<<    <     Markus     4     >    >> 
Ngkora pandiri kana i topohawu
4
1 Hambela tempo, mepaturo mbulimi Yesu i wiwi rano Galilea. Bosa mpuu tauna teruhu motoleliki Yesu. Ido hai laomi Yesu mesawi i duanga, hai mohuda inditi, hai tauna bosa meangkahe i wiwi rano. 2 Ngkaia pakana au Napaturoahe i lalu ngkora pandiri, Nauli, 3 “Pehadingi! Ara hadua tauna au lao mohawu. 4 I pohawuna iti, ara tinuda au manawo i rara. Hawehe tadasi, motilo tinuda iti duuna ope.
5 Ara wori au manawo i tampo au mowatu-watu, haodi pea tampona. Tinuda iti holiga mpuu tuwo, lawi manipi tampona.6 Agaiana ane kealo, malaumi duuna bangi, lawi bara kaladu uakana.
7 Ara wori au manawo i lalu dui. Dui mobalungkuhi tinuda iti, alana bara mowua.
8 Ara wori tinuda au manawo i tampo au marudu. Tinuda iti tuwo maroa hai kamahile-hilea, alana mowua. Ara au talu pulona belana hangko i tinudana, ara au ini pulona belana, ara wori au hangatu belana hangko i tinudana.”9 Roo mopahawe ngkora pandiri iti, Nauliangaahe, “Hema au motalinga, nipehadingi maroa!”
Apa pongkana Yesu mololita hai ngkora pandiri
10 Roo indo, tangana Yesu haduduana, topeguruNa au hampulo hai rodua hai bahangkia tauna ntanina au meula Iria maihe mekune rauli, “Apari lempona ngkora pandiri inona?”
11 Nauli Yesu, “Hangkoia, noumba poparentana Pue Ala i dunia tewuniangi mani. Ide-ide rapopaisaamokau, agaiana i tauna ntanina Kupahaweahe hai ngkora pandiri, 12 bona tepabukei au teuki i lalu Sura Malelaha node:
Raitato, agaiana bara raisa lempona apa au raita.
Rahadito, agaiana bara raisa tunggaiana apa au rahadi.
Mewali, barahe mesule i Pue Ala,
hai dosanda bara teampungi.”*
Ngkora pandiri kana i topohawu napatongawa Yesu lempona
13 Roo indo, Yesu mouliangaahe topeguruNa node, “Ane ngkora pandiri inona barapi niisa lempona, noumbami kaniisana molempo ngkora pandiri au ntanina? 14 Topohawu, iami au mopahawe Ngkorana Pue Ala. 15 Tauna peisa rapandiri nodo iba pakana tampo: Arahe au rapandiri nodo tampo au mapempe, iami tauna au matua lalunda. Mohaditohe Ngkorana Pue Ala, agaiana Datu Tokadake mopawuli lalunda, alana Ngkorana Pue Ala au rahadimi iti bara rapailalu.
16 Ara worihe tauna au peisa rapandiri nodo tampo au mowatu-watu. Kamohadinda Ngkorana Pue Ala, rapokatana mpuu. 17 Agaiana Ngkora iti bara mouaka i lalunda, ido hai bara mantaha pepoinalainda. Ane rapopeahi-ahihe ba rapamaparihe anti pepoinalainda i Ngkorana Pue, usulihe hai barapohe mepoinalai.
18 Ara worihe tauna au rapandiri nodo tampo au nakatuwoi hehi modui. Mohadi mpuumohe Ngkorana Pue Ala, 19 agaiana mampekiri liliu peahe katuwonda i lalu dunia ide. Tauna iti mampeinao peahe morampu anu-anu dunia hai mampopengaa peundeana lalunda. Ido hai Ngkora iti bara mobundu i lalu katuwonda.
20 Ara wori tauna au rapandiri nodo tampo au marudu. Kamohadinda Ngkorana Pue Ala, liliu radoko. Rapailalu ntepuu hai rapopobundu, alana Ngkora iti mowua i lalu katuwonda. Ara au mowua talu pulona belana hangko i tinudana, ara wori au ini pulona belana, ara wori au hangatu belana hangko i tinudana.”
Ngkora pandiri kana i hulo au rabobongi
21 Nauli mbuli Yesu, “Ara pae tauna au mohuwe hulo i lalu sou hai nabobongi ba nawoli i woi koina? Bara ara. Hulo batena rawoli i paidaana bona pewangkana raita ope-ope tauna i lalu sou. 22 Nodo wori ope-ope paturoNgku au tewuniangi ina tepambole, hai ope-ope lolitaNgku au rawuniangi batena ina tongawa. 23 Hema au motalinga, pehadingi maroa!”
24 Mololita mbuli Yesu, Nauli, “Nipailalu apa au nihadi ide. Lawi ane ngkaia au nihadi hai nipeulai, ngkaia wori au ina napakanotoakau Pue Ala, ba melumbuto mani hangko inditi. 25 Tauna au mampoinalai Ngkorana Pue Ala, rapakanoto lalunda bona tetambai au ara irihira. Agaiana tauna au barahe mampoinalai Ngkorana Pue Ala, nauri arami haodi au raisa, hangangaa raala hule.”
Poparentana Pue Ala rapandiri nodo katuwona tinuda
26 Mololita mbuli Yesu, Nauli, “Ane hawemi poparentana Pue Ala i dunia, pewalina nodo ngkora pandiri ide: hadua tauna lao motudai bondena. 27 Maroa kaindi ba mabaa, maroa i tempona maturu ba i tempona mearo, tinudana iti tuwo liliu duuna mahile. Agaiana bara naisa topobonde noumba katuwona tinudana iti hai pane mahile. 28 Tampo haduduana au mampopembeti. Nguru-nguruna tawena hai kauna au mesupa, hangko inditi howumi duuna moihi. 29 Ane mangkami, laomi ampuna mampepare, lawi temponami rapepare.”*
Ngkora pandiri kana i lihu hahawi
30 Nauli Yesu, “Ane poparentana Pue Ala hawe i dunia, peisa tapandiri nodo apa? 31 Poparentana Pue Ala nodo lihu hahawia i lalu ngkora pandiri ide: Ara hadua tauna au mohawu lihu hahawi i bondena. Lihu hahawi iti manete ntepuu, kamanetena meliu hangko i ope-ope lihu au peisa rahawu. 32 Agaiana ane rahawu, hai tuwo, meliu kapangkana hangko i tuda-tuda au ntanina. Tuwo nodo hampoa kau au peisa rapoharai hai rapeongai tadasi.”
33 Hai ngkaia mani ngkora pandiri au napake Yesu mopahawe Ngkorana Pue Ala i tauna bosa. Napaturohe moula karabukuna moisa lempona. 34 Bara ara au Napaturoahe ane bara hai ngkora pandiri. Agaiana ane Ia pea hihimbela hai topeguruNa, hangko Napakanotori lempona ope-ope.
Yesu mampopengkaroo himburu kebuu
35 Kalumbami, mololitami Yesu i topeguruNa, Nauli, “Laomoke ntanda i orupena rano.” 36 Lawi Yesu ara amimi i lalu duanga, meangkawomohe topeguruna i duanga iti, mopalehihe tauna bosa au i wiwi rano. Ara wori bahangkia duanga ntanina inditi au meula.
37 Bara mahae hangko indo, hawemi himburu kebuu. Duanganda narumpa balumba, alana duanganda ina buke owai.
38 I tempo iti, Yesu tangana leta i ale au ara ntanda i taleu. Laohe topeguruNa morua, rauliangaa, “Guru! Moapari hai leta peaKo? Ina marugike!”
39 Mearomi Yesu, liliu mokambaroa himburu hai balumba, Nauli, “Pengkaroo himburu! Tindamoko balumba!” Mengkaroo mpuumi himburu, hai unga pea lene rano.
40 Roo indo, Yesu mouliangaahe topeguruNa, “Moapari hai langakau? Moapari hai bara maniNa nipoinalai?”
41 Tingkara mpuuhe topeguruNa, hai molololitahe hadua hai hadua, rauli, “Hemari tauna ide! Mogalo himburu hai balumba moula hawaNa!”