Mataayo 9

Yesu naanyi no obhotoro bho kwabhëra amasari

(Maariko 2:1–12; Ruuka 5:17–26)

Yesu aghasöha mo‑bhwato, aghatëënya anyancha e Ghariraaya, aghagharuka hano are ariikara mo‑moghya o Kabherenawumu.

2 Hayo abhaato abhande bhakaacha o‑Yesu no omooto uno akuure eribhaara, amisiri mo‑machëëra. Hano Yesu arooche obhokumi bhoobho, akamobhoorera omubhabharu uyo akabhugha, “Oo omoona waane, witoore omukörö! Amasari ghaacho ngaabhiiru.”

3 Niho abheeghi abhamu bhano ꞉bhaare hayo bhaghiisiikërëra mo‑metema gheebho bharabhugha, “Mööhi! Omooto uno nakwirëngʼaani ne Eryobha!” 4 Amare Yesu naare eche ghoose ghano ꞉bhaare bhariihëëbha, akabhabhoori akabhugha, “Ngwake kana moghwituuri amabhe mo‑metema gheenyu? 5 Mbe, n‑diihë rino reenyi ihoho? Komobhoorera kubha, ‘Nekwabhiire amasari ghaacho,’ ghasi komobhoorera kubha, ‘Imeerera, ughëndë’? 6 Nekwënda mumënyë bhoheene kubha eni , neenyi no obhotoro bho kwabhëra amasari mo‑se ino.” Niho Yesu akamobhoorera omooto uyo are akuure ribhaara, akabhugha, “Imeerera! Ghëgha machëëra yaacho, oghi awaacho.” 7 Niho omooto uyo akiimeerera, aghaye awaache. 8 Hano abhaato bhano ꞉bhaare hayo bhagharooche ghayo, bhakahagha na ghotiina chwee. Bhakareghongi Eryobha rino reheere abhaato obhotoro bhonga bhuyo.

Yesu niichiri kobhatoori abhaköri bha masari

(Maariko 2:13–17; Ruuka 5:27–32)

9 Hano Yesu amariri koru hayo, aghatëmëërana no omutöbhi umu o righööti ikeere mo‑kebhuru keeche ghe ghutöbhëri erighööti, eriina reeche Mataayo. Yesu akamobhoorera akabhugha, “Nuntambane.” Hayo hayo, Mataayo akiimeerera, akamutambana.

10 Mbe, Yesu aghaye kuraaghëra o‑Mataayo. Hano bhaare mo‑nyumba, bhaghasöha na abhaköri bha masari bhaaru, bhaghiikara na kuraaghëra haghirohamu na Yesu na abhaanabheegha bhaache.

11 Hano bharooche ghayo, bhakabhabhoorera abhaanabheegha bhaache bhayo bhakabhugha, “Kana Omweghi waanyu nakuraaghëra haghirohamu na abhatöbhi bha righööti na abhaköri bha masari?”

12 Hano Yesu oghwire ghayo akabhabhoorera akabhugha, “Abhaato abhahöru bhataakwënda omughabho, amare abhabhabharu nibho bhakwënda omughabho! 13 Mbe, moghi mweghe amangʼana gha Ryobha mo‑Mandëkö Amatööbhiyu ghano ghakobhugha kubha, ‘Nekwënda möbhëërëki abhaato abhande changori, ghokera konduuseri amaruusi.’ Mbe, eni ntiichiri kobhabherekera bhano bhakwirighi kubha m-bhahëënë ambërë e Ryobha! Amare niichiri kobhabherekera bhano bhaanyi na amasari.”

Yesu n‑kinya omokwiri

(Maariko 2:18–20; Ruuka 5:33–35)

14 Niho abhaanabheegha bha Yohana bhaaghaye o‑Yesu, bhakamobhoori bhakabhugha, “Itu na Amabharisaayo ntohiiyima ebhiinyakurë, neke gheghughëri abhaanabheegha bhaacho ibho bhataakwiyima ebhiinyakurë?”

15 Yesu akabhagharokeri akabhugha, “Abhaato bhano bharaghiinu mwikwirëra, mbaghotora bhu kubha na amacheeche eriibhagha bhaanyi haghirohamu na uno aghokwira? Amare eriibhagha ndekohika rino omokwiri akoruusibhu ghate yaabho. Mbe, kwo riibhagha riyo, mbakwiyima ebhiinyakurë.

Amangʼana amahë gha Yesu

(Maariko 2:21–22; Ruuka 5:36–39)

16 “Wiiki, ghusangerani ameeghi ghaane amahë na chaasughara cheenyu ngotuubhiine na kwimoki egheteneka ke ngibho ahë aghetumerani mo‑ngibho ankungu, gho kubha egheteneka ke ngibho ahë ngeghutandura angibho iyo, na ahaghiro hayo ꞉haare hatandokiri hakwëngëra ghutanduka. 17 Wiiki, taanyi‑ho omooto uno aghotoora adivaayi ahë mo‑maghöchi gha mashëërö amakungu. Mbe, gho ghuköra hangʼu, amaghöchi ngakubhaaruka, adivaayi neghwitëka na amaghöchi ghayo ngaghusarëka. Amare, abhaato mbahaatoora adivaayi ahë mo‑maghöchi amahë. Mbe, bhyombe amaghöchi amahë na ahë mbeekubha bhoheene!”

Yesu ˆakamuhöri omukari na komoryoki omuukë

(Maariko 5:21–43; Ruuka 8:40–56)

18 Hano Yesu are akeere arasiikëra na abhaato bhayo, hayo hayo, akaacha omukangati umu, akabhuna ebheru ambërë yaache, akamobhoorera akabhugha, “Omuukë waane ˆaghaku ibheerebheere. Amare nuuche otoore okubhökö ighoro yaache, nawe obhuhöru mbokomugharukera.”

19 Niho Yesu aghatanura haghirohamu na abhaanabheegha bhaache, bhakamutambana omukangati uyo.

20 Mööhi, kwo riibhagha riyo riyo omukari umu uno are no obhubhabharu bho koru amasaahë kwo meeka ikomi ne ebhere, akaacha anyuma e Yesu, aghaturi omuköbha o ngibho yaache. 21 ꞉Naaköriri hangʼu gho kubha ꞉niihëëbhiri mo‑motema waache kubha, “Aribha neraturi omuköbha o ngibho yaache, nekuhöra.” 22 Hano ayeturiri, hayo hayo Yesu aghiishoorori. Mbe, hano amorooche omukari uyo, akamobhoorera akabhugha, “Oo omuukë waane, witoore omukörö! Obhokumi bhoocho ˆbhoghakuhöri!” Hayo hayo, omukari uyo akahöra.

23 Hano Yesu ahikiri mo‑nyumba e mukangati uyo, akabhöna abhaato bhaaru bhiikomiine, ino bhararera, na abhamu mbaare bharatëma ebherereesi. 24 Yesu akabhabhoorera akabhugha, “Moru hano! Omuukë uno taamara aku, n‑komisi amisiri okwene!” Hano abhaato bhayo bhooghwire hangʼu, bhakamusëka Yesu. 25 Akamara akabhahoroki anche, aghasöha mo‑nyumba, akamughööta okubhökö omuukë uyo, akiimeerera. 26 Amangʼana ghayo ꞉ngaasanchiri mo‑se yiire yoose.

Yesu ˆakabhahöri abhahuku bhabhere

27 Hano Yesu amariri ghutanura hayo, abhahuku bhabhere bhakamutambana, bhaghatiiri amaraka ghaabho bharabhugha, “Oo , otorigheri changori!”

28 Mbe, Yesu aghasöha mo‑nyumba, abhahuku bhayo bhakamutambana‑mu. Niho akabhabhoori akabhugha, “Moghokumi kubha neghotora kobhahöri?”

Bhaghagharokeri bhakabhugha, “Hee, Omutëmi! Ntoghokumi.”

29 Niho Yesu akabhaturi amiisho ghaabho, akabhabhoorera akabhugha, “Ghahikeerane ghokoonyu kinya bhuure obhokumi bhoonyu bhoonyi.” 30 Hayo hayo, amiisho ghaabho ghakarighi. Yesu akabhashaangʼi gho changuru akabhugha, “Motabhoorera omooto wowoose angʼana ino!” 31 Koru hangʼu bhaaghaye, bhakaraghani amangʼana ghaache mo‑se yiire yoose.

Yesu ˆakamuhöri omokiro

32 Hano abhahuku bhayo bhatanwire hayo, mööhi abhaato abhande bhakamurëëtëra Yesu omooto uno are aghööturu no omusambu uno ore omuköriri kubha erimuumu. 33 Yesu akawuhëëbha omusambu uyo, hayo hayo, omooto uyo aghasëëma ghosiikëra. Abhaato bhano ꞉bhaare hayo bhakaroghoora chwee, bhakabhugha, “Mo‑se yoose e Isiraeri, ghataamara gharwera naabha amangʼana kinya ghano!”

34 Amare Amabharisaayo bhakabhugha, “Mööhi, nakuhëëbha emisambu kwo bhotoro bho mokoro o misambu!”

Yesu ˆakarigheri changori abhaato

35 Mbe, Yesu naare araheta mo‑meghya ghyose na mo‑bhyaro. Hohoose hano ahetiri, ꞉naasöhiri mo‑ ghaabho, naare areeghi abhaato, na kuraghani Angʼana Anchömu e bhutëmi bho Mwishaaro na kuhöri amabhabharu ghoose gha manga maaru. 36 Hano arooche erikinda ikoro re bhaato, akabhaghwera ebheghongi, gho kubha mbaare bharanyaaka, bhataare no o kobhatoori. Abhaato bhayo, mbaare kinya changʼöndu chino chetaanyi no omoriishi. 37 Mbe, akabhabhoorera abhaanabheegha bhaache akabhugha, “Omunöghö m‑mwaru chwee, amare abhaghësi m‑bhasuuhu. 38 Ibheere, musabhe omwene omoghondo atome abhaghësi abhande mo‑moghondo waache.”