<<    <     Yohane     4     >    >> 
Yesu molololita hai hadua towawine to Samaria
4
1 Rahadimi toParisi bambari au manguli kabosa-bosaami tauna au lao mampoperiu i Yesu, alana meliu kabosanda tauna au meula i Yesu pane tauna au meula i Yohane. 2 (Katouana, bara Yesu au meriu, topeguruNari au meriu.) 3 Kanaisana Yesu apa au rahadi toParisi iti, padumi hangko i tampo Yudea mesule lao i tampo Galilea. 4 I lalu polumaoNa iti, Ia hangangaa moliu i tamponda to Samaria. 5-6 I tanga pualo, hawemi i hambua wanua au ara i Samaria au rahanga Sikar, bara karao hangko i tampo au nahumba Yusupu hangkoia hangko i Yako umana. I raoa boea iti, ara hambua tibubu au rahanga tibubuna Yako. Mohudami Yesu i wiwi tibubu iti, lawi mawowemi molumao. 7-8 TopeguruNa liliuhe lao i boea meholo paandenda.
Bara mahae, hawemi hadua towawine to Samaria mai mantambu. Yesu mololita i towawine iti, nauli, “Ina, nuwei wongkoia owai Kuenu.”
9 Tingkara mpuu towawine iti, lawi biasana to Yahudi bara raunde mampogaloa to Samaria. Ido hai nauli, “Oio to Yahudi, iko to Samaria. Moapari pane merapiKo owai iriko?”
10 Nauli Yesu, “Ane kenuisa kamahilena pewatina Pue Ala hai hemaNa au merapi owai ide, kemerapi woriko owai Iriko, hai Kuweiko owai au mepatuwo.”
11 Nauli towawine iti, “Hangko iumba mai owai au Nuuli iti? PopetabuikiMu bara ara, hai tibubu ide malobu. 12 Tibubu ide sosorangki hangko i Yako, toiorungki. Ia moenu owai hangko inde, nodo worihe anana hai binatana. Ba Nuuli meliu kamahilena tuwoMu hangko i Yako pane peisaKo moweina owai au meliu kamaroana hangko i owai tibubu ide?”
13 Nauli Yesu, “Ope-ope tauna au moenu owai hangko i tibubu ide, mangkadou hulehe.14 Agaiana hema au moenu owai au Kuwei, barapi mangkadou hawe i hae-haena. Lawi owai au Kuwei iti, ina moili liliu i laluna; lempona, ina molambi katuwo maroa au bara mokahopoa.”
15 Nauli towawine iti, “Ane nodo tua, Nuweimona owai iti bona barapona mangkadou, hai barapona paraluu mai mantambu alo-alona inde.”
16 Nauli Yesu, “Laomoko hampai mokakio tobalilomu, hai mesuleko mai.”
17 Nauli towawine iti, “Bara ara tobalilongku.”
Nauli Yesu, “Tou lolitamu. Bara ara tobalilomu, 18 lawi limami belamu motambi, hai tobalilo au nuporanga ide-ide, barato tobalilomu. Mewali, tou mpuu lolitamu inona.”
19 Nauli towawine iti, “Ide-ide kuisami, Oio haduaKo nabi! 20 Ikami to Samaria menomba i bulu idea, i bulu penombaanda toiorungki. Agaiana pangulimi to Yahudi, i Yerusale pea penombaa au tou.”
21 Nauli Yesu, “Ina, nupoinalai lolitaNgku ide: ina hawe tempona, bara i Yerusale tauna menomba i Pue Ala, hai bara wori i bulu ide. 22 Ikamu to Samaria, barato niisa kahemana au nipenombai. Ikami to Yahudi, kiisa kahemana au kipenombai, lawi ara dandina Pue Ala au manguli katehorema ina hawe hangko i to Yahudi. 23 Agaiana ina hawe tempona, hai katouana hawemi tempo iti, i lalu peninina Inao Malelaha ina moisa mpuuhe hema Pue Ala i katou-touana, hai ina menombahe Iria, moula rara mpenomba au naunde Pue Ala Umanta. 24 Pue Ala iami Inao. Ido hai tauna au menomba i Pue Ala, hangangaa menombahe i lalu peninina Inao Malelaha moula rara au tou.”
25 Nauli towawine iti, “Au kuisa, ina hawe Datu Topehompo, au rauli wori Kerisitu. Ane hawe, Iami au ina mampopaisa irikami hinangkana au ara.”
26 Nauli Yesu, “Ikomi Tauna iti au tangana mololita irio.”
27 Tangana mani Yesu mololita hai towawine iti, hawemohe topeguruNa hangko boea. Tingkarahe moita Yesu mololita hai hadua towawine. Agaiana bara ara hadua au bai mekune i towawine iti ba apa paraluuna. Bara worihe bai mekune i Yesu ba apa tunggaiaNa mololita i towawine iti.
28 Roo indo, towawine iti mopalehimi gumbana, pane laomi i boea mouliangaahe tauna inditi, 29 “Maikau, laoke mampeita hadua tauna au mampololita ope-ope babehiangku. Ba Ia mpuumi Datu Topehompo?” 30 Ido hai lao mpuumohe i raoa boea bona mampohidupaahe Yesu.
31 Tangana towawine iti lao i boea, mololitamohe topeguruna Yesu, rauli, “Guru, maandemoke.”
32 Agaiana nauli Yesu, “Iriko ara paande au bara niisa.”
33 Mombekune-kunemohe topeguruNa, rauli, “Hemari au mai moantia paande?”
34 Ido hai nauliangaahe Yesu, “PaandeKu, iami mampeulaiNa peundeana Pue Ala au motuduNa, hai moparooNa bago au NaweiNa. 35 Ikamu biasa manguli node: iba mani wulana, hangko meparerike. Agaiana Kuuliangaakau: nipeitahe ohou bonde. Mabadami parena, sukanami rapepare. 36 Tauna au mopahawehe Ngkorana Pue Ala peisa rapandiri nodo tauna au mantuda hai au mepare. Ide-ide masilolongami saronda topepare iti, hai mepongkamohe mogulu wuana. Anti pobagonda, bosa tauna molambi katuwo maroa au bara mokahopoa. Hai kahopoana ina matana-tanahe hihimbela hai tauna au mantuda. 37 Mewali, tou mpuu lolita au manguli: ‘Hadua au mantuda, tohaduana au mampepare.’ 38 Kutudukau lao mepare i bonde au bara ikamu au motudai. Tauna ntanina au mantuda, ikamu au mampepare wua pobagonda.”
39 Bosahe to Samaria i boea iti mepoinalai i Yesu, lawi mohadihe lolitana towawine iti inona au manguli, “Napololitami hinangka babehiangku.” 40 Mewali, laomohe mampohidupaa Yesu, hai raperapi ntepuu bona Yesu mehupe i boeanda. Ido hai Yesu maidami inditi rombengia.
41 Hangko inditi, kabosa-bosaa ampu boea au mepoinalai i Yesu, lawi mohadi mpuumohe lolitaNa, 42 hai mololitahe i towawine iti, “Ide-ide kipoinalai mpuumi, bara pea hangko i lolitamu, agaiana lawi kihadimi lolitaNa, hai kiisa kaIana mpuumi Datu au mohorema manusia hangko i huku dosanda.”
Yesu mopakaoha anana hadua topobago i sou kadatua
43 Liumi rongalo i Samaria, Yesu mopaliliu polumaoNa lao i tampo Galilea. 44 Naulimi Yesu hangkoia, “Hadua nabi bara rabila i tampona haduduana.” 45 Agaiana kahawena Yesu i Galilea, Ia radoko ampu boea hangko i lalunda mpuu, lawi hangkoia arahe i Yerusale i tempona Yesu moula Alo Posusa Pasa, hai moita matahe ope-ope tanda kuasa au Nababehi i tempo iti.
46 I tampo Galilea iti, lao mbulimi Yesu i boea Kana, i boea pobalikiaNa owai mewali anggoro. Inditi ara hadua tauna au mobago i sou kadatua i boea Kapernaum. Anana au tobalilo tangana mahai rumihi. 47 Kanahadina tauna iti Yesu mesulemi mai i Galilea hangko i Yudea, laomi tauna iti i boea Kana mampohidupaa Yesu, nauliangaa, “Tua, ane peisa, laoke i Kapernaum, bona Nupakaohaa wongkoia anangku, lawi ina matemi.”
48 Nauli Yesu i tauna iti, “Ikamu au maida i tampo ide, ane kebarakau moita tanda kuasa, barakau ina mepoinalai!”
49 Nauli tauna iti, “Tua, holigamoke lao, hangko bara mate anangku!”
50 Nahanai Yesu, “Mesulemoko, anamu maohami.” Tauna iti mampoinalai lolitana Yesu, ido hai mesulemi.
51 Tangana mani i rara, bahangkia hawina mai mampohidupaa, rauliangaa, “Anamu maohami!” 52 Napekunehe, “Tinti hangkia maoha?”
Rauli, “Imaindi, tinti isa pualo, mengkaroomi kanapawembena.” 53 Nakatuinaomi tauna iti, tempona Yesu manguli, “Anamu maohami,” tempo iti womi anana maoha. Hangko indo, tauna iti mepoinalaimi i Yesu hihimbela hai ope-ope hantambiana.
54 Itimi tanda kuasa karompakana au nababehi Yesu i Galilea i kahaweNa hangko i Yudea.