8
Sawuri woose ꞉niisheriiri gho ghwitu gho Siteebhano.
Abhaghëndi bha Yesu ˆbhakanyaakibhu na ghusancha
Orosiko ruyo hakarwera anyaako ihaari chwee mo‑bhaato bha mo‑kanisa iyo Yerusareemu.
Abhaghëndi bhaaru bha Yesu bhaghasancha,
bhakangʼösëra mo‑mikööwa ghe Yuteya na Samaariya.
Amare abhatomu bha Yesu,
bhaghasaagha Yerusareemu.
2 Bhakamara abhaato bhano ꞉bhaare bhasookiri Eryobha bhakamoryeka Siteebhano na kwihiinyërëra chwee.
3 Sawuri aghasëëma kobhanyaaki abhaato bha mo‑kanisa.
Akabha arasöha mo‑chaaka cheebho,
arabhahoroki anche abhasubhe na abhakari,
arabhahira mo‑chanyumba che bhabhöhu.
Bhiiribho mo‑moghya o Samaariya
4 Abhaghëndi bha Yesu bhano ꞉bhaasanchiri,
bhaakabha bhareeghi abhaato Angʼana Anchömu e Yesu haghiro hoose hano bhaghiire.
5 Bhiiribhoa iwe aghaye mo‑moghya o Samaariya,
aghasëëma kuraghaneri abhaato ighoro e Kirisito.
6 Abhaato bhaaru hano bhooghwire ameeghi ghaache na korighi ebhiraghe bhino are araköra,
bhaakabha bharatëghëërëra bhoheene.
7 Naare arahëëbha emisambu koru mo‑bhaato bhaaru,
ino gherakuura kwo riiraka ikoro.
Wiiki akabhahöri abhaato bhaaru bhano ꞉bhaare bhakuure eribhaara na abhabhëëru.
8 Gho ghayo,
abhaato bha moghya uyo bhaghachömëru chwee.
Simiyooni omoturutumbi
9 Mo‑moghya uyo o Samaariya,
naare‑ho omooto umu omoturutumbi,
eriina reeche Simiyooni.
Kwo riibhagha irë naare abharoghooriri chwee abhaato bha mo‑moghya uyo,
gho ghuköra ebheroghooro.
Wiiki akabha ariihacha kubha iwe m‑mooto mokoro chwee.
10 Abhaato bhoose,
abhakoro na abhasuuhu,
mbaare bharamutëghëërëra,
bharabhugha,
“Omooto uno niwe changuru chiire che Ryobha chino chekobherekeru,
‘Obhotoro Obhokoro.’”
11 Abhaato bhayo ꞉mbaamutëghëëriire gho kubha,
kwo riibhagha irë naare arabharoghoori kwo bhoturutumbi bhooche.
12 Amare hano Bhiiribho abheeghiri Angʼana Anchömu ighoro e bhutëmi bho Ryobha,
ne eriina re Yesu Kirisito,
bhaghakumi,
abhasubhe na abhakari,
bhakabhatiisu.
13 Simiyooni woose akamokumi Yesu,
akabhatiisu,
aghaghöötana na Bhiiribho.
Hano arooche ebheroghooro ebhekoro bhino Bhiiribho are araköra,
bhekamoroghoori chwee.
14 Abhatomu bhano ꞉bhaare bhasaaghiri Yerusareemu,
hano bhooghwire kubha abhaato bha Samaariya ˆbhakayiishereri angʼana e Ryobha,
Bhakabhatoma Bheetero na Yohana bhaghi iyo.
15 Hano bhahikiri,
bhakabhasabhera abhaato bhayo kubha bhabhönë Akörö Ahörëëru,
16 gho kubha taare‑ho koru umu ghate yaabho uno Akörö Ahörëëru ere emwikiire.
Ibho mbaare bharabhatiisu okwene kwo riina re Mutëmi Yesu.
17 Mbe,
Bheetero na Yohana bhaghatoora amabhökö ighoro e bhakumi bhayo,
bhakahaabhu Akörö Ahörëëru.
18 Simiyooni,
hano arooche kubha abhaato ˆbhakahaabhu Akörö Ahörëëru gho ghotooreru amabhökö gha bhatomu,
akabhaha chambiiri,
akabhabhoorera akabhugha,
19 “Muuhë na neeni obhotoro bhuno,
kubha omooto woose uno neghotoorera amabhökö ghaane,
ahaabhu Akörö Ahörëëru.”
20 Bheetero akamobhoorera akabhugha,
“Iye na chambiiri cheecho,
mokwere kurë haare,
gho kubha noghwituuri noghotora ghoghora ekihaano ke Ryobha gho chambiiri!
21 Iye tughöötë ahaghiro koru omubharo mo‑meremo ghino,
gho kubha omotema waacho,
toonyi mughöröröku ambërë e Ryobha.
22 Mbe,
otuukuunere amasari ghaacho,
usabhe Omutëmi,
hamu aghokwabhëra kwo amiihëëbhö ghano onyi nagho mo‑motema waacho.
23 Nekorooche kubha noonyi ne eriihari chwee,
na amasari ghaacho ngakubhöhiri.”
24 Simiyooni akamugharokeri,
“Munsabhere kwo Mutëmi yaaya,
kubha ghano mobhughiri ghataacha kumböna.”
25 Hano Bheetero na Yohana ꞉bhaamariri kobhoorera abhaato ghano bharooche ighoro e Mutëmi Yesu,
na kweghi angʼana e Ryobha mo‑bhaato bha moghya uyo,
bhaghasëëma orughëndö roobho ro ghugharuka Yerusareemu.
Hano bhaare mo‑rughëndö,
bhaakabha bharasanchi Angʼana Anchömu mo‑bhyaro bhyaru bhe Samaariya.
Bhiiribho no omochigharu o Esiyobhiya
26 Marayika o Mutëmi akamobhoorera Bhiiribho,
“Nooghi eribhaara re bhachuuta,
mo‑nchëra ino ekohetera mwibhara,
ino ekorwera Yerusareemu ghuye Ghaasa.”
27 Niho Bhiiribho akabhanura,
aghasëëma orughëndö rooche.
Hano are mo‑nchëra,
aghatëmëërana no omochigharub umu omontomonkoro o mo‑se e Esiyobhiya.
Omontomonkoro uyo naare omwimeerereri o bheghiro bhyose bhe Kandake,
marikiya o se e Esiyobhiya.
Omochigharu uyo naare aghiire Yerusareemu ghusëngëra Eryobha.
28 Hano are aragharuka aka,
naare ikeere mo‑möntöka yaache ino ere erarutu na chabharaasi,
arasöma eghitabhu ke murööti Isaaya.
29 Ibheere Akörö Ahörëëru ekamobhoorera Bhiiribho,
“Nooghi bhwango haghuhe na amöntöka yiire,
ekohinani.”
30 Mbe,
Bhiiribho aghaye arahe mo‑möntöka iyo.
Hano ahikiri akamooghu omontomonkoro uyo arasöma mo‑ghitabhu ke murööti Isaaya,
akamobhoori,
“Ibheere amangʼana ghayo oghusöma,
nogheeche?”
31 Akamugharokeri akabhugha,
“Nibhu neghuköra neghamënyë,
naho taanyi‑ho omooto o konyërëkërëri?
Nuusöhë mo‑möntöka yaane,
twikare haghirohamu.”
32 Amandëkö ghano are arasöma,
nigho ghano,
“꞉Naakangaturu kinya angʼöndu ino eghuye ghosinchu.
Aghakira kiri,
kinya omoona o ngʼöndu ahaakira
hano akubha aranungu amachööki.
33 ꞉Mbaamuchëëriri na komwima amënda ghaache,
eriibhagha re ghoteneru ekiina.
Taanyi‑ho omooto uno aghotora ghosiikërëra amangʼana
ighoro e rwibhoro rooche,
gho kubha ꞉niituru mo‑se ino.”c
34 Omokoro uyo akamobhoori Bhiiribho akabhugha,
“Neghusabha omboorere,
omurööti uyo naghosiikëra amangʼana ghayo ighoro yaawe?
Kana n‑ighoro yaache omwene,
ghasi e mooto owonde?”
35 Hayo hayo Bhiiribho aghasëëma gho kohetera Amandëkö ghayo ghayo,
komobhoorera Ngʼana Anchömu ighoro e Yesu.
36 Hano bhaare mo‑rughëndö,
bhakahika ahaghiro hano ꞉haare na amanche.
Omokoro uyo akamobhoorera Bhiiribho akabhugha,
“Mööhi!
Hano,
ngaanyi‑ho amanche.
N‑ghento ke ghekundeki netabhatiisu?” [
37 Bhiiribho akamobhoorera akabhugha,
“Oramokumi Yesu Kirisito kwo motema waacho woose,
noghotora kubhatiisu.”
Akamugharokeri,
“Neghokumi kubha,
Yesu Kirisito n‑Omoona o Ryobha.”]
38 Hayo hayo omokoro uyo akahatëka bhiimeereri amöntöka.
Mbe,
bhaghiika bhaghasöha mo‑manche bhombe,
Bhiiribho akamubhatiisa.
39 Hano bharuure mo‑manche,
Akörö e Mutëmi ekamusara Bhiiribho.
Omokoro uyo tamorooche wiiki,
amare iwe akëëndërëra no orughëndö rooche ino arasiighasiigha.
40 Bhiiribho aghatookera anyi mo‑moghya o Asoto.
Ibheere aghaköra orughëndö araraghani Angʼana Anchömu mo‑meghya ghyose ghe iyo,
mbagha akahika mo‑moghya o Kayisaariya.