Yesu rapoanaka i Beteleme
2
1 I tempo iti, mohawami Kaisar Agustus bona ope-ope tauna i humalele kadatua Roma rauki hanganda bona raisa kabosanda. 2 Poimba tauna au nguru-nguruna ide rapopolumao i tempona Kirenius mewali gubernur i tampo Siria. 3 Ope-ope tauna laomohe mampopeuki hanganda hadua-hadua i boeana tosaenda.4-5 Nodo wori Yusupu meangkami hangko i boea Nasare hihimbela hai Maria hampomanuna au tangana mantimi. Meangkahe hangko i tampo Galilea, mempanai lao i tampo Yudea monontohi boea Beteleme, boea karapoanakaana Datu Daudi hangkoia. Inditi, Yusupu mampopeuki hangana, lawi ia pemuleana Daudi. 6 Kahawenda i Beteleme, hawemi tempona Maria moana.
Toporewu hai malaeka
8-9 Kaindi iti, i raoa boea Beteleme, ara bahangkia toporewu au mokampai dimbanda i pada. Unga pea hawe hadua malaekana Pue Ala i olonda, hai peawana Pue Ala mowangkahihe panehe langa. 10 Nauliangaahe malaeka iti, “Ineekau langa, lawi maina moanti bambari maroa irikamu, bambari au rapokatana ope-ope tauna. 11 Kaindi ide i boeana Datu Daudi, rapoanakami hadua Datu au moanti katuwo maroa irikamu, iami Kerisitu, Amputa. 12 Idemi tanda bona niisa katouna lolitangku: ina nihumba hadua analei au ralempingi, radampa i lalu dula dimba.”
13 Toporewu iti, unga peahe moita bosa malaeka hihimbela hai malaeka au nguru-nguruna inona. Malaeka iti, motoiahe Pue Ala, rauli,
14 “Tetoiami Pue Ala au i suruga!
Tauna i dunia au napokatana Pue Ala
ina molambihe roa ngkatuwo.”
15 I pesulenda malaeka iti lao i suruga, mogombomohe toporewu iti, rauli, “Laomoke i Beteleme mampeita apa au mewali au napahaweake Pue inona.” 16 Laomohe mampohidupaa Maria hai Yusupu, hai analei au radampa i lalu dula dimba. 17 Karaitana analei iti, mopahawemohe apa au nauliangaahe malaeka kana Iria. 18 Tingkarahe ope-ope tauna au mohadi lolitanda toporewu. 19 Agaiana Maria mopailalu pea ope-ope au mewali iti.
20 Roo indo, toporewu iti mesulemohe, hai i tanga polumaonda motoiahe hai mampomahilehe Pue Ala, lawi ope-ope au rahadi hai au raita, tou-tou mewali nodo au nauliangaahe malaeka.
Yesu rahanga
21 Kahandana ualu alona tinuwuNa, anangkoi iti ratile moula adanda to Yahudi. Hai i tempo iti, Yesu rahanga moula lolitana malaeka hangko damani Yesu nakantimia inaNa.
22 Moula ada agamanda au teuki i Aturana Musa, ara wori au hangangaa rababehi i tempona moana. I tempo au tepakanoto, ananda iti raanti lao i Souna Pue Ala i Yerusale bona rahuhu i Pue Ala, 23 lawi teukimi i lalu Sura Aturana Pue node, “Ope-ope anangkoi tobalilo au towutu hangangaa rahuhu i Pue Ala bona mewalihe kiraNa.” 24 Ido hai moanti worihe popenombanda i Pue Ala nodo au tepakanoto i lalu Sura Aturana Musa: hamboko tadasi tokuku ba rombaa ana tadasi manggebodo.
Simeo hai Hana
25-26 I Yerusale, ara hadua tauna au rahanga Simeo. Simeo iti, iami tauna manoto au mengkoru i Pue Ala, hai ia mampoinalai kaina hawena tempona Pue Ala mokabaha to Isaraeli. Hai ia naporangai Inao Malelaha au mouliangaa kadana mani mate ane bara mani moita Datu Topehompo au nadandi Pue Ala. 27 Simeo iti naanti Inao Malelaha mesua i Souna Pue Ala i temponda Yusupu hai Maria moanti Yesu rahuhu i Pue Ala moula Aturana Musa. 28 Ia moala anangkoi iti, nahulengku hai motoia Pue Ala, nauli,
29 “O Pue, kehapiri matemona ide-ide, barapona menoso.
Matana lalungku, lawi tepabukeimi dandiMu.
30 Kuita matami Datu Topehorema au hangko Irio Pue,
31 au Nupasilolongami i ope-ope tauna.
au ina mopakanoto lalunda tauna au barahe to Isaraeli bona raisaKo, Pue.
Hai Ia ide ina moanti pebila
i anaMu, ikami to Isaraeli.”
33 Tingkaramohe Maria hai Yusupu mohadi lolitana Simeo kana i ananda. 34 Roo indo, Simeo mowatihe hai mouliangaa Maria, “Anti kahawenami Anamu ide, bosa to Isaraeli ina molambi pehuku, agaiana bosa wori tauna ina Nahorema bona molambihe katuwo maroa. Iami au Napilei hai au Natudu mai Pue Ala, agaiana Ia ina rasapuaka tauna bosa, 35 alana apa au ara i lalunda tauna iti ina tewungkehi. Oio Maria, ina narumpako kapari. Ina rumihi kawiorana lalumu, nodoko nabelai piho.”
36-37 Kahawenda Yusupu hai Maria i Souna Pue Ala, ara wori inditi hadua nabi towawine. Hangana Hana, anana Fanuel, pemuleana Aser. Hana iti, ualumi pulona hai iba parena tinuwuna. Hangkoia motambi, agaiana pitu pea parena hangko indo, matemi tobalilona. Mepongka i tempo iti, ia bemba hai maida liliu i Souna Pue Ala. Alo-alona hai wengi-wengina Hana menomba i Pue Ala, mekakae hai mopuasa. 38 Kamoitana Yesu i Souna Pue Ala, ia manguli ngkaia kamaroana i Pue Ala, hai mampololita kana i Anangkoi iti i ope-ope tauna au mampegia karakabahanda ampu wanua Yerusale hangko i iwalinda.
Mesule i Nasare
39 Karoonda Yusupu hai Maria mobabehi ope-ope atura moula Sura Aturana Musa, mesulemohe lao i boea Nasare i tampo Galilea. 40 Ananda iti, kamahile-hilea hai kamaroho-rohoa. Manoto mpuu laluNa, hai nawati Pue Ala.
Yesu i Souna Pue Ala
41 Pare-parena, inana hai umana Yesu laohe i Yerusale moula alo mahilenda to Yahudi au rahanga Alo Posusa Pasa. 42 Handami hampulo hai rompare tinuwuna Yesu, laomohe i posusa iti nodo biasana. 43 Liumi alo mahile iti, mesulemohe lao i boeanda. Agaiana Yesu bara meula irihira. Ia ara mani i Yerusale, agaiana bara raisa tosaeNa. 44 I pesulenda, rapehangu pea arato hihimbela hai ranganda hampopolumaoa. Hangaloamohe molumao, hangko rahaokiri i ranganda hai halalunda. 45 Anti kadana ralambi, mesulemohe mohaoki Yesu i Yerusale.
51 Roo indo, lao sambelamohe i Nasare, hai Yesu mampeulai ope-ope hawanda. Ope-ope au mewali iti batena napailalu inaNa.
