Amaköri gha Bhatomu 5

Obhuröngö bho Ananiya na Sabhira

Ibheere naare‑ho omooto umu, eriina reeche Ananiya, haghirohamu no omukari waache Sabhira. Ibho bhoose bhaghaghori omoghondo waabho. 2 Mo‑chambiiri chino ꞉bhaabhwine, Ananiya akabhisa eribhaara re chambiiri chiyo kwo meremo gheebho. Mukaache naare ishereriini nawe ghuköra hangʼu. Chambiiri chino ꞉chiisaaghiri, Ananiya aghachehira akabhaha bha Yesu arabhugha nicho choose.

3 Bheetero akamobhoorera, “Iye Ananiya! Kana ndewusöhëriire omotema waacho, ekirëngërë ghe kobhoorera obhuröngö . Nobhughiri chambiiri chino n‑choose, eriibhagha noobhisiri eribhaara re chambiiri chino obhwine gho ghoghori omoghondo waacho. 4 Hano ore okeere kowoghori, omoghondo uyo n‑o waacho ore. Koru uche kumara kowoghori, noore no obhotoro bho ghukörëra chambiiri chino obhwine ghyokyose kino ore kwënda iye mwene. Mbe! Kana ghwake wëndiri ghuköra angʼana enga ino? Toobhughiri obhuröngö ghokwito itu bheene, amare koru na ambërë e Ryobha!”

5 Ananiya hano oghwire amangʼana ghayo gha Bheetero, hayo hayo aghagho haase, aghaku. Bhoose bhano ꞉bhooghwire amangʼana ghayo bhaghatiina chwee. 6 Bhakamara abhabhureni bhakaacha bhakawobhishi omobhere waache asanda, bhakawohoroki anche, bhakaworyeka.

7 Mbe, ghaache koheta kinya amasa atato, mukaache Ananiya woose akahika hayo, ateeche amangʼana ghano gharweriire hayo. 8 Bheetero akamobhoori akabhugha, “Mbe, nomboorere, chambiiri chino nicho munaatiri omoghondo waanyu?”

Akamugharokeri akabhugha, “Hee! ꞉Ntoowunaatiri gho chambiiri chiyo!”

9 Bheetero akamobhoorera akabhugha, “Kana iye no omosubhe waacho mwishereriini koyisaki Akörö Ahörëëru e Mutëmi? Mööhi! Abhabhureni bhano ꞉bhaare bhaghiire komoryeka mosubhe waacho mbamariri ghugharuka, hano bhaanyi mo‑ghisëku, mbaghokohira iye woose ibheerebheere!”

10 Hayo hayo Sabhira woose aghagho haase ambërë e maghoro gha Bheetero, aghaku. Niho abhabhureni bhaghasöha, bhakabhöna Sabhira woose amariri ghoku. Bhakamohoroki anche, bhakamoryeka haghuhe no omosubhe waache. 11 Amangʼana ghayo ghaghaghëri abhaato bhoose bha mo‑kanisa bhaghatiina chwee, haghirohamu na abhande bhoose bhano bhooghwire amangʼana ghayo.

Abhatomu bha Yesu ˆbhaghaköra ebhiraghe bhyaru

12 Abhatomu bhayo bha Yesu mbaare bharaköra ebhyërëkërëri ne ebhiraghe bhyaru mo‑bhaato. Wiiki abhakumi bha Yesu bhoose mbaare bhanariri ghwikomana haghirohamu mo‑riibhuru re Seremaani kwo mukörö umu. 13 Abhaato mbaare bhabhasookiri chwee, koru hangʼu, abhaato bhano bhataamokumiri Yesu bhaghatiina ghughöötana nabho. 14 Abhaato abhande bhaaru, abhasubhe na abhakari, ꞉mbaamokumiri Omutëmi, ekirëngërë ke bhakumi nkeere keriyëngëra chwee.

15 Ibheere kurëngʼaana ne ebhiraghe bhe bhatomu bhayo, abhaato mbaare bharabhahira abhabhabharu anche mo‑chanchëra. Abhabhabharu bhayo mbaare bharabharaari mo‑bhorere na mo‑mashëërö, kubha eriibhagha Bheetero akoheta, ekiriiri keeche kebhaturi abhamu bhahörë. 16 Gho chaasiko chaaru abhaato bhaaru ꞉mbaahikiri koru mo‑meghya ghe chambareka che , bharabharëëta abhabhabharu bhaabho, na bhaare bhoose ꞉bhaaghööturu ne emisambu, bhakabhahöri.

Abhatomu bha Yesu ˆbhakanyaakibhu

17 , na abhaghëndi bhaache bhoose bhano mbaare bha rikinda re , bhaghaghöötu ne eriihari ighoro e bhatomu bha Yesu. 18 Gho ghayo, bhakabhaghööta abhatomu bhayo, bhakabhabhöha mwighërëcha. 19 Mbe, obhotiko bhuyo umu o Mutëmi aghiighora charwighe che riighërëcha riyo, akabhahoroki anche, akabhabhoorera akabhugha, 20 “Mughëndë mwimeerere , mobhabhoorere abhaato amangʼana ghoose ighoro e bhuhöru bhuno!” 21 Abhatomu bhayo bhaghiishereri, bhaaghaye Mwisëngërö atabhoori moomake, bhaghasëëma kweghi abhaato.

Eriibhagha riyo riyo Omuchaama Omokoro, haghirohamu na abhaghëndi bhaache, bhaghaköra ekiina ghekoro, bhakabhabherekera abhakoro bhoose bha re Bhayahuuti bhatëmëërane. Bhakabhatoma abhachongi bha mo‑riighërëcha riyo, kubha bhabharëëtë abhatomu bhayo. 22 Amare hano bhasöhiri‑mu, bhatabhwine‑mu abhatomu bhayo. Bhaghagharuka kwo bhakoro bhayo, bhakabhabhoorera bhakabhugha, 23 “Hano tohikiri mwighërëcha, ntobhwine charwighe chigheere bhoheene, na abhachongi bhiimeeriire anche e charwighe bharachonga. Amare eriibhagha twighwire charwighe, totaabhwine‑mu mooto wowoose!”

24 Omokoro o bhachongi na abhakoro bha bhachaama hano bhooghwire ghayo, bhaghaghöötu na ahaho, bhaakabha bharabhoorani, “Kana woori! Amangʼana ghano nibhu ghaanyi?”

25 Eriibhagha riyo omooto umu akaacha, akabhabhoorera, “Mutëghëërërë! Abhaato bhano moore mobhabhöhiri, ibheere Mwisëngërö bhaanyi, mbakweghi‑mu abhaato.” 26 Niho omokoro uyo o bhachongi, haghirohamu na abhachongi bhaache, bhaaghaye kwo bhatomu bhayo, bhakabharëëta. Amare bhatabhaghöötiri gho changuru, gho kubha ꞉mbaatiiniri abhaato bhano ꞉bhaare na abhatomu bhayo kubha, mbangabharasiri na amabhohe.

27 Ibheere bhakabharëëta mo‑riibharacha eriikoro, bhakabhiimeereri ambërë yaabho. Omuchaama Omokoro akabhabhoori akabhugha, 28 “꞉Ntoobharëkiri kwo bhuhaari kubha moteeghi abhaato ighoro eriina re mooto uyo! Amare mokwëndërëra kweghi abhaato amangʼana ghayo ahaghiro hoose hano Yerusareemu, morabhugha kubha oroko rooche n‑ighoro yiito roonyi!”

29 Bheetero na abhatomu abhaghëndi bhaache, bhakabhagharokeri bhakabhugha, “Ntokwëndëru toresooke Eryobha eryene, ghokera ghosooka abhaato! 30 Inyu momwitiri Yesu gho nchëra e komumamba mo‑musarabha, amare Eryobha re bhasookoro bhiito rekamoryoki. 31 Rekamoghongi na komuha omweya gho komotoora eribhaara reeche re kwiro, abhe Omukangati no Omotoori. Eryobha ꞉ndiiköriri hangʼu kubha retukörë itu Abhiisiraeri totighe inkongʼorimu amasari ghiito, twabhëru. 32 Itu n‑abhiibhatereri bha mangʼana ghayo ghoose, na Akörö Ahörëëru ino Eryobha rebhaheere bhano bhakoresooka, neghoghaghambera haghirohamu na niitu.”

33 Hano abhakoro bhayo bhooghwire ghayo, bhaghakarara chwee, mbaare bharëënda kobhiita abhatomu bhayo. 34 Hayo mo‑riibharacha riyo, naare‑ho umu, eriina reeche Ghamariyeeri. Ghamariyeeri uyo, naare omweghi o meghiro ghe Musa, wiiki nasookuru na abhaato bhoose. Ibheere akiimeerera, akahatëka kubha abhatomu bhayo bhabhahoroki anche kwo riibhagha ighuhe. 35 Akamara akabhabhoorera abhakoro abhaghëndi bhaache akabhugha, “Abhasubhe bha Isiraeri, hano mookubha mokeere ghuköra angʼana ino mokwënda kobhakörëra abhaato bhano, mwihëëbhë singa bhoheene! 36 Mokohiita chaasiko chino chehetiri, ꞉naarweriire omooto umu omwigharori, eriina reeche Tewuta. Tewuta uyo naare ariiköri kubha n‑omooto mokoro, na abhaato kinya amaghana ane bhaghaghöötana nawe. Amare antenero, aghiitu, na bhoose bhano ꞉bhaare bhamutambiine bhaghasancha. Amahöki ghaabho ghoose ghaakabha gha bhoowa. 37 Wiiki, eriibhagha re kubhara abhaato, harweriire omwigharori owonde. Omwigharori uyo m‑Mughariraaya are, eriina reeche naare arabherekeru Yuuta. Woose akabhöna abhaghëndi bhaaru, amare woose aghiitu, na bhoose bhano ꞉bhaamutambiine bhaghasancha. 38 Mbe, ibheere ˆnekabhabhoorera, mobhatighe abhaato bhano! Motabhakörëra ghyokyose, gho kubha aribha erirwacha reebho na ghoose ghano bhaghuköra ngatanguru na abhaato, ngaghosira agheene. 39 Amare erabha emeremo ghiyo n‑ghe Ryobha, motaaghotora kobharëki, mookubha moraryanga Eryobha eryene.”

Amangʼana ghayo gha Ghamariyeeri, abhaghëndi bhaache bhayo bhaghaghiishereri. 40 Bhakabhabherekera abhatomu bhayo bhasöhë mo‑nyumba, bhakahatëka bhatëmu chasaanyi. Bhakamara bhakabharëki kubha bhatabhoorera omooto wowoose ighoro e riina re Yesu, bhakabhatigha bhaaghaye.

41 Abhatomu bhayo bhakahoroka mo‑riibharacha riyo bharasiighasiigha, kinya Eryobha rebhaheere asooko e ghutaraahu gho ghiri e riina re Yesu. 42 Bhataatighiri kweghi abhaato na kobharaghaneri Angʼana Anchömu kubha Yesu niwe . Chaasiko choose ꞉mbëëndëriire kweghi Mwisëngërö, na mo‑chanyumba che bhaato.