Bhawuro ambërë e mukangati Bheesito
25
Hano Bheesito are amariri chaasiko ishato hangʼu che bhukangati bho mo‑mukööwa o Yuteya,
akaru Kayisaariya,
aghaye Yerusareemu.
2 Hano are hayo,
abhakoro bha bhachaama na abhakangati abhande bha Bhayahuuti bhakamutambana,
gho ghiri bhamobhoorere ghoose ghano ꞉bhaare bharamusëma Bhawuro.
3 Bhakamusasaama chwee kubha abhatoori,
abhagharokeri Bhawuro Yerusareemu,
gho kubha mbaare bhaköriri ekiina ekende ghe komwita Bhawuro mo‑nchëra.
4 Bheesito akabhagharokeri,
“Bhawuro naghochongu iyo Kayisaariya,
koru eni mwene neghugharuka iyo ghano matiko.
5 Gho ghayo,
motighe abhakoro bhaanyu abhamu toghi haghirohamu nabho,
bharuusi amasëmö ghaabho ighoro yaache,
mbagha tumënyë aribha enyi‑ho angʼana yoyoose ambe ino aköriri.”
6 Bheesito akamara chaasiko echende kinya inyaanye,
hande ikomi,
anyi haghirohamu na abhaato bhayo,
akamara aghagharuka Kayisaariya.
Atabhoori yaache aghaye,
aghiikara mo‑ghetumbe keeche ghe ghotenera ekiina,
akahatëka kubha Bhawuro arëëtu muyo.
7 Hano Bhawuro ahikiri hayo,
akabhabhöna Abhayahuuti bhano bharuure Yerusareemu.
Abhayahuuti bhayo bhakamwinaareri,
bhaghasëëma komusëma kwo mabhe maaru ghano ghataanyi gha hëënë ighoro yaache,
amare bhataatoriri kwërëki obhuhëënë bhooche.
8 Niho Bhawuro woose aghasëëma ghwitachura arabhugha,
“Eni ntitaasiri angʼana yoyoose ighoro e meghiro ghe Bhayahuuti,
koru Erisëngërö,
hande ighoro e Kayisaari.”
9 Bheesito naare arëënda ichömi kwo Bhayahuuti,
eghaghëri amobhoori Bhawuro arabhugha,
“Noghwishereri ghuye Yerusareemu,
iyo niho oteneru ekiina ambërë yaane ighoro e masëmö ghano?”
10 Bhawuro akamugharokeri akabhugha,
“Niimeeriire ambërë e ghetumbe ke moteni o kiina uno atooruru na Kayisaari,
hano niho nekwëndëru ghoteneru ekiina.
Kinya iye mwene weeche,
teenyi‑ho ngʼana yoyoose ino nitaasiiri Abhayahuuti.
11 Mbe,
nengabheere niköriri angʼana ambe ino engaghëriri neku,
ntengangiri ghwitu,
amare Abhayahuuti bhano mbaghunsëma kwo bhuröngö obhwene.
Gho ghayo taanyi‑ho mooto uno angatoriri ghontoora mo‑mabhökö ghaabho.
Eni neghusabha kubha amasëmö ghaane ghateneru ekiina o‑Kayisaari.”a
12 Mbe,
Bheesito hano amariri korwacha na abhaato bha riibharacha reeche akamugharokeri Bhawuro akabhugha,
“Nusabhiri kubha oteneru ekiina keecho o‑Kayisaari.
Mbe,
nooghuye o‑Kayisaari!”
Bheesito ˆaghasiikëra no omutëmi Aghiribha
13 Hano chehetiri chaasiko insuuhu,
omutëmi Aghiribha haghirohamu no ömööbhö o ghikari akobherekeru Bheerinike,
bhakaacha hayo Kayisaariya,
bhamukëëri Bheesito.
14 Bhakamara hayo chaasiko chaaru.
Mo‑chaasiko chiyo Bheesito akamobhoorera omutëmi uyo amangʼana ighoro e Bhawuro arabhugha,
“Hano naanyi‑ho omooto umu uno Bheriki ꞉amotighiri mwighërëcha.
15 Hano neghiire Yerusareemu,
abhakoro bha bhachaama,
haghirohamu na abhagharuka bha Bhayahuuti,
bhakamboorera amangʼana ghano ꞉bhaare bharamusëma Bhawuro.
Bhaghansabha kubha nemotenere ekiina.
16 ˆNekabhabhoorera kubha,
itu Abharuumi totaaghotenera ekiina omooto,
eriibhagha akeere ghwitachura ambërë e bhasëmi bhaache.
17 Niho neghagharuka hano haghirohamu na abhaato bhano bhakomusëma Bhawuro.
Hano bhookiire,
ntikechiire,
neghiikara mo‑ghetumbe keene ghe ghotenera ekiina,
nekahatëka kubha Bhawuro arëëtu.
18 Hano bhamurëëtiri,
abhasëmi bhaache bhayo bhakiimeerera,
bhaghasëëma komusëma.
Amangʼana ghano bhamusëmiire ghataare mabhe kinya bhuure ꞉niitëngʼiire.
19 Ibho mbaare bharahakaana nawe ighoro e mangʼana na amabhoori gha tiini yaabho,
ni ighoro e mooto umu uno akuure,
eriina reeche Yesu,
amare Bhawuro akabha arabhugha kubha m‑muhöru.
20 Mbe,
gho kubha ntimënyiri kinya neghoghiisuncha amangʼana ghayo,
eghaghëri nekamobhoori Bhawuro aribha aghwishereri ghuye Yerusareemu,
ateneru ekiina iyo gho ghiri e mangʼana ghayo.
21 Bhawuro akaanga,
aghansabha kubha achongu mbagha eriibhagha re ghoteneru ekiina keeche o‑Kayisaari.
Mbe,
neghiishereri kubha achongu mbagha nibhönë kebhuno nekomotoma o‑Kayisaari.”
22 Niho Aghiribha akamobhoorera Bheesito akabhugha,
“Nengasiighiri komooghu omooto uno eni mwene.”
Bheesito akamugharokeri,
“Nokomooghu tabhoori.”
Bhawuro ˆaghiitachura ambërë e mutëmi Aghiribha
23 Hano bhookiire,
Aghiribha haghirohamu na Bheerinike bhakaacha bhiichöchiri,
bharaghënda gho ghwishiimi.
Bhaghasöha hano abhaato bhahiikara bharakörëra ekiina,
haghirohamu na abhantomonkoro bha bhaashirikare,
na abhakangati abhande bha mo‑moghya.
Bheesito akahatëka kubha Bhawuro arëëtu.
24 Bheesito aghasëëma ghosiikëra arabhugha,
“Oo omutëmi Aghiribha,
na niinyu bhoose bhano moonyi haghirohamu na niitu,
mokomorighi omooto uno!
Abhayahuuti bhoose ꞉mbaamusëmiri ambërë yaane iyo Yerusareemu na hano Kayisaariya wiiki,
bhakamusëma ino bharaköra eriireghe kubha,
taakurëngʼaanera obhuhöru.
25 “Eni nterooche kubha,
꞉naaköriri angʼana ino engaghëriri itu.
Ibheere iwe aghansabha kubha,
ekiina keeche gheteneru Ruumi,
o‑Kayisaari.
Kiyo nikyo ꞉ghiighëriri kubha nemotome ghokooche.
26 Koru hangʼu,
ntighöötë angʼana e hëënë ino nekwandëka ighoro yaache o‑Kayisaari.
Nikyo ghighëriri nekamurëëta hano ambërë yaanyu bhoose,
na ahanene ambërë yaacho omutëmi Aghiribha,
gho kubha toramara komobhoori,
nibhönë angʼana ino nekwandëka ighoro yaache.
27 Nerooche kubha teenyi bhoheene komotomera Kayisaari omubhöhu,
koru ghataanyi‑ho amangʼana gha komusëmëra.”