Mataayo 15

Yesu ˆakaanga ameeghi gha Amabharisaayo

(Maariko 7:1–13)

Niho na abhamu bhakaacha koru bhaaghaye o‑Yesu, bhakamobhoori bhakabhugha, 2 “Neke gheghughëri abhaanabheegha bhaacho bhataaghutambana chaasughara che bhasookoro bhiito chino bhatotighiire? Gho kubha mbaakurë ebhiinyakurë ino bhatishaabhiri amabhökö ghaabho!”

3 Yesu akabhagharokeri akabhugha, “Ngwake na niinyu moghusari emeghiro ghe Ryobha gho ghutambana chaasughara cheenyu? 4 Gho kubha Eryobha ꞉ndeebhughiri, ‘Obhasooke iso na nyako.’ Wiiki ꞉ndeebhughiri, ‘Omooto wowoose uno aghotoka ishe hamu nyina, nakwëndëru ghwitu.’ 5 Amare inyu mokweghi morabhugha kubha omooto niishereriiru komobhoorera ishe hamu nyina kubha, ‘Ebheghiro bhino nengatoriri ghoghusakeri, neruusiri kwo Ryobha.’ 6 Okweghi konga kuyo, ngoghughëri omooto atighe komosooka ishe hamu nyina. Mbe, gho ghuköra hangʼu, ˆmoghatigha ghosooka angʼana e Ryobha, gho nchëra e ghutambana chaasughara che bhiisokoro. 7 Inyu n‑chaghughuuti moonyi! Eryobha ꞉ndeebhughiri obhuhëënë ighoro yaanyu gho kohetera omurööti Isaaya kubha,

8 ‘Abhaato bhano mbaghonsooka kwo mangʼana agheene hangʼu,

amare emetema gheebho n‑kurë gheenyi na neeni.

9 Ghusëngëra koobho n‑kwo bhoowa,

gho kubha mbaheeghi ameeghi gha maraghereri gha bhaato kinya n‑gha Ryobha.’”

Amangʼana ghano ghaghoghonchi omooto

(Maariko 7:14–23)

10 Mbe, Yesu akabherekera erikinda re bhaato, akarebhoorera akabhugha, “Mutëghëërërë bhoheene na kumënya amangʼana ghano nekobhabhoorera! 11 Egheghiro kino omooto akurë ghetaakomuköra abhe moghonchu. Amare, amangʼana ghano ghaakoru mo‑monu waache, nigho ghakomuköra omooto abhe moghonchu.”

12 Niho abhaanabheegha bhaaghaye o‑Yesu, bhakamobhoori bhakabhugha, “Weeche kubha Amabharisaayo eriibhagha bhooghwire amangʼana ghaare ꞉obhughiri, ꞉mbaakariire chwee?”

13 Yesu aghagharokeri akabhugha, “Omumërö wowoose uno Taata waane anyi Mwishaaro ataweemiri, nakowiiha. 14 Mobhatighe, gho kubha bhayo n‑abhakangati abhahuku bha bhahuku! Aribha omohuku arakangata omohuku mughëndi waache, bhombe mbakwihööngörëra mwiribha!”

15 Mbe, Bheetero akamobhoorera akabhugha, “Tukaachurere eghetuubhaani kiyo.”

16 Yesu akamugharokeri akabhugha, “Kana koru inyu mokeere kumënya? 17 Moteeche kubha ghyokyose kino gheghusöha mo‑monu, ngeeghuye mo‑nda e mooto, keramara kehoroka anche? 18 Amare ghyokyose kino gheekoru mo‑monu o mooto, ngekoru mo‑körö yaache, nikyo ghekomuköra omooto kubha moghonchu. 19 Mo‑körö e mooto, nimu muyo ghakorwera amiihëëbhö amabhe, no obhwiti, no obhutaari, no obhwibhi, no obhwibhateri bho bhuröngö na amatoki. 20 Ghoose ghayo, nigho ghakomuköra omooto kubha moghonchu. Amare omooto taaghotora kubha moghonchu gho kubha, nakuraaghëra ino atishaabhiri amabhökö.”

Obhokumi bho mukari o matöngö

(Maariko 7:24–30)

21 Yesu aghatanura hayo, aghaye eribhaara re meghya ghe Tiiro na Sitooni. 22 Niho omukari umu Omukananaayo o iyo, akaacha o‑Yesu, akabherekera kwo riiraka akabhugha, “Oo Omutëmi, , ondigheri changori! Omuukë waane nakunyaakibhu chwee no omusambu.”

23 Amare Yesu tagharokiiri ngʼana yoyoose. Antenero, abhaanabheegha bhaache bhakaacha na komusabha, bharabhugha, “Mobhoorere aghi, gho kubha omukari uno nakwëndërëra ghotukörëra eriireghe.”

24 Akabhagharokeri akabhugha, “Eryobha ndentomiri kobhatoori Abhiisiraeri bhano bhaanyi kinya changʼöndu chino chebhoriri.”

25 Omukari uyo akamwishukerera, akabhuna ebheru ambërë e Yesu, akamusabha akabhugha, “Oo Omutëmi, ˆneghaghusabha unsakeri!”

26 Akamugharokeri akabhugha, “Taanyi bhoheene kwimoki ekiinyakurë ke bhaana na ghochiha chaseese.”

27 Omukari uyo akabhugha, “Hangʼu keenyi Omutëmi, amare koru itu chaseese choose nchehaari amatigho ghano ghaghwire haase koru mo‑chameecha che bhatëmi bhaabho.”

28 Yesu akamugharokeri akabhugha, “Oo omukari uno, noonyi no obhokumi bhokoro chwee! Eryobha reghukörërë kinya bhuno okwënda.” Hayo hayo, omuukë waache akahöra.

Yesu ˆakabhahöri abhabhabharu bhaaru

29 Hano aruure hayo, Yesu aghaye kohetera rubhareka ro nyancha e . Akamara aghatiira a‑gheghoro na ghwikara iyo. 30 Abhaato bhaaru chwee bhaaghaye o‑Yesu, bhakamurëëtëra abhabhëëru, na abhahuku, na abharëma, na amamuumu na abhabhabharu abhande bhaaru. Abhaato bhaaru mbaare bhabhatooriri abhabhabharu bhaabho mo‑maghoro gha Yesu, nawe akabhahöri. 31 Abhaato bhayo bhakaroghoora chwee hano bharooche amamuumu ˆghaghasiikëra, abharëma ˆbhakahöra na abhabhëëru ˆbhaghaghënda na abhahuku ˆbhakarighi. Bhaghasëëma koreghongi Eryobha rino Abhiisiraeri bhaghusëngëra.

Yesu ˆakaraagheri abhaato ghokera ebheku bhine

(Maariko 8:1–10)

32 Niho Yesu akabhabherekera abhaanabheegha bhaache, akabhabhoorera akabhugha, “Nekobharigheri changori abhaato bhano gho kubha ntwikeere nabho chaasiko ishato, naho ibheere bhataanyi ne ebhiinyakurë. Nteekwënda nebharaghe bhaghëndë mo‑meghya gheebho bhaanyi inchëra, mbaghotora ghoteni mo‑nchëra.”

33 Abhaanabheegha bhaache bhakamobhoori bhakabhugha, “Hayi toghotora kubhöna emighaate ghe kobhiighoti abhaato bhano bhoose na hano mwiteregho toonyi?”

34 Yesu akabhabhoori akabhugha, “Moonyi ne emighaate erenge?”

Bhaghagharokeri bhakabhugha, “Ntoonyi ne emighaate mohungate ne ebhesu bhirëngʼaaneru bhesuuhu hangʼu.”

35 Niho Yesu akahatëka abhaato bhoose kubha bhiikare haase. 36 Akiimoki emighaate ghiire mohungate ne ebhesu bhiire, aghiitabheri Eryobha, aghasuura, akabha arabhaha abhaanabheegha bhaache, nabho bhakabhahööhi abhaato bhayo. 37 Abhaato bhayo bhoose bhakaraaghëra, bhaghiighota. Niho abhaanabheegha bhaghakoma ebhiinyakurë bhino bheere bhisaaghiri, bhaghiichori ebhetonga mohungate. 38 Mbe, abhaato bhano ꞉bhaaraghiire ebhiinyakurë bhiire mbaare‑mu abhasubhe ebheku bhine (4,000) koruusi abhakari na abhaana. 39 Mbe, akabharagha abhaato bhayo, Yesu aghasöha mo‑bhwato, aghaye eribhaara re moghya o Maghataani.