Màtíyéè 2

Ha̰cèǹyá̰à̰pa tɛ̀ni Sèsíì pesá

¹ Pà de pɛdà Sèsíì Bɛ̀tìdèɛ́m̀ yɔtí mɛhɛká-dà, Sùdéè tempáàku. Ye wɔ̀ni, kà Hèdótì-dà wódí. Kà ha̰cèǹyá̰à̰pa é yídá-ní Weèdi yɛɛ̀kumá-ní, é tɛ̀ni Sèdìsàdɛ́m̀, ² é béka è yɔ̀: Ntɛ́ Sùwífùpa wódo pà pɛdà-ko daakà? Ti dɛ́hà k'òo hà̰tàda-dà é fodá Weèdi yɛɛ̀kumá-ní, kà ti mɛ̀ɛ tɛ̀ni o dɔɔ̀pu.

³ Wódo Hèdótì yèkaà-ma mɛma, k'òo yàma é buupa dɛ́dɛ́í, é pɛ́ɛ́-nà Sèdìsàdɛ́m̀ nìpa wɛǹni kpɛ́ɛmá. ⁴ K'ó yíí dɔ̀hàka kpɛ̰́m̀ma wɛǹni, nà Weèdi kpɛ̰́ǹtinùka biɔhànapá é pà béka pà de yònà é pɛdá-sa Weèdi ta̰kadáko. ⁵ Kà p'óò tɛ̰́ná è yɔ̀: Pà yònà óò pɛdá Bɛ̀tìdèɛ́m̀-dà, Sùdéè tempáàku, è yá̰á̰ Weèdi wɛtɛ̰́náko de wa̰tà è yɔ̀:

⁶ Fɔ̰́ń tá Bɛ̀tìdèɛ́m̀, Sudéè teǹka yɔtí,

a pú yòǹ yɔsìm̀mɔ́ǹti ka yɔsàti wɛǹni mɛhɛká,

mìì tee-sá a kú mɛhɛká-dà wódo yɛtì-ma-ní

è kó cɛ̰nta Ìsìdàyɛ́dì, n nìku.

⁷ Ye wɔ̀ni, kà Hèdótì é yíí sɔ̀sɔ̀ma mɛhɛká ye ha̰à̰cèǹyá̰à̰pa, é pà béka ye hà̰tàda de pa fodà-di wɔ́ni. ⁸ Ye kú dàhàka, k'ó pà tɔn Bɛ̀tìdèɛ́m̀ é pà caka è yɔ̀: Taá-nà é béka sukú ye bíítà hḭ́ǹka, kà nɛ tà dɛ́hà kà nɛ́ tóní n caka, k'yé teha kà n mɔ́nń mɛ̀ɛ té taá é tà dɔa.

⁹ Wódo pà cakáà-ma mɛma é yɔ̀ɔ, kà pá ka̰há. Pà kɛ̰hɛdi-má, é tṵ́má dɛ́há ye hà̰tàda pà de dɛ́hà-ta-ní weèdi yɛɛ̀kumá-ní, kà tà nihí pa yìhìka. Kà tá ta̰ntá bɛ̀m̀bɛ̀ni ye bíitá de péé-di, é nɛɛ̀hi. ¹⁰ Pà dɛ́hà-ma ye hà̰tàda nɛɛ̀hi-sá, k'yé pà naaka sàma. ¹¹ Kà pá tɛ̀i é dúú hɔ̰́ɔ̰̀ta mɛhɛká é dɛ́há ye bíitá nà ta màa Màdíì. Kà pá ceḿ hìu dúùka é tà fa̰nta, é yíí kpetá pa pɛ̀hɛká é tà pa̰a̰ wúdó, nà tùdawunápa, nà tùdàdépa. ¹² Ye kú dàhàka, kà Weèdi é pà caka dɔhàti mɛhɛká è yɔ̀ pà koò dá yɛ̀ɛ̀ Hèdótì pesá. Ye wɔ̀ni, kà pá tṵùna cɔ̀ku tɔkú, é kòǹ pa heedí mɛhɛká.

Sèsíì báàpa ò cocí-nà Èsípútì teǹka mɛhɛká

¹³ Ye ha̰cèǹyá̰à̰pa ka̰hà-ma, kà Weèdi tɔntɔndikó é fodá Sòsɛ́fù dɔhàti mɛhɛká, óò caka è yɔ̀: Yíí tóó bíitá nà ta màa é cocí é taá Èsípútì teǹka mɛhɛká. Hèdótì-dà kó pɛha ye bíítà é tà kɔ̀ù. Á taá m'péé ka bɛ́ka háá é n'sànà n k'áa caka-má k'á tóní.

¹⁴ Ye yèǹka ka cɔ̰́ɔ̰̀di mɛhɛká, kà Sòsɛ́fù é yíí tódá bíitá nà ta màa, é ka̰há è kó taá sɔ̀di Èsípútì teǹka. ¹⁵ K'ó tɛ̀i kà m'péé-ho, háá kà Hèdótì é kpíí. Ye kú niyà̰ tɛ̀ni è kpɛ̀i Bateó de wɛdà-sa o wɛtɛ̰́náko nùdi mɛhɛká-dà é pa̰ná. Ò de yɔ̀:

N yíí n bíitá è yɔ̀ tá yɛ̀dì Èsípútì mɛhɛká^a.

Hèdótì kɔ̰́ɔ̰̀ nùdi è yɔ̀ pá kɔ̀ù Bɛ̀tìdèɛ́m̀ bíidahí wɛǹni

¹⁶ Hèdótì bantà-ma è yɔ̀ ye ha̰cèǹyá̰à̰pa d'oò báńtà-á-dà, kà fɔ̰́di óò cɛ̰dí dɛ́dɛ́í. K'ó kɔ̰́ɔ̰́ nùdi è yɔ̀ pá kɔ̀ù Bɛ̀tìdèɛ́m̀ bíidahí wɛǹni nà yɔtí mɛ̀ǹtì ò yéń-yéńtà-ti kpɛ́hí. Pá kɔ̀ù é tódá bííhí mɛ̀ǹhì káá-hi beeká kàdɛ́ɛ́ háá é cútá-ní. Ò de tṵnà ye ha̰cèǹyá̰à̰pa d'oò cakáà-sa-dà ye hà̰tàda fodáma hḭ́ǹka, é mà hḭn. ¹⁷ Ma kú bookú-dà Weèdi wɛtɛ̰́náko Sèdèmíì wɛmà mɛmà de pa̰à̰-ma. Ò de yɔ̀:

¹⁸ Ti you Hàdàmáà yɔtí mɛhɛká,

kà nìi toó kpíidawòni è hódì sàma o bííhí kpɛ́mú.

Hàdàsɛ́dì-dà hódì o bííhí kpɛ́mú è pú kpɛ̀i p'óò yɔ́da,

mìì tee-sá hì kpíi hi wɛǹni-dà.

Sèsíì báàpa ò konà-ní Nàsàdɛ́tì

¹⁹ Hèdótì kpíi-má, kà Bateó tɔntɔndikó é fodá Sòsɛ́fù dɔhɔ̀ti mɛhɛká, Èsípútì teǹka ²⁰ óò caka è yɔ̀: Yídá é tódá bíitá nà ta màa é pà tɛ̰́ná Ìsìdàyɛ́dì teǹka, mìì tee-sá mɛ̀m̀pà de kpɛ̀i é tà kɔ̀ù-pa kpíi-í-ma.

²¹ Kà Sòsɛ́fù é yídá é tódá bíitá nà ta màa é tón Ìsìdàyɛ́dì teǹka mɛhɛká. ²² K'ó yekà è yɔ̀ Hèdótì bíitá, Àkèdàɔ́sì-dà ò tà̰ǹtà è wódí Sùdéè teǹka. Ye wɔ̀ni, k'ó wampa ò kó taá kaàdi-má ka mɛhɛká. Kà Kɔ́yɔ̀ɔ óò caka dɔhàti mɛhɛká ò kó hḭmpú. K'ó yídá é ka̰há Kàdìdéè tempáàku. ²³ K'ó tɛ̀i é kaàdi yɔtí pà toò-ti Nàsàdɛ́tì. Ma kú bookú-dà Weèdi wɛtɛ̰́nápa wɛmà mɛmà de pa̰à̰-ma. Pà de yɔ̀: Pà k'óò n'yún Nàsàdɛ́tì kóoó-dà.