Mádíkì 7

Sèsíì wɛì-nà Fàdísìpa pa bookú pa̰á̰ma hḭ́ǹka

¹ Kà Fàdísìpa nà Weèdi kpɛ̰́ńtìnùka biɔhànapá pàcɔ̰́, é yɛɛ̀ni nà Sèdìsàdɛ́m̀ é tɛ̀ni é tíká Sèsíì pesá. ² Kà pá dɛ́há k'òo dapàm̀ma pàcɔ̰́ yon nà pa nɔ̀hi yɔ̰́káma, pà pú nɛtà é n'yònà pa bookú pa̰á̰ma hḭ́mpú.

³ Fàdísìpa nà Sùwífùpa tɔɔ̀pa wɛǹni tṵ̀n-ń-ma pa yààpa pa̰á̰ma. Pà pú hɔ̰́ dii è pú nɛtà pà hɔ̰́ nɛkàma pa nɔ̀hi. ⁴ Kà pà mɛ̀ɛ koní-nà-ní kààdi, è pú wekànà pa cɔ̰́ɔ̰̀di, pà pú hɔ̰́ dii. Pà tṵ́mà káá-ma pa kákámú tɔmú dɔ́ɔ́di è mù pa̰kú, kà mù nɔɔ̀-nà pà kó n'nɛɛ̀kumá kú bookú pa bondiká, nà pa kṵ́ḿpohí, nà pa cadiká.

⁵ Mɛmá-dà tee kà Fàdísìpa nà Weèdi kpɛ̰́ńtìnùka biɔhànapá é béka Sèsíì è yɔ̀: Baà tee k'àa dapàm̀ma pú tṵ̀n pa̰á̰ma ti yààpa ti héè-ma, è yon pà pú nɛtà?

⁶ Kà Sèsíì é pà tɛ̰́ná è yɔ̀: Èsàyíì de naá-ma dɛ́dɛ́í, ò de wa̰tà tḭ́ń daadí Weèdi wɛmá yam̀peǹdapà nɛ́na hḭ́ǹka è yɔ̀:

Bookù mɛnkù n dùǹti nà ku nùdi-dà

ku yàma pú n tɔ́sí-nà báà cɛ̰́ma.

⁷ Hécí-dà kù n dùǹti-má,

mìì tee-sá, kù biɔhànì-sa yòǹ

nìpa kú kpɛ̰́ńtìnùka-dà^a.

⁸ K'ò tṵ́mà yɔ̀: Nɛ héù Weèdi kpɛ̰́ńtìnùka-dà, è tṵ̀n nìpa kpɛ́ɛká.

⁹ K'ó tuɛ̀ha è yɔ̀: Nɛ nɔn Weèdi kpɛ̰́ńtìnùka dínápu-dà bɛ́ɛ́kú dɛ́dɛ́í-íì, è há̰ pú nɔn è mà hɔ̰n nɛ bookú pa̰á̰ma kpɛ́ɛsé-è. ¹⁰ Mɔ̀yísì de wɛdà-á-ma è yɔ̀: Ní n'cunì a báàa n'àa màa. K'ò de tṵ́má é tuɛ̀ha è yɔ̀: Kà mɛ̀ǹǹ wɛì-ko è yɔ́sí o báàa yoo o màa, kà nɛ́ kɔ̀ù ye yaǹn. ¹¹ Àmá, nɛ́na há̰ cakú nìpa è tonà: Kà nìi cakáà o báàa yoo o màa è hḭ́n, n de káá-sa è k'áa tempanà, n yè pɛ̰ḭ Weèdi, ¹² nɛ hɔ̰́ mà teha-á-ma, nɛ koò pú kó hédá k'yèe yaǹn é tempanà o báàa yoo o màa. ¹³ Ma kú bookú-dà nɛ kpíínì-ma Weèdi wɛmá cakú-sa, è tṵ̀n nɛ bookú pa̰á̰ma è mà biɔhɔ̀nì nɛ tɔɔ̀pa. Nɛ tṵ́mà pa̰kú-ma tɔɔ̀sa dɔ́ɔ́di k'yè yònà miyà̰.

Mìì pa̰kú-sa nìdo yɔ̰́káma Weèdi yìhìka

¹⁴ Kà Sèsíì é tṵ́má yíí nìku o pesá, é kù caka è yɔ̀: N besí-nà sukú nɛ wɛǹni é yekà n kpɛ̀i é n'yɔ̀pu. ¹⁵ Yècḭ́ḭ̀ kɔ́ɔ́ è kó nɛɛ́ pa̰á̰ nìi yɔ̰́káma Weèdi yìhìka, mìì dúù-sa wɛǹni o nùdi mɛhɛká. Àmá, mìì yɛ̀hu-sá-ní o mɛhɛká, mií-dà ò pa̰kú yɔ̰́káma Weèdi yìhìka. [ ¹⁶ Kà mɛ̀ǹǹ káá-ko toùka è kó yekà, k'ó yekà.]

¹⁷ Ò hédà tḭ́ń wɔ̀ni nìku é dúú hɔ̰́ɔ̰̀ta mɛhɛká, k'òo dapàm̀ma óò béka ye wɛbemú yohènamá kpɛ̀i é n'yɔ̀pu. ¹⁸ K'ó pà tɛ̰́ná è yɔ̀: Nɛ́na mɛ̀ɛtékà, nɛ mɛ̀ɛ té kɔ́ɔ́ yam̀màhàn'à? Nɛ pú yá̰á̰ è yɔ̀ yècḭ́ḭ̀ kɔ́ɔ́ è kó nɛɛ́ pa̰á̰ nìi yɔ̰́káma Weèdi yìhìka mìì dúù-sa wɛǹni o nùdi mɛhɛká nkɛ́ɛ̀? ¹⁹ Mìì tee-sá mɛma, yè pú dúù o yàma mɛhɛká, yè hɔ̰́ dúú o piidí mɛhɛká-dà é ka̰há yɛ̀dì fɔ̰̀di bɛ́ka. Ò de wɛdà mɛma è kpɛ̀i é caka è yɔ̀ dipú mùcɔ̰́mù pú cidí, mu wɛǹni kó nɛɛ́ dii-í-ma. ²⁰ K'ó tɔhɛ̀na è yɔ̀: Mìì yɛ̀hu-sá-ní nìi yàma mɛhɛká-dà hɔ̰́ ò kɔ̰́ɔ̰́ yɔ̰́káma. ²¹ Nìi yàma mɛhɛká-dà yam̀màhàsḭ̀ka yɛɛ̀hu-má-ní, k'yé n'yònà: Dɔ́ɔ́ma, nà túùpu, nà niìkɔ̀ùpu, ²² nà dɔɔdí cɔ̰hàma, nà bìnɔ cɔ̰náma nɛɛ̀mu hḭ́ǹka, nà mɛkatohiká, nà niìbáńtàfa, nà sɔ̀kací pa̰á̰ma, nà ta̰à̰hikú, nà tɔɔ̀o yèdi cɔ̰hàma, nà fóńfóǹti, nà fikàpa̰á̰ma. ²³ Ye kú nɛnsḭ̀ǹyà̰ miì kú wɛnnì yɛ̀hu-ní nìi yàma mɛhɛká-dà, mií-dà mɛ̀ɛ ò pa̰kú yɔ̰́káma Weèdi yìhìka.

Poòo òcɔ̰́ǹ dań Sèsíì è pú yòǹ Sùwífù

²⁴ Kà Sèsíì é yídá ye pesá, é taá bɛ̀m̀bɛ̀ni nìcɔ̰́nì kà nì hɛ́dí-nà Tíì yɔtí. K'ó tɛ̀i é dúú hɔ̰́ɔ̰̀ta tàcɔ̰́tà kú mɛhɛká, è pú kpɛ̀i k'òòcɔ̰́ǹ ní n'yá̰á̰ è yɔ̀ w'èè péé, w'àá pú nɛdà é n'sɔ̀di. ²⁵ Y'àá de hɔ̰́tà poòo òcɔ̰́ǹ-dà káá o sepàǹn kà wɛɛ̀kupá péé o mɛhɛká. K'ó yekà kà pà wɛì o wɛmá, k'ó tɛ̀ni é dɔdi-ho o tàka fɔ̰̀di. ²⁶ Ye poòo de pú yòǹ Sùwífùpa bookú kóoó. Pà de ò pɛdà Sìdó-Fènìsíì teǹka mɛhɛká-dà. K'ó tɛ̀ni é sɛ́úka Sèsíì è yɔ̀ ó bɔhà wɛɛ̀kupá mɛ̀m̀pà péé-pa o sepàǹn mɛhɛká. ²⁷ Kà Sèsíì óò caka è yɔ̀: Cedí héé kà bííhí é dii é dɛn, mìì tee-sá yè pú sudi pá tódá bííhí dimá é mà kɔ̰́ɔ̰́ mɔbímú.

²⁸ K'ó tɛ̰́ná Sèsíì è yɔ̀: Bemú-dà n Teù, àmá mɔbímú hɔ̰́ n'ta̰kù-ú-ma bííhí hɔ̰́ n'yon kà mìì nɔ́hú-sa.

²⁹ Kà Sèsíì óò caka è yɔ̀: Nà wɛmà a tɛ̰́nà-mà kú kpɛ́mú, tɔɔ̀ta é kòǹ, wɛɛ̀kupá yɛɛ̀-ɛ́-ma a sepàǹn mɛhɛká.

³⁰ K'ó tón é kòǹ hɔ̰́ɔ̰̀ta é tɛ̀i é n'hɔ̰́tà ye wɛɛ̀kupá yɛdì o sepàǹn mɛhɛká, k'ò dɔɔ́ dɔdí hḭ́ǹka.

Sèsíì kpekànà mùko

³¹ Ye kú dàhàka, kà Sèsíì é yídá Tíì teǹka, é yɛ̀ɛ̀ Sìtɔ̰́ɔ̰̀ tempáàku, nà yɔtí píta kpɛ́kú mɛhɛká, è tóńti Kàdìdéè baàdi bɛ́ka. ³² Kà p'óò tɛɛ̀-ní wòǹn òcɔ̰́ǹ k'ò pú nɔn è wɛì sukú. Kà p'óò sɛ́úka è yɔ̀ ó cɔ̰ná o nɔ̀ku o hḭ́ǹka k'ó kpeka. ³³ Kà Sèsíì óò tódá kà pá taá bɛ́ɛ́kú é nátá-nà nìku, é tɛ̀i k'ó tódá o há̰ḿbící é taàa ye wòǹn toùka mɛhɛká, é tṵ́dá o nɔ̀ku nuǹtɔ̰tí é pḭ́ń o denfá. ³⁴ Ye wɔ̀ni, k'ó yoòda o nɔ̀ǹci hḭ́ǹka, é fueha fuehècɛ̰́hḭ́di è yɔ̀: Èfátà, mìì kpɛ̀i é n'yɔ̀-sa hḭḭ̀ta!

³⁵ Ye pesá n'ɛ̀ɛ pesá, k'yèe dɔɔ̀o toùka é hḭḭ̀ta, k'òo denfá é dákádá, k'ó púsí wɛmá dɛ́dɛ́í. ³⁶ Kà Sèsíì é pà caka è yɔ̀ pà dá héé k'òòcɔ̰́ǹ é mà yèkà. K'ò há̰ de hḭ́n pà dá mà caka òcɔ̰́ǹ, pà de hɔ̰́ dɔ̀hà è mà pidá-á-ma páàti wɛǹni. ³⁷ K'yé dii nìpa sàma mɔ́ma kà pà wɛì è tonà: Ò pa̰kú-sa wɛǹni suu-ú-ma dɛ́dɛ́í. Ò héù múńdìkaà kà wòma-dà you, kà mùkàpa wɛì.