Amaköri gha Bhatomu 2

Akörö Ahörëëru ˆekaacha orosiko ro Bhentekositi

Hano orosiko ro Bhentekositi rohikiri, abhaghëndi bhoose bha Yesu mbaare bhiikomiine mo‑nyumba imu iyo Yerusareemu. 2 Hayo hayo, bhakooghu koru Mwishaaro ekerumo kinya ke mukama muhaari, gheghiichori anyumba yoose. 3 Niho bhakarighi ebheghiro bhenga kinya chaamemi che mororo, cheghasancha, cheghiikara ighoro e mooto woose. 4 Abhaato bhayo bhoose bhaghiichoribhu Akörö Ahörëëru, bhaghasëëma ghosiikëra mo‑bhighambo haghare haghare, kinya bhuure ꞉ëbhëërëkëriiri.

5 Mbe, hayo mbaare‑ho Abhayahuuti bhano ꞉bhaare bhararisëngëra Eryobha. Abhayahuuti bhayo mbaare bharuure chaase choose che se. 6 Hano bhooghwire amaraka ghayo, abhaato bhaaru bhaghiikomana hayo. Omooto woose akahagha, gho kubha ꞉nooghwire eghighambo keeche kerasiikëru na abhaghëndi bhayo bha Yesu. 7 Ghayo ghakabharoghoori na kuhagha chwee, bhakabhugha, “Mutëghëërërë! Bhano bhaghosiikëra hangʼu, bhoose m‑Bhaghariraaya! 8 Mbe! Nibhu ekabha mooto woose akooghu bharasiikëra gho ghighambo keeche ghe simoka? 9 Wiiki ghate yiito, mbaanyi‑ho abhaato abhande koru mo‑chaase che Abhariti, na Abhameeti, na Abhaeraamu. Wiiki abhande koru mo‑chaase che Mesobhotamiya, na Yuteya, na Kabhatokiya, na Bhonto, na Asiya, 10 na Bhirighiya, na Bhambiriya, na Miisiri. Mbaanyi‑ho abhande koru chambaara che se e Riibhiya, ino enyi haghuhe no omoghya o Kireene. Mbaanyi‑ho wiiki bhano ꞉bhaaköriri orughëndö koru mo‑moghya o Ruumi, abhande n‑Abhayahuuti bha simoka, abhande n‑abhaato bha matöngö bhano bhakumiri atiini e Kiyahuuti. 11 Mbaanyi‑ho abhande bhano ꞉bhaaruure Kireete, na abhande n‑Abhaarabhu ꞉bhaare. Ntooghwire itu bhoose, abhaato bhano bharareghongi Eryobha kwo maköri ghaache amakoro, mo‑bhighambo bhiito!”

12 Abhaato bhoose bhakaroghoora na kuhagha chwee, bhakabhoorani bharabhugha, “Naho ino n‑ngʼana ke?” 13 Amare abhamu ghate yaabho bhakabhachebhora abhaghëndi bha Yesu, bharabhugha, “Mbanywire amaro gha musabhiibhu, bhakarëëwu!”

Bheetero ˆakabheeghi abhaato ighoro e Körö Ahörëëru

14 Ibheere Bheetero akiimeerera, haghirohamu na abhatomu abhaghëndi bhaache bhaare ikomi na umwa, akabhabhoorera abhaato bhayo kwo riiraka ikoro arabhugha, “Inyu Abhayahuuti bha Yerusareemu, na abhande bhano moruure mo‑chaase echende, muntëghëërërë bhoheene, nebhabhoorere angʼana ino! 15 Moghwituuri abhaato bhano mbarëëwuru, amare tiyaanyi, bhatarëëwuru. Ibheere nchimariri koheta chaasa ishato hangʼu korwera hano bhukëëriire! 16 Amare amangʼana ghano nigho ghaare Eryobha ꞉reebhughiri gho kohetera omurööti waache Yoweri kubha,

17 ‘Mo‑chaasiko che ntenero,

neghwiki Akörö yaane ighoro e bhaato bhoose.

Abhaana bhaanyu bha kebhureni

na bha ghiike mbakurööta,

na abhabhureni bhaanyu mbakorighi amarighi,

na abhagharuka mbakurööta amaröötö.

18 Mo‑chaasiko chiyo, neghwiki Akörö yaane

ighoro e bhatamishi bhaane,

bha ghesubhe na bha ghiike,

bhoose mbakurööta.

19 Neghuköra ebhiraghe ighoro mwishaaro,

ne ebhyërëkërëri hano mo‑se.

Abhaato mbakorighi ebhyërëkërëri bhe masaahë,

no omororo, no omooki o ryoki mokoro.

20 Omu noghwigharura kubha ekengʼuuri,

no omwëri nookubha mubhararatu piri ke masaahë.

Ghayo ghoose ngaghuköru rokeere korwera,

orosiko orokoro ro bhokumi obhokoro bho Mutëmi Waryobha.

21 Eriibhagha riyo, wowoose uno aghusabha abheru

koru kwo Mutëmi Waryobha naghotooribhu.’”

22 Bheetero akëëndërëra kobhugha, “Inyu abhaato bha Isiraeri, muntëghëërërë bhoheene! Eryobha eryene ndëbhëërëkiri obhokoro bho Yesu o Nasareeti ghokoonyu, gho nchëra e bhiraghe, ne ebheroghooro, ne ebhyërëkërëri bhe manga maaru bhino Eryobha ꞉reemoheere ghuköra ghate yaanyu. Ghayo, inyu mogheeche bhoheene. 23 Akamara Yesu uno akaruusibhu ghokoonyu, kinya Eryobha eryene reere ryeche na kurëngʼaana na amënda ghaache koru simoka. Wiiki inyu mokamwita mo‑musarabha, gho kohetera abhaato bha matöngö. 24 Amare Eryobha rekamotoori koru mo‑mabhe ghayo gho komoryoki koru mo‑bhaku, gho kubha oroko rotangatoriri komwangera Yesu! 25 Koru Tawuti ꞉naabhughiri ighoro e Yesu kubha,

‘Nemorooche Omutëmi Waryobha

anyi haghirohamu na neeni chaasiko choose.

Wiiki gho kubha naanyi haghuhe na neeni, nteeghosingisu.

26 Gho ghayo, omotema waane nuchömiiru,

wiiki ororeme roone ndokoriryata.

Koru omobhere waane, woose noonyi na amiitëngʼërö ighoro yaache,

27 gho kubha iye Omutëmi Waryobha tooghontigha ,

tooghwishereri kubha omobhere waane obhushere iyo,

eni Omutööbhiyu waacho.

28 Nönyëërëkiri chanchëra che bhuhöru,

noghunköra nichaghane chwee,

gho kubha noonyi haghuhe na neeni.’”

29 Wiiki Bheetero akëëndërëra kobhugha, “Bhahiiri bhaane, neghotora kobhabhoorera kwo bhuhëënë kubha, sookoro wiito Tawuti tiisiikëriire omwene gho kubha, ꞉naakuure, akaryeku, na ambeehera yaache, hano enyi koru reero. 30 Amare gho kubha Tawuti m‑murööti are, ꞉naamënyiri kubha Eryobha ꞉ndeemuraghiri gho kuraheri kubha, ndekomuköra omooto umu o mo‑rwibhoro rooche ghukangata obhutëmi bhooche. 31 Tawuti ꞉naarooche amangʼana ghano ghakuucha korwera, aghasiikëra ighoro e koryoka kwo uyo kubha, taatighuru nyaari no omobhere waache toobhushiri. 32 Yesu uyo, Eryobha ꞉ndeemoryokiri koru mo‑bhaku, itu bhoose n‑abhiibhatereri bha ngʼana iyo toonyi. 33 Eryobha riyo rekamoghongi na komuha omweya, niikeere eribhaara reeche re kwiro. Akamara Taata Waryobha akamuha Yesu Akörö Ahörëëru kinya bhuure are amuraghiri, Yesu woose aghatwikeri Akörö iyo. Ibheere ghano gharweriire, nigho ghano moghogharighi na ghoghooghu. 34 Tawuti omwene tatiiriri na ghusöha Mwishaaro, amare akabhugha,

‘Omutëmi Waryobha ꞉naamobhooriire Omutëmi waane,

Wiikare eribhaara re kubhökö koone gho kwiro,

35 mbagha neghukörë okinde abhabhisa bhaacho

na kobhakangata.’”

36 Bheetero akamareereri gho kobhugha, “Gho ghayo, inyu na Abhiisiraeri bhoose mokwëndëru mumënyë obhuhëënë kubha, Eryobha ꞉ndeemuköriri Yesu, uno inyu ꞉moomumambiri mo‑musarabha, kubha Omutëmi na Kirisito.”

37 Abhaato bhayo, hano bhooghwire amangʼana ghayo, ghakabhangʼuuta chwee mo‑metema gheebho. Bhakamobhoori Bheetero na abhaghëndi bhaache bhakabhugha, “Abhahiiri bhiito, ibheere tukörë bhu?” 38 Bheetero akabhabhoorera akabhugha, “Omooto woose atuukuunere amasari ghaache, na abhatiisu kwo riina re Yesu Kirisito, kubha amwabhërë na kuhaabhu Akörö Ahörëëru. 39 Eryobha ꞉ndiiraghiri eriiraghano rino gho ghiri yaanyu, na kwo bhaana bhaanyu, na kwo bhano bhoose bhaanyi kurë. Omutëmi Waryobha ꞉naaraghiri kwo bhaato bhoose bhano akobhabherekera.”

40 Bheetero akëëndërëra kobhabhoorera abhaato bhayo amangʼana aghande maaru gha kobhashaangʼi. Akabhakumereri arabhugha, “Musabhe Eryobha rebhatoori, retaacha kobhatenera ekiina haghirohamu na abhaato bha rwibhoro runo orobhe!” 41 Abhaato ekirëngërë ke bheku bhitato (3,000) bhaghaghakumi amangʼana ghayo gha Bheetero, bhakabhatiisu, bhaghaghöötana na abhaghëndi abhande bha Yesu orosiko ruyo.

Obhughöötani bho bhaghëndi bha Yesu

42 Abhaghëndi bha Yesu ꞉mbaaköngʼiiri mo‑bhughöötani bhuyo, bhareegha ameeghi gha bhatomu bha Yesu, na ghosuura omughaate haghirohamu, na korisabha Eryobha. 43 Abhatomu bhayo mbaare bharaköra ebhyërëkërëri ne ebhiraghe bhyaru, mbagha abhaato bhoose bhaakabha bhararesooka Eryobha. 44 Abhakumi bhoose mbaare no obhumu, mbaghöötiine kwo bheghiro bhyose na kuhööha obhwame bhoobho. 45 Mbaare bharaghori ebheghiro bheebho na chambiiri chino ꞉bhaare bharabhöna, bhaghachihööha, kurëngʼaana na amënda gha mooto woose. 46 Chaasiko choose mbaare bharatëmëërana haghirohamu . Mbaare bharasuura omughaate mo‑chanyumba cheebho, na kurë haghirohamu gho ghuchömëru na gho ghusambaaruka. 47 Mbaare bharareghongi Eryobha na ghosiighu na abhaato bhoose. Chaasiko choose Omutëmi Yesu akabha arabhatoori abhaato abhande bha masari, bhaghaghöötana na abhakumi abhande, no omubharo waabho ökëëndërëra kwiyëngëra chwee.