Surana Suro
Yohane
au katalu
1
1 Sura ide hangko iriko, Tosaenda to Sarani, kupakatu irio Gayu, rangangku au tou-tou mpuuko kupokaahi. 2 Halalungku! Mekakaena bona hinangka au nupobago mewali maroa hai Kuharunga wori ina maroa-roako himbela hai pepoinalaimu au maroho.Yohane motoia Gayu
3 Matana mpuu lalungku, lawi arahe bahangkia halalunta hampepepoinalai au hawe inde moanti bambari kana irio, rauli: mepoinalai liliuko i paturo au tou, hai babehiamu moula wori paturo iti. 4 Rumihi mpuu kamatanangku mohadi bambari au manguli anangku moula liliu paturo au tou.
5 Halalungku! Matanana lawi motulungi liliuko halalunta hampepepoinalai au mehupe i boeamu. Mogalori au bara manihe nuisa, nutulungi worihe. 6 Arahe au mai inde mopahawe kana i ahimu i ope-ope halalunta hampepepoinalai. Mewali, kuharunga bona nupopelingka maroahe halalunta iti bona peisahe mopaliliu pobagonda, lawi itimi au napokatana Pue. 7 Lawi halalunta iti, mampopolumaohe bagona Pue Yesu. Hai barahe molambi apa-apa hangko i tauna au bara mepoinalai i Pue. 8 Mewali, hintoto mpuuhe tatulungi, lawi ane tababehi nodo, lempona mobago sambelake i lalu pobagonda moanti bambari au tou.
Yohane mosalai Diotrepes hai motoia Demetrius
9 Ara hambua surangku au kupakatu i hambua jumaa, paidaana Diotrepes. Agaiana Diotrepes bara mampeulai lolitangku, lawi napeinao ia pea au moatoro tauna. 10 Mewali, ane hawena irio, ina kutuntuako babehiana au kadake. Nasalai liliungkai agaiana pesalaina iti bara tou. Hai bara ido pea babehiana. Ane halalunta au mobambari Ngkora Marasa mehupehe i boeami, barahe nadoko, hai mokonto worihe tauna bona ineehe modoko tauna iti. Hai hema pea au modokohe topoanti Ngkora, napopelohohe hangko i jumaa iti.
11 Halalungku! Ineeko mampeulai babehia au kadake. Nupeulaimi babehia au maroa. Tauna au mobabehi roa, tongawa kanapoanandami Pue Ala. Tauna au mobabehi dake, tongawa kadanda mani moisa Pue Ala.
12 Demetrius, ratoia ope-ope tauna. Ia hintoto mpuu ratoia, lawi babehiana moula paturo au tou. Kitoia wori, hai nuisa katouna lolitangki.
Lolita kahopoana
13 Katouana ngkaia mani au kupeinao kupahaweakau, agaiana bara kuunde ane ope-ope kupahawe melempo i sura ide. 14 Lawi kuharunga barapi mahae ina mohidupa mbulike bona ara katepakanta mololita sambela.
15 Kuharunga Pue Ala moweikau roa ngkatuwo. Ope-ope himadamu inde mopakatu worihe tabeanda irio. Nupahawe wori tabeangku i hadua-hadua rangangku au arahe inditi.
Hangko iriko
YOHANE