Anyaarubha e ghatato e
Yohana
Amakëërani
1
Eni omugharuka o riikanisa,
neghokwandëkëra iye Ghaayo omosiighani waane,
uno neghosiighiri kwo bhuhëënë.
2 Ibheere omosiighani waane,
neghoghusabhera kubha ubhe no orubhango mo‑riimanya reecho.
Wiiki neghokwëndëra obhuhöru bho mobhere waacho,
kinya bhuure onyi nabho mo‑körö yaacho.
3 Nichömiiru chwee,
hano bhiichiri abhaghëndi bhiito abhande na komboorera kubha nokwëndërëra ghughööta obhuhëënë,
na ghwikara mo‑bhuhëënë.
4 Ghetaanyi‑ho egheghiro kino gheghotegheri ghokera hano nekooghu kubha,
abhaana bhaane mbakwëndërëra kumanya mo‑bhuhëënë.
Obhuhëënë bho Ghaayo
5 Mbe,
omosiighani waane,
iye m‑muhëënë onyi mo‑ghaare oghukörëra abhaghëndi bhiito mo‑bhokumi,
nangabha bhaanyi bhaghëni ghokoocho.
6 Abhaato bhayo mbabhabhooriire abhaato bha riikanisa re hano ighoro e bhosiighi bhoocho.
Neghoghusasaama,
wëndërërë kobhatoori kinya bhuure eghuchömëri Eryobha,
kubha bhëëndërërë no orughëndö roobho.
7 Abhaato bhayo ꞉mbaasëëmiri orughëndö ro komuhökëri Yesu Kirisito,
bhatahaabhuru obhotoorereri bhobhoose koru mo‑bhaato bhano bhataamokumiri Yesu.
8 Gho ghayo,
itu ntokwëndëru kobhatoori abhaato kinya bhayo.
Gho ghuköra hangʼu,
ntookubha tughöötiine haghirohamu nabho mo‑meremo ghe kuraghani obhuhëënë.
Tiwotireebhe na Temetiiriyo
9 Mbe,
꞉neeryandëkiire eriikanisa anyaarubha,
amare Tiwotireebhe uno asiighiri ghwikangati kinya niwe omokoro waabho,
taaghwishererani na ameeghi ghiito.
10 Gho ghayo,
hano nekuucha iyo,
nëghöghëërëkani ghoose ghano aghuköra,
na kinya aghosiikëra obhughëëghë ighoro yiito kwo mangʼana amabhe.
Taanyi ghayo agheene,
amare nakwanga ghughënëhi abhahiiri bhiito bhano bhaanyi mo‑rughëndö.
Wiiki nakurëki abhaato abhande bhano bhakwënda kobhaghënëhi,
na kobhahëëbha bharu mo‑riikanisa.
11 Ibheere Ghaayo,
omosiighani waane,
oteegha amabhe,
amare weeghe amachömu.
Wowoose uno aghuköra amachömu,
uyo n‑omoona o Ryobha.
Amare uno aghuköra amabhe,
uyo taryeche Eryobha.
12 Abhaato bhoose mbaghotobhoorera kubha Temetiiriyo m‑mooto muchömu.
Eriimanya reeche ndeghotegheri Eryobha,
na nekwërëki kubha iwe m‑muhëënë.
Koru na niitu,
ntokobhugha kubha m‑mooto muchömu,
na nweche kubha amangʼana ghiito n‑nga hëënë.
Amangʼana gha kuragha
13 Neenyi na amangʼana maaru ghano nekwënda ghokobhoorera,
amare nteekwënda ghoghaandëka ghayo mo‑nyaarubha ino.
14 Amare,
neghwitëngʼëra ghoghutaarera ghano matiko na ghosiikëra haghirohamu na niiye obhosho kwo bhosho.
15 Omurëmbë ubhe haghirohamu na niiye.
Abhasaani bhaacho bha hano mbaghoghukëëri.
Iye woose,
otukëërëri abhasaani bhiito bha iyo ke umu umu kwo riina reeche.