22
1 Nauli Paulu, “Uma-uma, halalu-halalu! Nipehadingi wongkoia, lawi ina kuuliangaakau notongku.”2 Karahadina tauna bosa Paulu mololita i lalu basanda to Yahudi, mandii mpuumohe. Napaliliumi Paulu lolitana, nauli, 3 “Iko to Yahudina. Boea karapoanakangku, Tarsus i tampo Kilikia, agaiana hangko koi-koi peamona maidamona inde, i Yerusale. Mosikolana inde, napaguru maroana hadua guru au rabila ntepuu, hangana Gamaliel. Napaturo ntepuuna ope-ope atura au naweihe Musa i toiorunta hangkoia hai madotana mampeulai ope-ope aturana Pue Ala, nodo ikamu. 4 Hangkoia mampopeahi-ahina tauna au mampeulai Paturona Yesu. Arahe au kupapate. Ara wori bosa tauna au kuhaka hai kutarunggu, maroa tobalilo maroa towawine. 5 Tadulako Mpenomba Mahile hai ope-ope tadulako agama peisa mopakanoto katouna ide lolitangku. Barana modongko, lawi hangkoia ihirami au moweina sura kuasa au mopaliuna lao i halalunta to Yahudi i wanua Damsik. Tunggaiaku lao i Damsik bona mohakana to Sarani au ara inditi, hai kuantihe i Yerusale bona rahuku.”
Paulu mopahawe noumba pepongkana meula i Yesu
6 “Tanga pualo, i lalu polumaongku iti, hungkumongkai i wanua Damsik. Unga pea ara au mewangka hangko i langi au motolelikina. 7 Madungkana, hai mohadina hambua wotu au manguli, ‘Saulu, Saulu, moapari hai nupopeahi-ahiNa?’
8 Kupekune: ‘HemaKo?’
Nahanaina, nauli, ‘Ikomi Yesu to Nasare au nupopeahi-ahi.’ 9 Rangangku moita worihe au mewangka iti, agaiana bara raisa apa au nauliangaana wotu iti.
10 Roo indo, kuuli, ‘Pue, apa au hangangaa kubabehi?’
Nahanaina Pue, ‘Mearomoko hai pulomoko lao i wanua Damsik. Indolou ina rapahaweako ope-ope au natuduako Pue Ala bona nubabehi.’ 11 Anti pewangka iti inona, makaindimi petotokingku. Ido hai ranini pearaina rangangku hawe i wanua Damsik.
12 I Damsik, ara hadua tobalilo au rahanga Ananias. Tauna iti, manoto, hai maroho peulana i Aturana Musa. Ia rabila ope-ope to Yahudi au maida i Damsik. 13 Maimi Ananias meangka i holangku, nauli, ‘Halalungku Saulu, meita hulemoko!’ I tempo iti peawomi, meitamona, hai kuitami Ananias. 14 Roo indo, nauliangaa mbulina, ‘Pue Ala au rapenombai toiorunta hangkoia mopileimoko bona nuisa apa peundeaNa. Napileiko bona moitako Yesu, Hawina Pue Ala au manoto, hai bona nuhadi lolitaNa. 15 Oiomi au ina mewali sabiNa mopahawe i ope-ope tauna apa au nuita hai au nuhadimi. 16 Mewali, apa mani au nupegia? Meangkamoko hai laomoko rariu. Mekakaemoko i Pue Yesu bona Naampungi dosamu.’ ”
Paulu mopaliliu lolitana
17 “Mewali, hangko inditi, mesulemona lao i Yerusale, hai tangangku mekakae i Souna Pue Ala, kuita hambua pampetudungia. 18 Kuita Pue Yesu mololita iriko, Nauli, ‘Holigamoko padu hangko i Yerusale, lawi bara ina rapoinalai to Yerusale posabimu kana Iriko.’
19 Kuhanai, ‘Pue, hangangaa radokona. Lawi tauna inde moisa mpuuhe babehiangku hangkoia. Raisa noumba kalaongku i sou penombaa mohaka hai mopapahaihe tauna au mepoinalai Irio. 20 Nodo wori, i tempona sabiMu Setepanu rapapate, ara worina indo hai kupokana karapapatena; ikomi au mokampai hampinda tauna au mopapate.’
21 Roo indo, nauli mbuli Pue, ‘Hangangaa meangkako, lawi Kutuduko lao i tampo au karao, i tauna au barahe to Yahudi.’ ”
22 Tauna bosa au tanganda mampehadingi Paulu mololita unga peahe monganga-nganga, lawi mohadihe lolitana Paulu, au manguli kaina laona i tauna au bara to Yahudi. Mongangahe masisimbuku, rauli, “Nipapate peami! Barapi hintoto tuwo!” 23 I pepakoinda iti, motendemohe kumbanda hai mohawukahe awu anti kamasodonda. 24 Ido hai kapala tadulako surodado iti motudumi surodadona moanti Paulu mesua i sounda surodado bona rapapahai hai raparesa bona raisa pongkana apa au rakahihia to Yahudi.
25 Hawemohe inditi, ratakami Paulu bona rapapahai. Ido hai mololitami Paulu i hadua tadulako surodado au ara i holana, nauli, “Peisa pae hadua to Roma rapapahai ane bara mani raparesa hai rabotusi kara-karana?”
26 Kanahadina tadulako iti lolitana, laomi i toiwongkona, nauli, “Tua, moapari hai nutudungkai mopapahai tauna iti? Tauna iti to Roma!”
27 Roo indo, kapala tadulako surodado iti lao i Paulu, napekune, “Nuuliangaana, to Roma mpuuko pae?”
Nahanai Paulu, “Tou.”
28 Nauli kapala tadulako surodado iti, “Masuli kakubaiarina i topoparenta bona mewalina to Roma.”
Nahanai Paulu, “Agaiana iko, bara paraluu kubaiari lawi rapoanakana i Roma.”
29 Roo nodo, mousulimohe tadulako surodado au ina moparesa Paulu hai langa worimi kapala tadulako surodado iti. Lawi iami au motudu tauna mohilu Paulu, agaiana i tempo iti bara naisa katoRomana.
Paulu i lindona tadulako mahile agama to Yahudi
30 Kapala tadulako surodado iti mampeinao moisa ba apa mpuu salana Paulu pane rasalai to Yahudi. Ido hai kahalona, nakakiomohe ope-ope kapala-kapala tadulako mpenomba hai tadulako agama Yahudi au ntanina bona teruhuhe. Roo indo, rakabahami petakana Paulu hai raanti lao rapombelindoa.