Yohana 13

Yesu ˆakabhiishaabhi amaghoro abhaanabheegha bhaache

Mbe, eriibhagha anyangi e ere ekeere kohika, Yesu akamënya kubha eriibhagha reeche ˆrekahika re ghutanura mo‑se ino ghuye ghwi Ishe. Yesu naare asiighiri abhaato bhaache bhano ꞉bhaare mo‑se, wiiki ꞉naabhasiighiri koheta ekirëngërë.

2 Yesu na abhaanabheegha bhaache bhaghiikara kurë ekiinyakurë ke mughörööbha. Eriibhagha riyo, ndeere remotebhiritebhiri Yuuta, omoona o Simiyooni Isikariyoote, kubha amwigharurani Yesu. 3 Yesu ꞉naamënyiri kubha Taata namoheere obhotoro bho kobhikangata ebheghiro bhyose. Wiiki ꞉naamënyiri kubha ꞉naaruure kwo Waryobha, na kubha naghugharuka wiiki kwo Waryobha. 4 Mbe, hano bhaare mo‑ndaaghëra, Yesu akiimeerera, akaruusi andachana yaache, akiimoki eghitambara akiinata mo‑keribhichi. 5 Akahoma amanche mo‑ghetibha. Mbe, aghasëëma kobhiishaabhi abhaanabheegha bhaache amaghoro na kobhasangura ne eghitambara kino are inatiri.

6 Hano Yesu amohikiire Simiyooni Bheetero, Bheetero akamobhoori akabhugha, “Oo Omutëmi, nokwënda konyishaabhi amaghoro ghaane?” 7 Yesu akamugharokeri akabhugha, “Iye tweche ibheere ghano neghuköra, amare noghoghamënya eriibhagha rino rekuucha.” 8 Bheetero akamugharokeri akabhugha, “Iye tookonyishaabhi amaghoro naabha!” Yesu akamugharokeri akabhugha, “Aribha nteeghoghwishaabhi, toghotora kubha haghirohamu na neeni wiiki.” 9 Simiyooni Bheetero akamugharokeri akabhugha, “Oo Omutëmi, erabha hangʼu, otanyishaabhi amaghoro agheene, amare na amabhökö ghaane haghirohamu no omutu waane.” 10 Yesu akamugharokeri akabhugha, “Omooto uno ishaabhiri, taakwëndëru ghwishaabha wiiki, amare ngwishaabha amaghoro okwene. Uyo niyeriri inkongʼorimu. Inyu m‑bheero, amare taanyi bhoose.” 11 Yesu naare amweche uno akomwigharurani, nikyo ꞉ghiighëriri akabhugha kubha, “Amare taanyi bhoose.”

12 Hano Yesu amariri kobhiishaabhi abhaanabheegha bhaache amaghoro, akabheeka andachana yaache, aghiikara wiiki mo‑ndaaghëra, akabhabhoorera akabhugha, “Kana, mumënyiri ghano nebhaköriire inyu? 13 Inyu mokomberekera eni kubha, ‘Omweghi,’ wiiki mokomberekera, ‘Omutëmi.’ Moghosiikëra gha hëënë, kubha eni n‑Omweghi, wiiki n‑Omutëmi, gho kubha hangʼu neenyi. 14 Mbe, aribha eni uno neenyi Omweghi no Omutëmi waanyu, nebhishaabhiri amaghoro ghaanyu, hangʼu hangʼu na niinyu mubhe morishaabhani amaghoro. 15 Nëbhëërëkiri eghetuubhaani kubha na niinyu mukörërane kinya eni nebhaköriire inyu. 16 Mahëënë ˆnekabhabhoorera, omusësë taanyi omokoro ghokera omutëmi waache, wiiki uno atomuru taanyi omokoro ghokera uno amotomiri. 17 Moraghamënya ghayo, ngʼoni inyu moraghaköra.

18 “Nteeghosiikëra ghano gho ghiri yaanyu bhoose. Nebheeche abhaato bhano nebhahwire kubha abhaanabheegha bhaane. Amare ngakwëndëru ghahikeerane Amandëkö Amatööbhiyu ghano ghakobhugha kubha, ‘Musaani waane uno are araraaghëra haghirohamu na neeni, aghiigharura kubha omobhisa waane.’ 19 ˆNekabhabhoorera ghoose ghano ghakeere korwera, kubha eriibhagha ghakuucha korwera, moghokumi kubha ‘Eni Niwe.’ 20 Mahëënë ˆnekabhabhoorera, omooto wowoose uno akomosongʼaana uno netomiri, nasongʼaaniri na neeni. Hangʼu hangʼu, uno aghonsongʼaana eni, namosongʼaaniri Taata uno antomiri.”

Yesu ˆaghasiikëra ighoro e uno akomwigharurani

(Mataayo 26:20–25; Maariko 14:17–21; Ruuka 22:21–23)

21 Hano Yesu amariri kobhugha ghayo, aghiitumata chwee mo‑körö yaache, akabhugha haheero kubha, “Mahëënë ˆnekabhabhoorera, umu ghate yaanyu nakuucha ahaane mo‑mabhökö gha bhabhisa.” 22 Abhaanabheegha bhaache bhaghasëëma kumööhani, gho kubha bhataamënyiri n‑niwe aghughambera. 23 Naare‑ho omoonamwegha umu, uno Yesu are asiighiri chwee. Iwe naare ikeere haghuhe na Yesu eriibhagha re ndaaghëra. 24 Mbe, Simiyooni Bheetero akamosima omoonamwegha uyo, akamobhoorera akabhugha, “Omobhoori Yesu n‑niwe akobhugha ghateghate yiito?” 25 Mbe, omoonamwegha wuure akamosighamera Yesu, akamobhoori akabhugha, “Oo Omutëmi, n‑niwe?” 26 Yesu akamugharokeri akabhugha, “Niwe uno nekomuha egheteneka ke mughaate kino niköriri koru mo‑ghetibha.” Mbe, akiimoki egheteneka ke mughaate aghaköri mo‑ghetibha, akamuha Yuuta, mwërëëti o Simiyooni Isikariyoote. 27 Yuuta hano amariri kwimoki egheteneka kiire ke mughaate, Erishambu rekamusöhërëra Yuuta. Yesu akamobhoorera akabhugha, “Ghano okwënda ghuköra, ghakörë bhwango!” 28 Amare taanyi‑ho koru umu mo‑bhaare ꞉bhaare bhararaaghëra uno amënyiri kubha ngwake Yesu amobhooriire hangʼu. 29 Abhamu ꞉mbiituuriri kubha Yesu namobhooriire kubha, aghore bhino bhekwëndëru mo‑nyangi, hamu abhahë abhahabhe chambiiri indengʼaaneru, gho kubha Yuuta niwe are omotindeki o riighöchi re chambiiri. 30 Mbe, hano Yuuta imokiri egheteneka kiire, hayo hayo akahoroka anche. Eriibhagha riyo n‑obhotiko ꞉haare.

Yesu ˆakabhaha abhaanabheegha bhaache omoghiro omuhë

31 Mbe, eriibhagha Yuuta ꞉ahorokiri anche, Yesu akabhabhoorera abhaanabheegha bhaache akabhugha, “Ibheere obhokumi bhoone obhokoro eni ˆbhoghatingʼi korighibhu haheero. Wiiki, mbokorighibhu haheero obhokumi obhokoro bho Ryobha kohetera mo‑maköri ghaane. 32 Kinya bhokorighibhu obhokumi bhooche obhokoro kohetera mo‑maköri ghaane, mbe, Eryobha ryose ndëköbhëërëki abhaato obhokumi bhoone obhokoro eni Omoona o Mooto moose yaache omwene, wiiki ndeghuköra bhwango.

33 “Inyu abhaana bhaane, neekubha na niinyu kwo riibhagha ighuhe hangʼu. Kinya bhuno neere nebhabhooriire abhakangati bha Bhayahuuti, hangʼu hangʼu ˆnekabhabhoorera na niinyu ibheere kubha, hano neeghuye, motaaghotora kuucha. 34 Ibheere nekobhaha omoghiro omuhë, ‘Mosiighane. Kinya bhuno eni nebhasiighiri inyu, hangʼu hangʼu na niinyu mosiighane.’ 35 Erabha morasiighana, abhaato bhoose mbakumënya kubha inyu n‑abhaanabheegha bhaane moonyi.”

Yesu ˆakamobhoorera Bheetero kubha nakomwanga

(Mataayo 26:31–35; Maariko 14:27–31; Ruuka 22:31–34)

36 Mbe, Simiyooni Bheetero akamobhoori Yesu akabhugha, “Oo Omutëmi, hayi oghuye?” Yesu akamugharokeri akabhugha, “Neeghuye hano iye otaaghotora ghuntambana ibheere, amare noghuntambana eriibhagha rino re kuucha.” 37 Bheetero akamobhoori akabhugha, “Oo Omutëmi, ghwake nteeghotora ghoghutambana ibheere? Eni niisheriiri ghoku gho ghiri yaacho!” 38 Yesu akamugharokeri akabhugha, “Bheetero, m‑mahëënë nwisheriiri ghoku gho ghiri yaane? Mahëënë ˆneghakobhoorera, hano asërëëcha ekubha ekeere ghughamba, nookubha onyangiri ghatato.”