Amaköri gha Bhatomu 10

Korineeriyo ˆakamobherekera Bheetero

Naare‑ho omooto umu mo‑moghya o Kayisaariya omokoro o bhaashirikare, eriina reeche Korineeriyo. Iwe naare omwimeereri o rikinda re bhaashirikare eriighana rimu, koru mo-rikinda eriikoro re bhaashirikare rino reere rerabherekeru, Kiitaariya. 2 Naare arasëngëra Eryobha, na araresooka, haghirohamu na abhaato bhoose bha mo‑ka yaache. Naare arasabha Eryobha eriibhagha ryose. Haghirohamu na ghayo, naare arabhatoori chwee Abhayahuuti bhano ꞉bhaare abhahabhe.

3 Orosiko rumu mo‑chaasa kende che mwishe, Korineeriyo akarighi amarighi. Mo‑marighi ghayo, akarighi kimu kimu o Ryobha aramusëëta. Marayika uyo akamobherekera arabhugha, “Korineeriyo!” 4 Korineeriyo akamumööhërëri marayika uyo kwo bhotiini, akamobhoori akabhugha, “Omutëmi, neke ˆghekabhönëka?” Marayika uyo akamugharokeri akabhugha, “Eryobha ndyoghwire amasabhi ghaacho, na nderooche kebhuno oghusakeri abhahabhe. Ghayo ghoose, Eryobha ndeghokohiita iyo Mwishaaro. 5 Ibheere otome abhaato bhaghi mo‑moghya o Yoobha, bhamobherekere Simiyooni, uno akobherekeru Bheetero. 6 Iwe m‑mughëni mo‑ka imu e Simiyooni, omumambi o mashëërö. Anyumba yaache neenyi rubhareka ro nyancha.”

7 Hano, marayika uyo amariri komobhoorera ghayo, akaru‑ho. Niho Korineeriyo akabhabherekera abhatamishi bhabhere bha mo‑ka yaache, no omoshirikare umu uno are aresookiri Eryobha. 8 Akabhabhoorera amangʼana ghoose ghano gharweriire, akamara akabhatoma bhaghi Yoobha.

Bheetero ˆakarighi amarighi

9 Atabhoori yaache, hano abhaato bhayo bhatato ꞉bhaare ˆbhaghatingʼi omoghya o Yoobha, chaasa ishaasabhe che mwishe, Bheetero nawe aghatiira ighoro e ghisara korisabha Eryobha. 10 Hano are arasabha akooghu anchëra aghiighomba ebhiinyakurë. Eriibhagha ꞉bhaare bharamuhökëri ebhiinyakurë, akarighi amarighi. 11 Mo‑marighi ghayo, akarighi erishaaro reriighoka. Egheghiro kenga omwando mokoro gheghiikibhu haase, ino ghighööturu chambaara cheeche choose inye. 12 Mo‑mwando uyo ncheere‑mu chatyenyi che manga maaru, chatyenyi che maghoro ane, na chino chekwingʼuurera chanda, ne ebhinyönyi.

13 Akamara akooghu eriiraka reramobhoorera, “Bheetero, imeerera! Ughööghë ori!” 14 Bheetero aghagharokeri. “Tiyaanyi, Omutëmi! Ntiimara neri naabha ekiinyakurë ghyokyose kino emeghiro ghe Musa ghebhughiri kubha, ghetaakurëngʼaanera na gheghonchu!” 15 Eriiraka riyo reramobhoorera wiiki, “Otabhebherekera ebheghiro bhino Eryobha remusiri, kubha m‑bheghonchu.” 16 Angʼana iyo ekarwera ghatato, okamara omwando uyo oghagharokibhu mwishaaro.

17 Hano Bheetero are akeere ariibhoori ighoro e egheteemoro ke marighi ghayo, abhaato bhatato bhano ꞉bhaare bhatomuru na Korineeriyo bhaakabha bhëërëkiibhu anyumba e Simiyooni. Mbaare bhiimeeriire ambërë e ghisëku keeche. 18 Bhaghaköngʼööta eghisëku na kobhoori, “Ntokobhoori, omughëni uno akobherekeru Simiyooni eriina reeche erende Bheetero hano anyi?” 19 Hano Bheetero are akeere arëëndërëra kwihëëbha ighoro e marighi ghayo, Akörö Ahörëëru ekamobhoorera, “Tëghëërëra! Mbaanyi‑ho abhaato bhatato hano, bhaghoghutabhara. 20 Nwike haase, ohinane nabho otabha na kemboori, gho kubha neeni nebhatomiri ghokoocho.”

21 Bheetero aghiika haase, akabhabhoorera abhaato bhayo, “Neeni uno moghutabhara. Neke moghuntabharera?” 22 Bhakamobhoorera, “Ntotomuru no omokoro umu o bhaashirikare, akobherekeru Korineeriyo. Korineeriyo uyo m‑mooto omuhöriicho uno akoryoghwera Eryobha, na ghoghongibhu na Abhayahuuti bhoose. Ibheere marayika omutööbhiyu namobhooriire aghughënëhi awaache, kubha atëghëërërë amangʼana ghano okomobhoorera.” 23 Bheetero akabhaghënëhi mo‑nyumba, bhaakabha abhaghëni bhaache.

Bheetero ˆakahika o‑Korineeriyo

Atabhoori yaache, Bheetero na abhaato bhaare bhatato bhaghasëëma orughëndö roobho, haghirohamu na abhakumi abhande koru Yoobha. 24 Orosiko ro kabhere, bhakahika mo‑moghya o Kayisaariya. Bhakabhöna Korineeriyo akeere arabhaghanya haghirohamu na abhahiiri bhaache, na abhasaani bhaache bhano are araghiini.

25 Hano Bheetero ahikiri, Korineeriyo akamoturungʼanera, akabhuna ebheru ambërë yaache gho sooko. 26 Amare Bheetero akamwimeereri akamobhoorera, “Imeerera! Eni n‑omooto hangʼu neenyi kinya iye!” 27 Niho Bheetero na Korineeriyo bhaghasöha aka bhararë amangʼana, akabhöna abhaato bhaaru bhiikomiine mo‑nyumba. 28 Bheetero akabhabhoorera, “Inyu mweche bhoheene kubha itu Abhayahuuti totiishereriiru ne emeghiro ghiito ghughöötana na abhaato bha matöngö aghande, koru kobhataarera. Amare Eryobha ndënyëërëkiri kubha netamobherekera omooto wowoose kubha m‑moghonchu, hamu kubha taakurëngʼaanera. 29 Nikyo hano momberekiire, nekaacha ntyangiri. Mbe! Neghusabha momboorere neke momberekeriire?”

30 Korineeriyo akamobhoorera, “Chaasiko ishato chino chehetiri, neere mo‑ka yaane nerarisabha Eryobha, eriibhagha kinya rino re chaasa kende che mwishe. Hayo hayo nekarighi omooto imeeriire ambërë yaane abheekiri amaghööti gha kurëngaari. 31 Akamboorera akabhugha, ‘Korineeriyo, Eryobha ndyoghwire amasabhi ghaacho, nderooche kinya oghusakeri abhahabhe. 32 Mbe, otome abhaato bhaghëndë mo‑moghya o Yoobha, bhamobherekere Simiyooni, uno akobherekeru Bheetero. Iwe m‑mughëni mo‑ka imu e Simiyooni, omumambi o mashëërö. Anyumba yaache neenyi rubhareka ro nyancha.’ 33 Nikyo ghighëriri neghatoma abhaato ghokoocho bhwango, iye woose nuköriri bhoheene kuucha. Ibheere itu bhoose ntoonyi ambërë e Mutëmi Waryobha, kubha tutëghëërërë amangʼana ghoose ghano Omutëmi akuhatëkiri otobhoorere.”

34 Mbe, Bheetero akabhabhoorera abhaato bhayo akabhugha, “Ibheere niho ˆnekamënya kubha, m‑mahëënë Eryobha retaghöötë obhwingʼaheri! 35 Iryo ndekobhiishereri abhaato bha matöngö ghoose bhano bhakomoghwera, na ghuköra ghano ghaanyi gha hëënë ambërë yaache. 36 Iwe ꞉naatomiri amangʼana ghaache kwo Abhiisiraeri arabharaghaneri Angʼana Anchömu e murëmbë gho nchëra e Yesu . Yesu uyo niwe Omutëmi o bhaato bhoose. 37 Inyu bheene mweche amangʼana ghano gharweriire mo‑mukööwa woose o Yuteya. ꞉Ngaasëëmiire , eriibhagha Yohana are araraghaneri abhaato kubha bhabhatiisu. 38 Mweche kubha, Eryobha ꞉ndeemwahwire Yesu o Nasareeti gho komuha no obhotoro. Yesu ꞉naaghiire ino na ino, araköra amachömu na kuhöri bhoose bhano ꞉bhaare bharanyaakibhu na changuru che , gho kubha Eryobha ndeere haghirohamu nawe.

39 “Itu n‑abhiibhateri bha ghayo ghoose ghano Yesu ꞉aköriri mo‑se e Bhayahuuti, na mo‑moghya o . Bhakamara bhakamwita gho komumamba mo‑musarabha, 40 amare orosiko ro ghatato, Eryobha rekamoryoki, rekamwërëkani mo‑bhaato. 41 Tarighiibhu kwo bhaato bhoose, amare Eryobha rekaahura abhiibhateri komorighi. Abhiibhateri bhayo, nibho itu, ꞉ntoomorooche, ꞉ntuuraghiire na kunyo haghirohamu nawe hano amariri koryoka. 42 Iwe aghaturaghereri kobheeghi abhaato Angʼana Anchömu, na kobhabhoorera abhaato kubha iwe niwe atooruru ne Eryobha, abhatenere ekiina abhaato abhahöru na bhano bhakuure. 43 Yesu uyo, abharööti bhoose ꞉mbaasiikiire ighoro yaache kubha, omooto wowoose uno akomokumi nakwabhëru amasari ghaache kwo riina reeche.”

44 Hano Bheetero are akeere arasiikëra ghayo, hayo hayo Akörö Ahörëëru ekabhiikera bhoose bhano ꞉bhaare bharamutëghëërëra. 45 Abhayahuuti abhakumi bhano bhiichiri haghirohamu na Bheetero, bhakahagha chwee korighi kubha Eryobha ˆrekabhaha ekihaano ghe Körö Ahörëëru, koru abhaato bha matöngö aghande. 46 ꞉Mbaamënyiri hangʼu gho kubha ꞉mbaabhooghwire abhaato bhayo bharasiikëra gho ghighambo ekende bharareghongi Eryobha.

Niho Bheetero akabhugha, 47 “Abhaato bhano mbabhwine Akörö Ahörëëru kinya itu ꞉toobhwine. N‑niwe uno aghotora kobharëki abhaato bhano bhatabhatiisu kwo manche?” 48 Mbe, Bheetero akabhugha bhabhatiisu kwo riina re Yesu Kirisito. Bhakamara bhakamusabha ikare nabho gho chaasiko insuuhu.