Màtíyéè 3

Ìsá̰-Bàtísì Weèdi wɛmá cakàma

¹ Ye kú wɔ̀ni-dà, Ìsá̰-Bàtísì tɛ̀ni-má-ní Sùdéè càwenkú mɛhɛká, è cakú Weèdi wɛmá è toò: ² Cehìna-nà fòùmu, mìì tee-sá hḭ́ǹka wóòti-dà hɛ́tà-ní.

³ Weèdi wɛtɛ̰́náko Èsàyíì de wɛdà mɛnń kú wɛmá-dà è yɔ̀:

Nìi boòku-dà kpákádí càwenkú mɛhɛká è toò:

Dɔ̀hà-nà Teó cɔ̀ku.

Cɔ́kàna-nà o cɔ̀ci.

⁴ Ìsá̰à̰ de bádí bɔnamáku kpìmu tókédi-dà, è cɛ̰́ṵ́ nawɔ̰̀ǹfa o kɔùka. Ò de yonti kádáàka-dà nà ceèti. ⁵ Kà Sèdìsàdɛ́m̀ nìpa wɛǹni, nà Sùdéè tempáàku wɛǹni kpɛ́ɛpá, nà yɔtí mɛ̀ǹtì kpɛ̰́dí-ti Sùùtɛ̰́ɛ̰̀ kóńkú kpɛ́ɛpá é n'kɔ́dì-ní o pesá. ⁶ Pà de hɔ̰́ bantá-ma pa sḭ̀ḭ̀ma nìku wɛǹni yìhìka, kà Ìsá̰-Bàtísì mɛ̀ɛ té pà cóńtá Sùùtɛ̰́ɛ̰̀ kóńkú mɛhɛká.

⁷ Ìsá̰à̰ dɛ́hà-ma è hɔ̰́tà Fàdísìpa, nà Sàdúkìpa dɔ́ɔ́di kɔ́dì-ní o pesá è kpɛ̀i ó pà cóńtá, k'ó pà caka è yɔ̀: Waàbíidɔhì nɛ́na! Wodà nɛ cakáà nɛ kó hḭmpú é yentá Weèdi sídàma mɛ̀mà pení-ma-ní? ⁸ Bɛka-nà nɛ pa̰á̰ma mɛhɛká è yɔ̀ nɛ fòùmu pentà. ⁹ Nɛ dá m'maàhu nɛ yàma mɛhɛká è toò: Àbààhám̀-dà yòǹ nɛ yàdo. N nɛ cakú-ma, Weèdi kó nɛɛ́ é kpáhìna-á-ma tá̰à̰kà mɛnkà kà ká hḭn Àbààhám̀ yaàbíiká. ¹⁰ Pɛ̰tá yɔ̀ɔ yòupú-dà è kó cédá tená nɛ cɛ̰̀ǹci pesá. Tepú mɛ̀mù kú wɛnnì pú pɛní-pu tebíisuuká, pà kó mù cédá-ma é mù ká̰ńtá ha̰mú mɛhɛká. ¹¹ Mmí, n nɛ cómù nà nɛ́ɛmá-dà è kpɛ̀i é bɛka è yɔ̀ nɛ cehìnà fòùmu. Àmá, òcɔ̰́ǹ pení n dàhàka è n kpenì-nà dɛ́dɛ́í, bá n pú sànà n kó bueí-ma é dákádá o nɛ̀ùti nawɔ̰̀ǹci. Mɛnn kó tɛ̀ni é nɛ n'cómù nà Weèdi Sèdi-dà, nà ha̰mú. ¹² Ò kó pɛ́dá o yɛkú-dà, é tóó o náḿbíisá o nɔ̀ku mɛhɛká, é cudí é baàta yoòbíimá nà yom̀mùùti. Ò kó hutá-ma yoòbíimá o bɔdí mɛhɛká. Àmá yom̀mùùti mɛnti, ò kó tì tɔ̀n nà ha̰mú mɛ̀mù pú kó kpíí-pu-dà.

Ìsá̰à̰ cóńtà Sèsíì

¹³ Ye wɔ̀ni, kà Sèsíì é yíí-ní Kàdìdéè tempáàku é tɛ̀ni Sùùtɛ̰́ɛ̰̀ kóńkú. K'ó tɛ̀ni Ìsá̰à̰ pesá è kpɛ̀i óò cóńtá. ¹⁴ Kà Ìsá̰à̰ é yeda, óò caka è yɔ̀: Yè sàà mmí-dà é n'yɔ̀ á n cóńtá, kà fɔ̰́ń há̰ tɛ̀ni n pesá-a!

¹⁵ Kà Sèsíì óò tɛ̰́ná è yɔ̀: Héé k'yè mun é n'yòǹ mɛma, è yá̰á̰ ma kú bookú-dà ti yònà é pa̰á̰-ma Weèdi békú-sa wɛǹni. Ye wɔ̀ni, kà Ìsá̰à̰ é teha óò cóńtá. ¹⁶ Òò cóńtà-ma, k'ó cemá yɛɛ̀ni nɛ́ɛmá mɛhɛká, kà hḭ́ǹka é kpetá, k'ó dɛ́há kà Weèdi Sèdi é cútá-ní o hḭ́ǹka è yònà pàǹdɔ̀di. ¹⁷ Kà boòku é yɛɛ̀ni nà hḭ́ǹka è toò: Mɛnǹ yòǹ n bíidɔ́kàta-dà, kà n yaǹnaakú wɛǹni péé ta hḭ́ǹka.