Yesu mobaliki owai mewali anggoro
2
1 Liu rongalo hangko inditi, ara posusa petauna i boea Kana i tampo Galilea. Inana Yesu ara i posusa iti. 2 Yesu hai topeguruNa rakakio worihe lao i posusa iti. 3 Tanganda mosusa, nakaopeihe anggoro. Mololitami inana Yesu, i Yesu, nauli, “Opemi anggoronda.”4 Nauli Yesu, “Ina, apari tunggaiamu mouliangaaNa nodo? Bara mani hawe tempona Kupopaisaahe kahemaNgku.”
5 Hangko inditi, mololita inana Yesu i topobago i posusa iti, nauli, “Apa pea au natuduakau Yesu, nibabehi!”
6 I sou iti, ara ini mbuana gumba au mahile au rababehi hangko i watu. Gumba iti moihi owai pobahoia taie moula adanda to Yahudi. Kangkaiana ihi haogu gumba iti, ba arato pae hangatu lima pulona kati.
9 Topokadipura susa iti mampemina owai au raantia. Barapi matawaa nodo owai biasa, tebalikimi mewali anggoro. Agaiana bara naisa kahangko iumbana mai anggoro iti, au moisa batenda pea topobago. Karoona mampemina anggoro iti, mokakiomi toratauna tobalilo, 10 nauliangaa, “Matama mpuu ide anggoro. Katouana moula adanta, anggoro au maroa hangangaa rapoperora ioru. Ane nahadimohe maenu, hangko rakandori au bara gaga maroa. Agaiana oio, nupaibokori anggoro au matama, hai ide-ide hangko nupopesuwuri.”
11 Yesu mobabehi tanda kuasa au nguru-nguruna iti i boea Kana i tampo Galilea. Hai tanda kuasa iti, Ia mopatongawa peawaNa. Roo indo, rapoinalaimi topeguruNa.
12 Roo posusa iti, laomi Yesu i boea Kapernaum hihimbela hai inaNa, halaluNa hai topeguruNahe. Maidahe inditi bahangkia wengina.
Yesu mowura topobalu-balu hangko i Souna Pue Ala
13 Ina hawemi tempona alo mahile agama Yahudi au rauli Alo Posusa Pasa, laomi Yesu i Yerusale. 14 I tabangaa Souna Pue Ala, Naitahe tauna au mampobalu japi, dimba hai tadasi manggebodo. Ara worihe topointolohi doi au mohuda inditi i mejanda. 15 Kanaitana Yesu ope-ope iti, Ia mobabehimi pekandangi hangko i koloro hai mowurahe ope-ope topobalu-balu hihimbela japinda hai dimbanda hangko i tabangaa Souna Pue Ala. Mejanda topointolohi doi Nadungka-dungkami alana mahawu doinda. 16 Roo indo, mouliangaahe topobalu-balu tadasi manggebodo, “Nianti ope-ope iti lao i raoa! Souna UmaNgku inee nipopewali sou pobalu-balua!”
17 TopeguruNa mokatuinao apa au teuki i lalu Sura Malelaha au manguli node:
“Rumihi mpuu pokabilaiNgku SouMu Pue,
itimi au mohuweki laluNgku.”*
18 Hangko inditi, tadulakonda to Yahudi mouliangaa Yesu, “Hema au moweiKo kuasa mobabehi iti? Ane ara mpuu kuasaMu, Nupopaitaangkai hambua tanda kuasa!”
19 Nauli Yesu, “Nigero Souna Pue Ala ide, hai ina niita mpuu i lalu talu alona Kuaro hule.”
20 Tingkaramohe tadulakonda to Yahudi, rauli, “Noumba? Souna Pue Ala ide ibami pulona hai ini parena raaro. Agaiana Nuuli ina Nuaro hule i lalu talu pea alona!”
21 Katouana i tempona Yesu mokabelai Souna Pue Ala, wataNa haduduaNa au natunggai. 22 I katuwona hule Yesu, topeguruNa mokatuinao lolitaNa iti. Roo indo, rapoinalaimi apa au teuki i lalu Sura Malelaha hai apa au nauli Yesu.
Yesu moisa lalunda ope-ope tauna