Yohana 5

Yesu ˆakamuhöri omubhëëru

Ghaache koheta ghayo, Yesu aghaye mo‑moghya o , mo‑nyangi nyarebhe e Bhayahuuti. 2 Mo‑moghya uyo, nkeere‑ho ekehita ghekoro kino ghekobherekeru “Ekehita ke Ngʼöndu.” Haghuhe ne ekehita kiyo, ꞉haare ne eriishima rino rebherekiiru mo‑ghighambo ghe Kebhuraaniya, Bhetisaata. ꞉Ngaare‑ho amabhuru ataano ghano ꞉ghaare na chambiro. Amabhuru ghayo ꞉ngiinaariiri eriishima riyo. 3 Hayo mbaare bharamisi‑ho abhabhabharu bhaaru, abhahuku, na abhabhëëru, na bhano bhakuure eribhaara. [Mbaare bharaghanya amanche ghatibhoru, 4 gho kubha marayika o Ryobha naare araacha ghoghatibhora amanche mo‑riishima riyo. Omubhabharu o mumbërë ghusöha naare arahöra obhubhabharu bhooche bhuno are nabho.]

5 Naare‑ho omosubhe umu uno are omubhabharu kwo riibhagha re meeka miröngö etato ne enaane. 6 Mbe, Yesu ꞉naamënyiri kubha nabhabhiire kwo riibhagha irë. Akamorighi amisiri, akamobhoori akabhugha, “Kana, nokwënda kubha muhöru?” 7 Niho omubhabharu uyo akamugharokeri Yesu akabhugha, “Oo Omutëmi, ntighöötë omooto o ghontoora mwishima hano amanche ghaghotibhoru. Hano nekwënda ghusöha mwishima riyo, omooto owonde ankangata ambërë yaane.” 8 Mbe, Yesu akamobhoorera omubhabharu uyo akabhugha, “Imeerera, ghëgha erishëërö reecho, ughëndë.” 9 Hayo hayo, omooto wuure akahöra obhubhabharu bhooche, aghaghëgha erishëërö reeche, aghasëëma ghughënda. Yesu ꞉naamuhöriri omooto uyo, orosiko ro . 10 Gho ghayo, abhakangati bha Bhayahuuti bhakamobhoorera omooto uyo ꞉ahöruru bhakabhugha, “Reero n‑orosiko ro Riikane, emeghiro ngeghokurëki ghughëgha erishëërö reecho.” 11 Amare omooto uyo akabhagharokeri akabhugha, “Omooto uno ꞉ahöriri niwe ambooriire kubha nighëghë erishëërö reene nitanure.” 12 Niho abhakangati bhaare bhakamobhoori bhakabhugha, “Kana, n‑niwe uno akobhooriire ughëghë erishëërö reecho utanure?” 13 Amare omooto uyo taamumënyiri uno ꞉amuhöriri, gho kubha Yesu naare amariri koru ahaghiro hayo, gho kubha ꞉haare ne erikinda ikoro re bhaato. 14 Ghayo ghaache koheta, Yesu akamubhöna omooto uyo , akamobhoorera akabhugha, “Tëghëërëra, ibheere nuhöriri. Otaköra amasari wiiki, gho kubha oraköra amasari, nokunyaaka chwee ghokera hayo ekimbërë.” 15 Hayo hayo, omooto wuure akamotigha Yesu, aghagharuka wiiki kobhabhoorera abhakangati bha Bhayahuuti kubha n‑Yesu niwe amuhöriri. 16 Niho abhakangati bha Bhayahuuti bhaghasëëma komwirighori Yesu gho kubha naare arahöri abhaato orosiko ro Riikane.

Obhuhöru mbokubhönëka kwo Moona o Ryobha

17 Mbe, Yesu akabhabhoorera akabhugha, “Taata waane naghuköra emeremo chaasiko choose, eni woose neghuköra emeremo hangʼu hangʼu.” 18 Gho ghayo, abhakangati bha Bhayahuuti bhaghasëëma ghutabhara anchëra e komwita Yesu. ꞉Mbaaköriri hangʼu gho kubha taasariri emeghiro ghe Riikane eryene, amare ꞉naabherekiire Eryobha kubha, n‑Ishe. Gho nchëra iyo naare ariitoora kubha, naanyi kebhuno Eryobha reenyi. 19 Yesu akabhabhoorera abhakangati bhaare akabhugha, “Mahëënë ˆnekabhabhoorera, Omoona taaghotora ghuköra ghyokyose gho changuru cheeche. Naghotora ghuköra ghano arooche Ishe araghaköra, wiiki ghoose ghano Ishe aghuköra, nigho ghayo ghayo Omoona aghuköra. 20 Taata namosiighiri Omoona, nikyo ahamwërëki emeremo ghyose ghino aghuköra, wiiki nakomwërëki ghuköra ebheroghooro bhekoro ghokera bhiyo, na niinyu mokoroghoora chwee. 21 Kebhuno Taata akobharyoki abhaku na kobhaha obhuhöru bho miishe ghyose, hangʼu hangʼu Omoona nahaabhaha obhuhöru abhaato bhano asiighiri kobhaha. 22 Taata tahamotenera ekiina omooto wowoose wuure, amare namoheere Omoona obhotoro bho kobhatenera ekiina abhaato bhoose. 23 Gho nchëra iyo, abhaato bhoose mbakomosooka Omoona kinya bhuno bhakomosooka Taata. Omooto wowoose uno ataakomosooka Omoona, mbe, taakomosooka Taata uno amotomiri.

24 “Mahëënë ˆnekabhabhoorera, abhaato bhoose bhano bhaghoghooghu amangʼana ghaane na korekumi Eryobha rino rentomiri mbaanyi no obhuhöru bho miishe ghyose. Bhataaghoteneru ekiina kwo masari ghaabho, amare mbatëënyiri koru mo‑roko na ghusöha mo‑bhuhöru bho miishe ghyose. 25 Mahëënë ˆnekabhabhoorera, eriibhagha ndekuucha, wiiki ˆrekahika, bhano bhakuure mbakooghu eriiraka re Moona o Ryobha. Niho bhano bhakooghu, mbaakubha no obhuhöru bho miishe ghyose. 26 Kinya bhuno Taata anyi no obhuhöru moose yaache, hangʼu hangʼu nibhu amoheere Omoona kubha no obhuhöru moose yaache. 27 Wiiki, namoheere Omoona obhotoro bho kobhatenera ekiina abhaato, gho kubha iwe n‑. 28 Motahagha ighoro e ghayo! Ndekuucha eriibhagha rino abhaku bhoose mbakooghu eriiraka reeche, 29 mbaakoru mo‑chambeehera cheebho, mbakoryokibhu ne Eryobha. Bhano ꞉bhaare bharaköra amachömu, mbakuhaabhu obhuhöru bho miishe ghyose, amare bhano ꞉bhaare bharaköra amabhe, mbaghoteneru ekiina.”

Obhwibhateri ighoro e Yesu

30 Yesu akëëndërëra ghosiikëra arabhugha, “Ghetaanyi‑ho egheghiro ghyokyose kino neghotora ghuköra kwo bhotoro bhoone. Nekobhatenera ekiina abhaato kurëngʼaana na kebhuno Taata akomboorera. Gho ghiri iyo ghotena ekiina koone n‑kwo bhuhëënë, gho kubha nteeghuköra amënda ghaane eni mwene, amare n‑amiigha gha Ryobha rino rentomiri neghuköra. 31 Aribha neghwighamba eni omwene, obhwighambi bhoone bhotaaghotora ghwisherereru kubha m‑bho hëënë. 32 Amare Taata naghungambëra amangʼana ghaane ghokoonyu, na neeni nyeeche kubha amaghambo ghoose ghano aghughamba ighoro yaane n‑gha hëënë. 33 Inyu ꞉moobhatomiri abhatamishi o‑Yohana Omubhatisaachi, nawe aghaghambera obhuhëënë ghokoonyu. 34 Eni nteeghwitëngʼëra nighamberu na abhaato, amare nekobhabhoorera ghoose ghayo kubha motooribhu. 35 Yohana Omubhatisaachi naare kinya oromore runo rohaaka na komoreka mo‑kengʼuuri, na niinyu muchömiiru no obhwero bhuyo kwo riibhagha isuuhu. 36 Amare eni neenyi no obhwibhateri bhokoro chwee ghokera bhuure bho Yohana. Gho ghayo, emeremo ghino Taata aheere ghuköra nighyo ghino gheghungambëra kubha Waryobha Taata niwe antomiri. 37 Nawe Taata uno antomiri, nahanyibhateereri ghokoonyu. Inyu motaamara kooghu koru eriiraka reeche, wiiki motaamara momorighi kebhuno anyi. 38 Amangʼana ghaache ghataaghwikara moose yaanyu, gho kubha motaaghonkumi eni uno Eryobha rentomiri ghokoonyu.

39 “Inyu moghwiköngʼi chwee ghusöma Amandëkö Amatööbhiyu gho kubha mokwihëëbha kubha moghotora kubhöna muyo obhuhöru bho miishe ghyose. Amandëkö ghayo ghayo nigho ghaghungambëra eni. 40 Amare inyu motaakwënda kuucha ghokoone, kubha mubhönë obhuhöru bho miishe ghyose. 41 Eni nteeghutabhara ghoghongibhu na abhaato. 42 Amare eni nebheeche inyu kebhuno moonyi, kubha motaresiighiri Eryobha mo‑metema gheenyu. 43 Eni niichiri kwo riina re Taata, na mwangiri ghonsongʼaana. Amare omooto owonde araacha kwo riina reeche omwene, iwe mokomokumi na komosongʼaana. 44 Mosiighiri ghoghongibhu na abhaghëndi bhaanyu, amare motaaghwiköngʼi ghutabhara asooko ino ekoru kwo Ryobha eryene chiri. Mbe, nibhu moghotora ghokumi?

45 “Motabha moriihëëbha kubha eni nekobhasëma o‑Taata, tiyaanyi! niwe akobhasëma, gho kubha niwe moghwitëngʼëra. 46 Aribha mahëënë mongamokumiri Musa, mbe, mongatoriri ghonkumi na neeni, gho kubha Musa ꞉naandëkiri amangʼana ghaane. 47 Amare aribha motaaghokumi amangʼana gha Musa, mbe, nibhu moghotora ghokumi amangʼana ghaane?”