsḭ̀m̀ma mɛhɛká de pa̰à̰-ma.]

²⁹ Kà nìpa mɛ̀m̀pà ka̰hù-pa ye pesá òò tèù, è mákápú yuùka è tonà: Heì! Fɔ̰́ń mɛ̀ǹǹ de kpɛ̀i-kó é pɔ́dá Weèdi hɔ̰́ɔ̰̀ta é madí tɔɔ̀ta daàa kàta̰a̰ mɛhɛká, ³⁰ fḭ́hìna a cɔ̰́ɔ̰̀di, é cútá-ní ye kpíidɔkù hḭ́ńkà! ³¹ Kà dɔ̀hàka yam̀ma kpɛ̰́m̀ma nà Weèdi kpɛ̰́ńtìnùka biɔhànapá mɛ̀ɛ t'óò dɛhikú è cakú pa tɔɔ̀pa è tonà: Ò fḭ́hìnà-á-ma tɔɔ̀pa, è há̰ pú kó nɛɛ́ é fḭ́hìna o cɔ̰́ɔ̰̀di. ³² Ye Weèdi ta̰kadáko-dà baà dɛ̀-à, *Ìsìdàyɛ́dì wód'aa, ó cútá-ní sá̰mà ye kpíidɔkù hḭ́ńkà-ní! Kà ti dɛ́hà miya̰, ye wɔ̀ni ti k'óò n'dań-ma. Pà de pɛ́ɛ̀ óò kpɛ̰́ḭ́-nà-pa kpíidɛcí hḭ́ǹka, kà pà mɛ̀ɛ t'óò tèù.

Sèsíì kṵ́mú

³³ Wèǹku beé-nà tḭ́ń wɔ̀ni yuùka hḭ́ǹka, kà pa teǹka é biikà ka wɛǹni, é n'yòǹ mɛma háá máàku màta̰a̰ yohokú. ³⁴ Máàku ta̰á̰ku mɛhɛká-dà Sèsíì hodáà-ma kpeéma è yɔ̀: Èdòyíì, Èdòyíì, dàmá sàbàtàníì, mìì kpɛ̀i é n'yɔ̀-sa: N Weèdi, n Weèdi badà tee k'á n wɛ́í?

³⁵ Pàcɔ̰́ mɛ̀m̀pà de péé-pa ye pesá yeèkaà-ma mɛma, kà pà yɔ̀: Ǹtɛ-nà k'ò yún Èdíì.

³⁶ Kà p'oòcɔ̰́ é cocí-ní é tɛ̀ni é tódá cɛbùti, é tì sɛ̰̀wa̰ dìfɛ̰́ɛ̰̀ naàkpáńkpáǹni mɛhɛká é tì bowá hà̰dikú yóùma, óò kɔ̰́ɔ̰́ è yɔ̀ ó yà̰à̰. K'yèe dɔɔ̀o yɔ̀: Héé-nà kà tí dɛ́há kà Èdíì kó tɛ̀n'ɔ́ɔ̀ cúhìna-ní ye kpíidɔkù hḭ́ńkà. ³⁷ Àmá, kà Sèsíì é hoda kpeéma, é kpíí.

³⁸ Kùdáasàpu mɛ̀mù de ca̰ncí-pu Weèdi hɔ̰́ɔ̰̀ta mɛhɛká, kà mú cɛ́tá é hḭn màdɛ́ɛ́, mu hḭ́ǹka háá-nà mu teǹka. ³⁹ Hɔ̀dɔ́m̀ sósìpa kpɛ̰́ǹn mɛ̀ǹǹ de péé-ko ye pesá dɛ́hà-ma ò kpíkáàma kú bookú, k'ò yɔ̀: Mɔ́masí-dà ye dɔɔò de yòǹ-ma Weèdi bíitá.

⁴⁰ Kà poòpa pàcɔ̰́pà mɛ̀ɛ t'éè péé è nɛ̀hi-ní nà dɛùma è wáń. Pa mɛhɛká, Màdíì Màkìtàdáà kóoó, nà Màdíì, Sàákì sàmɔ́ǹn nà Sòósì màa, nà Sàdòmɛ́ɛ̀, ⁴¹ kà pà de tṵnà Sèsíì nà Kàdìdéè-ní è dehú o kpɛ́mú, nà poòpa tɔɔ̀pa dɔ́ɔ́di kà pà de pɛ́dà óò póńtá-nà-ní Sèdìsàdɛ́m̀.

Sèsíì dánáma

⁴² Yohokú-dà de dɛɛ̀, kà Sùwífùpa damuhipàdi hà̰n kà pà pa̰kú ni sɔ̀do. ⁴³ Kà Sòsɛ́fù, Àdìmàtéè yɔtí kóoó é tɛ̀ni. Ò de yòǹ niìsào-dà kà p'òò kɛ̀hi Sùwífùpa sídàpa yudí-ní. O mɔ́nń, k'ò mɛ̀ɛ té de ceí Weèdi wóòti tɛ̀mmá-ní. K'ó potá kṵnnɔ̀ǹfa, é taá Pìdátì pesá é tɛ̀i óò cɔ̀hà è yɔ̀ óò pa̰a̰ nùdi k'ó tódá Sèsíì wɔ̰̀ǹku é taá kù dáná. ⁴⁴ Pìdátì yèkaà-ma è yɔ̀ Sèsíì kpíi, k'yóò dii. K'ó yíí Hɔ̀dɔ́m̀ sósìpa kpɛ̰́ǹn, óò béka k'ò kpíi k'yè dɛu. ⁴⁵ Ye Hɔ̀dɔ́m̀ sósìpa kpɛ̰́ǹn ò cakáà-ma è yɔ̀ ò kpíi, k'ó pa̰a̰ Sòsɛ́fù nùdi è yɔ̀ ó taá tódá o wɔ̰̀ǹku é taá kù dáná. ⁴⁶ Kà Sòsɛ́fù é dontá kùdáapɛ́íta, é taá cúhìna-ní Sèsíì wɔ̰̀ǹku kpíidɔkú hḭ́ǹka, é kù pɔ̰á̰ ye kùdáapɛ́íta, é taá kù tàa híúdi mɛhɛká kà pà nì tṵṵ tá̰a̰beèdi mɛhɛká. Ye kú dàhàka, k'ó bídí tá̰a̰sàku é hḭḭ̀na ye híúdi nùdi. ⁴⁷ Màdíì Màkìtàdáà kóoó nà Màdíì Sòsɛ́sì màa, kà pà wáń p'òò tàà-sa.